ਓਟਵਾ, 16 ਅਪਰੈਲ (ਪੋਸਟ ਬਿਊਰੋ) : ਕੱਲ੍ਹ ਕੈਨੇਡਾ ਦੇ ਵੱਡੇ ਵਾਇਰਲੈੱਸ ਨੈੱਟਵਰਕ ਨੂੰ ਵੱਡਾ ਝਟਕਾ ਲੱਗਿਆ ਜਦੋਂ ਸੀ ਆਰ ਟੀ ਸੀ ਵੱਲੋਂ ਅਜਿਹੇ ਆਰਡਰ ਜਾਰੀ ਕੀਤੇ ਗਏ ਜਿਨ੍ਹਾਂ ਨਾਲ ਨਿੱਕੀਆਂ ਕੰਪਨੀਆਂ ਨੂੰ ਵੀ ਇਨ੍ਹਾਂ ਵੱਡੀਆਂ ਕੰਪਨੀਆਂ ਨਾਲ ਮੁਕਾਬਲੇਬਾਜ਼ੀ ਕਰਨੀ ਸੌਖੀ ਹੋ ਜਾਵੇਗੀ। ਇਸ ਦਾ ਵੱਡਾ ਫਾਇਦਾ ਮੋਬਾਈਲ ਫੋਨਜ਼ ਦੀ ਵਰਤੋਂ ਕਰਨ ਵਾਲਿਆਂ ਨੂੰ ਹੋਵੇਗਾ ਕਿਉਂਕਿ ਇਸ ਨਾਲ ਕੀਮਤਾਂ ਕਾਫੀ ਘਟ ਜਾਣਗੀਆਂ।
ਫੈਡਰਲ ਟੈਲੇਕੌਮ ਰੈਗੂਲੇਟਰ ਵੱਲੋਂ ਉਨ੍ਹਾਂ ਸਿਫਾਰਿਸ਼ਾਂ ਨੂੰ ਅਪਣਾਇਆ ਗਿਆ ਜਿਨ੍ਹਾਂ ਵਿੱਚ ਕੰਜਿ਼ਊਮਰ ਗਰੁੱਪਜ਼ ਤੇ ਨਿੱਕੇ ਟੈਲੀਕੌਮ ਬਿਜ਼ਨਸਿਜ਼ ਮੈਦਾਨ ਵਿੱਚ ਨਿੱਤਰ ਸਕਣਗੇ। ਸੀ ਆਰ ਟੀ ਸੀ ਨੇ ਆਖਿਆ ਕਿ ਇਸ ਫੈਸਲੇ ਨਾਲ ਨਿੱਕੇ ਆਪਰੇਟਰਜ਼ ਲਈ ਨੈਸ਼ਨਲ ਵਾਇਰਲੈੱਸ ਨੈਟਵਰਕਸ ਨਾਲ ਜੁੜਨ ਦਾ ਰਾਹ ਪੱਧਰਾ ਹੋ ਜਾਵੇਗਾ ਤੇ ਉਹ ਵੀ ਹੋਲਸੇਲ ਆਧਾਰ ਉੱਤੇ।
ਸੀ ਆਰ ਟੀ ਸੀ ਦਾ ਕਹਿਣਾ ਹੈ ਕਿ ਜਿਨ੍ਹਾਂ ਇਲਾਕਿਆਂ ਵਿੱਚ ਮੁਕਾਬਲੇਬਾਜ਼ੀ ਸੀਮਤ ਹੈ ਉੱਥੇ ਰੀਜਨਲ ਨੈੱਟਵਰਕ, ਜਿਹੜੇ ਕੁੱਝ ਖਾਸ ਮਾਪਦੰਡਾਂ ਉੱਤੇ ਖਰੇ ਉਤਰਦੇ ਹਨ, ਮੋਬਾਈਲ ਵਰਚੂਅਲ ਨੈੱਟਵਰਕ ਆਪਰੇਟਰਜ਼ (ਐਮ ਵੀ ਐਨ ਓਜ਼) ਵਜੋਂ ਆਪਰੇਟ ਕਰ ਸਕਣਗੇ। ਇਸ ਤੋਂ ਇਲਾਵਾ ਸੀ ਆਰ ਟੀ ਸੀ ਨੇ ਬੈੱਲ, ਰੌਜਰਜ਼, ਟੈੱਲਅਸ ਦੇ ਨਾਲ ਨਾਲ ਸਰਕਾਰੀ ਮਲਕੀਅਤ ਵਾਲੀ ਸਾਸਕਟੈਲ ਨੂੰ ਤਿੰਨ ਮਹੀਨੇ ਦਾ ਸਮਾਂ ਦਿੱਤਾ ਹੈ ਤਾਂ ਕਿ ਉਹ ਸੀਨੀਅਰਜ਼, ਘੱਟ ਆਮਦਨ ਵਾਲੇ ਲੋਕਾਂ ਲਈ ਕਿਫਾਇਤੀ ਪਲੈਨ ਲਿਆਉਣ। ਇੱਥੇ ਦੱਸਣਾ ਬਣਦਾ ਹੈ ਕਿ ਇਹ ਤਿੰਨੇ ਦਿੱਗਜ ਕੰਪਨੀਆਂ ਐਮ ਵੀ ਐਨ ਓਜ਼ ਦੇ ਖਿਲਾਫ ਹਨ।