ਬਰੁੱਕਲਿਨ ਸੈਂਟਰ, ਮਿਨੀਸੋਟਾ, 14 ਅਪਰੈਲ (ਪੋਸਟ ਬਿਊਰੋ) : ਮਿਨੀਆਪੋਲਿਸ ਪੁਲਿਸ ਦੀ ਸਾਬਕਾ ਅਧਿਕਾਰੀ ਨੂੰ ਬੁੱਧਵਾਰ ਨੂੰ ਸਿਆਹ ਨਸਲ ਦੇ 20 ਸਾਲਾ ਮੋਟਰਿਸਟ ਦਾਂਤੇ ਰਾਈਟ ਨੂੰ ਮਾਰਨ ਦੇ ਸਬੰਧ ਵਿੱਚ ਸੈਕਿੰਡ ਡਿਗਰੀ ਕਤਲ ਲਈ ਚਾਰਜ ਕੀਤਾ ਗਿਆ ਹੈ। ਇਸ ਮਾਮਲੇ ਤੋਂ ਬਾਅਦ ਇੱਕ ਵਾਰੀ ਫਿਰ ਮੁਜ਼ਾਹਰਾਕਾਰੀਆਂ ਤੇ ਪੁਲਿਸ ਦਰਮਿਆਨ ਤਣਾਅ ਤੇ ਝੜਪਾਂ ਦਾ ਸਿਲਸਿਲਾ ਸ਼ੁਰੂ ਹੋ ਗਿਆ।
ਸਾਬਕਾ ਬਰੁੱਕਲਿਨ ਸੈਂਟਰ ਪੁਲਿਸ ਆਫੀਸਰ ਕਿੰਮ ਪੌਟਰ ਖਿਲਾਫ ਚਾਰਜ ਰਾਈਟ ਦੇ ਮਾਰੇ ਜਾਣ ਤੋਂ ਤਿੰਨ ਦਿਨ ਬਾਅਦ ਫਾਈਲ ਕੀਤਾ ਗਿਆ। ਇੱਥੇ ਦੱਸਣਾ ਬਣਦਾ ਹੈ ਕਿ ਇੱਥੋਂ ਨੇੜੇ ਹੀ ਅਜੇ ਪਿਛਲੇ ਸਾਲ ਮਈ ਵਿੱਚ ਜਾਰਜ ਫਲੌਇਡ ਨੂੰ ਮਾਰੇ ਜਾਣ ਦੇ ਮਾਮਲੇ ਵਿੱਚ ਸਾਬਕਾ ਪੁਲਿਸ ਅਧਿਕਾਰੀ ਖਿਲਾਫ ਵੀ ਮੁਕੱਦਮਾ ਚੱਲ ਰਿਹਾ ਹੈ।
ਬਰੁੱਕਲਿਨ ਸੈਂਟਰ ਪੁਿਲਸ ਦੇ ਸਾਬਕਾ ਪੁਲਿਸ ਚੀਫ ਨੇ ਆਖਿਆ ਕਿ 26 ਸਾਲਾਂ ਤੋਂ ਪੁਲਿਸ ਦੀ ਨੌਕਰੀ ਕਰ ਰਹੀ ਤੇ ਟਰੇਨਿੰਗ ਆਫੀਸਰ 48 ਸਾਲਾ ਪੌਟਰ ਰਾਈਟ ਉੱਤੇ ਟੇਜ਼ਰ ਦੀ ਵਰਤੋਂ ਕਰਨਾ ਚਾਹੁੰਦੀ ਸੀ ਪਰ ਗਲਤੀ ਨਾਲ ਉਸ ਤੋਂ ਆਪਣੀ ਹੈਂਡਗੰਨ ਚੱਲ ਗਈ। ਦੂਜੇ ਪਾਸੇ ਮੁਜ਼ਾਹਰਾਕਾਰੀਆਂ ਤੇ ਰਾਈਟ ਦੇ ਪਰਿਵਾਰ ਦਾ ਕਹਿਣਾ ਹੈ ਕਿ ਗੋਲੀ ਚਲਾਏ ਜਾਣ ਲਈ ਕੋਈ ਬਹਾਨਾ ਨਹੀਂ ਚੱਲ ਸਕਦਾ ਤੇ ਉਨ੍ਹਾਂ ਆਖਿਆ ਕਿ ਇਸ ਤੋਂ ਸਿੱਧ ਹੁੰਦਾ ਹੈ ਕਿ ਨਿਆਂ ਪ੍ਰਬੰਧ ਕਾਲੇ ਲੋਕਾਂ ਲਈ ਕਿਸ ਤਰ੍ਹਾਂ ਤੋੜਿਆ ਮਰੋੜਿਆ ਜਾਂਦਾ ਹੈ।
ਜਿ਼ਕਰਯੋਗ ਹੈ ਕਿ ਟਰੈਫਿਕ ਸਟੌਪ ਦੌਰਾਨ ਰਾਈਟ ਨੂੰ ਐਕਸਪਾਇਰ ਹੋ ਚੁੱਕੀ ਕਾਰ ਰਜਿਸਟ੍ਰੇਸ਼ਨ ਲਈ ਰੋਕਿਆ ਗਿਆ ਪਰ ਇਸ ਸਾਰੇ ਘਟਨਾਕ੍ਰਮ ਦਾ ਅੰਤ ਉਸ ਦੀ ਮੌਤ ਨਾਲ ਹੋਇਆ।ਆਨਲਾਈਨ ਰਿਕਾਰਡ ਅਨੁਸਾਰ ਬੁੱਧਵਾਰ ਸ਼ਾਮ ਨੂੰ ਪੌਟਰ ਨੇ 100,000 ਡਾਲਰ ਦਾ ਮੁਚਲਕਾ ਭਰਿਆ ਤੇ ਉਸ ਨੂੰ ਹੈਨੇਪਿਨ ਕਾਊਂਟੀ ਜੇਲ੍ਹ ਤੋਂ ਰਿਹਾਅ ਕਰ ਦਿੱਤਾ ਗਿਆ। ਉਸ ਨੂੰ ਵੀਰਵਾਰ ਦੁਪਹਿਰ ਨੂੰ ਅਦਾਲਤ ਸਾਹਮਣੇ ਪੇਸ਼ ਕੀਤਾ ਜਾਵੇਗਾ।