ਨਵਾਂ ਸ਼ਹਿਰ, 9 ਦਸੰਬਰ (ਪੋਸਟ ਬਿਊਰੋ)- ਨੇੜਲੇ ਪਿੰਡ ਚੱਕਦਾਨਾ ਵਿਚਲੀ ਐੱਚ ਡੀ ਐੱਫ ਸੀ ਬੈਂਕ ਦੇ ਮੈਨੇਜਰ ਨੇ ਇੱਕ ਬਜ਼ੁਰਗ ਦੀ ਐੱਫ ਡੀ ਉੱਤੇ ਖੁਦ ਹੀ ਲਿਮਿਟ ਬਣਵਾ ਕੇ ਉਸ ਦੇ ਖਾਤੇ ਵਿੱਚੋਂ 14.35 ਲੱਖ ਰੁਪਏ ਦੂਸਰੇ ਦੇ ਖਾਤੇ ਵਿੱਚ ਟਰਾਂਸਫਰ ਕਰ ਕੇ ਧੋਖਾਧੜੀ ਕੀਤੀ ਹੈ। ਮੈਨੇਜਰ ਨੇ ਚੈੱਕਾਂ ਉੱਤੇ ਆਪਣੇ ਸਾਈਨ ਕਰ ਕੇ ਰੁਪਏ ਕਢਵਾ ਲਏ ਹਨ ਅਤੇ ਇਸ ਦੇ ਬਾਅਦ ਲੁਧਿਆਣਾ ਵਾਸੀ ਇਹ ਮੈਨੇਜਰ ਫਰਾਰ ਹੈ।
ਸ਼ਿਕਾਇਤ ਕਰਤਾ ਜਸਵਿੰਦਰ ਕੌਰ ਨੇ ਇਸ ਬਾਰੇ ਜੁਲਾਈ ਵਿੱਚ ਐੱਸ ਐੱਸ ਪੀ ਕੋਲ ਸ਼ਿਕਾਇਤ ਕੀਤੀ ਗਈ ਤਾਂ ਵੱਖ ਵੱਖ ਪੱਧਰ ਉਤੇ ਜਾਂਚ ਦੇ ਬਾਅਦ ਪੁਲਸ ਨੇ ਦੋਸ਼ੀ ਬੈਂਕ ਮੈਨੇਜਰ ਦੇ ਖਿਲਾਫ ਕੇਸ ਦਰਜ ਕੀਤਾ ਹੈ। ਪੁਲਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਲਸਾੜਾ ਦੀ ਜਸਵਿੰਦਰ ਕੌਰ ਨੇ ਦੱਸਿਆ ਕਿ ਉਸ ਦੇ ਪਿਤਾ ਸੀਨੀਅਰ ਸਿਟੀਜਨ ਹਨ ਅਤੇ ਚੱਕਦਾਨਾ ਵਿੱਚ ਐੱਚ ਡੀ ਐੱਫ ਸੀ ਬੈਂਕ ਦੀ ਬ੍ਰਾਂਚ ਵਿੱਚ ਉਨ੍ਹਾਂ ਦਾ ਖਾਤਾ ਹੈ। ਉਨ੍ਹਾਂ ਨੇ 10 ਲੱਖ ਦੀ ਐੱਫ ਡੀ ਇੱਕ ਸਾਲ ਦੇ ਲਈ ਕਰਵਾਈ ਸੀ। ਬੈਂਕ ਪ੍ਰਨੋਟ ਦੇ ਮੁਤਾਬਕ ਉਨ੍ਹਾਂ ਨੂੰ 8.40 ਫੀਸਦੀ ਵਿਆਜ ਮਿਲਣਾ ਸੀ। ਇਸ ਦੀ ਮਿਆਦ 1 ਜਨਵਰੀ 2019 ਨੂੰ ਪੂਰੀ ਹੋਣੀ ਸੀ। ਬੈਂਕ ਦੇ ਕਸਟਮਰ ਕੇਅਰ ਵੱਲੋਂ ਉਨ੍ਹਾਂ ਨੂੰ 29 ਮਈ ਨੂੰ ਫੋਨ ਆਇਆ ਕਿ ਉਨ੍ਹਾਂ ਦੇ ਐੱਫ ਡੀ ਅਕਾਊਂਟ ਦਾ ਓਵਰ ਡਰਾਫਟ ਲਿਮਿਟ ਪੈਂਡਿੰਗ ਹੈ, ਜਦ ਕਿ ਓਵਰ ਡਰਾਫਟ ਲਿਮਿਟ ਦੇ ਬਾਰੇ ਉਨ੍ਹਾਂ ਨੂੰ ਕੋਈ ਜਾਣਕਾਰੀ ਨਹੀਂ ਸੀ। ਅਗਲੇ ਦਿਨ ਜਦ ਉਹ ਇਸ ਬਾਰੇ ਜਾਣਕਾਰੀ ਲੈਣ ਲਈ ਬੈਂਕ ਗਏ ਤਾਂ ਉਨ੍ਹਾਂ ਨੂੰ ਦੱਸਿਆ ਗਿਆ ਕਿ ਉਨ੍ਹਾਂ ਦੀ ਐੱਫ ਡੀ ਵਿੱਚੋਂ ਉਨ੍ਹਾਂ ਦੇ ਓਵਰਡਰਾਫਟ ਹੋਈ ਰਕਮ ਦਾ ਭੁਗਤਾਨ ਕਰ ਦਿੱਤਾ ਹੈ। ਉਨ੍ਹਾਂ ਨੂੰ ਦੱਸਿਆ ਗਿਆ ਕਿ ਉਨ੍ਹਾਂ ਦੇ ਖਾਤੇ ਵਿੱਚੋਂ ਅੱਠ ਜਨਵਰੀ 2018 ਨੂੰ ਕੇਸਰ ਸਿੰਘ ਦੇ ਖਾਤੇ ਵਿੱਚ 4.01 ਲੱਖ ਰੁਪਏ ਤੇ ਰਣਜੀਤ ਸਿੰਘ ਦੇ ਖਾਤੇ ਚਾਰ ਲੱਖ ਰੁਪਏ ਟਰਾਂਸਫਰ ਕੀਤੇ ਗਏ ਸਨ। ਇਸ ਦੇ ਇਲਾਵਾ ਨੌਂ ਜਨਵਰੀ ਨੂੰ ਉਨ੍ਹਾਂ ਦੇ ਖਾਤੇ ਵਿੱਚੋਂ ਮਨਜੀਤ ਕੌਰ ਦੇ ਖਾਤੇ ਵਿੱਚ ਚਾਰ ਲੱਖ ਤੇ ਰਣਜੀਤ ਸਿੰਘ ਦੇ ਖਾਤੇ ਵਿੱਚ 2.35 ਲੱਖ ਰੁਪਏ ਟਰਾਂਸਫਰ ਕੀਤੇ ਗਏ ਸਨ, ਜਦ ਕਿ ਉਨ੍ਹਾਂ ਨੇ ਨਾ ਕੋਈ ਲੋਨ ਲਿਆ ਸੀ ਅਤੇ ਨਾ ਵਿਦਡਰਾਲ ਫਾਰਮ ਬੈਂਕ ਨੂੰ ਦਿੱਤਾ ਸੀ। ਜਿਨ੍ਹਾਂ ਲੋਕਾਂ ਦੇ ਖਾਤੇ ਵਿੱਚ ਇਹ ਰੁਪਏ ਪਾਏ ਗਏ ਸਨ, ਉਨ੍ਹਾਂ ਨੂੰ ਉਹ ਜਾਣਦੇ ਵੀ ਨਹੀਂ। ਤਿੰਨ-ਚਾਰ ਜੂਨ ਨੂੰ ਜਦ ਉਹ ਬੈਂਕ ਗਏ ਅਤੇ ਅਧਿਕਾਰੀਆਂ ਨੂੰ ਪੁੱਛਿਆ ਕਿ ਬਿਨਾਂ ਐੱਫ ਡੀ ਪ੍ਰਨੋਟ ਅਤੇ ਉਨ੍ਹਾਂ ਦੇ ਸਾਈਨ ਦੇ ਬਿਨਾਂ ਉਨ੍ਹਾਂ ਦੀ ਐੱਫ ਡੀ ਕਿਵੇਂ ਤੋੜੀ ਗਈ ਤਾਂ ਬੈਂਕ ਅਧਿਕਾਰੀਆਂ ਨੇ ਦੱਸਿਆ ਕਿ ਉਨ੍ਹਾਂ ਦੇ ਰਿਕਾਰਡ ਵਿੱਚ ਐੱਫ ਡੀ ਦਾ ਪ੍ਰਨੋਟ ਵੀ ਹੈ, ਜੋ ਉਹ ਲੋਕ ਲੈ ਕੇ ਆਏ ਹਨ, ਉਹ ਡੁਪਲੀਕੇਟ ਕਾਪੀ ਹੈ। ਉਨ੍ਹਾਂ ਨੇ ਇਸ ਦਾ ਵਿਰੋਧ ਕੀਤਾ ਤਾਂ ਬੈਂਕ ਅਧਿਕਾਰੀਆਂ ਨੇ ਉਨ੍ਹਾਂ ਨੂੰ ਧਮਕਾਉਣਾ ਸ਼ੁਰੂ ਕਰ ਦਿੱਤਾ।