ਵਾਸ਼ਿੰਗਟਨ, 24 ਮਾਰਚ (ਪੋਸਟ ਬਿਊਰੋ)- ਅਧਿਕਾਰੀਆਂ ਨੇ ਦੱਸਿਆ ਕਿ ਇੱਕ ਬੰਦੂਕਧਾਰੀ ਨੇ ਕੱਲ੍ਹ ਕੋਲੋਰਾਡੋ ਸੁਪਰ ਮਾਰਕੀਟ ਵਿੱਚ ਗੋਲੀਬਾਰੀ ਕੀਤੀ, ਜਿਸ ਕਾਰਨ ਇੱਕ ਪੁਲਸ ਅਧਿਕਾਰੀ ਸਣੇ 10 ਲੋਕ ਮਾਰੇ ਗਏ। ਇੱਕ ਵਿਅਕਤੀ ਨੂੰ ਬੋਲਡਰ ਵਿੱਚ ਘਟਨਾ ਸਥਾਨ ਉੱਤੇ ਹਿਰਾਸਤ ਵਿੱਚ ਲੈ ਲਿਆ ਗਿਆ।
ਬੋਲਡਰ ਪੁਲਸ ਦੇ ਮੁਖੀ ਮਾਰੀਸ ਹੈਰੋਲਡ ਨੇ ਮਾਰੇ ਗਏ ਅਧਿਕਾਰੀ ਦੀ ਪਛਾਣ 51 ਸਾਲਾ ਏਰਿਕ ਟੱਲੀ ਵਜੋਂ ਕੀਤੀ ਹੈ। ਸੀ ਬੀ ਐਸ ਡੈਨਵਰ ਹੈਲੀਕਾਪਟਰ ਫੁਟੇਜ ਵਿੱਚ ਅਧਿਕਾਰੀਆਂ ਵੱਲੋਂ ਇੱਕ ਸਾਰਟਲਸ ਆਦਮੀ ਨੂੰ ਹੱਥਕੜੀ ਲਾ ਕੇ ਲਿਜਾਂਦੇ ਦੇਖਿਆ ਗਿਆ, ਜਿਸ ਨੂੰ ਘਟਨਾ ਸਥਾਨ ਤੋਂ ਫੜਿਆਂ ਗਿਆ ਤੇ ਉਸ ਦੀ ਲੱਤ ਖ਼ੂਨ ਨਾਲ ਲਿਬੜੀ ਹੋਈ ਦਿਖਾਈ ਦਿੱਤੀ, ਪਰ ਅਧਿਕਾਰੀ ਇਸ ਦੀ ਪੁਸ਼ਟੀ ਨਹੀਂ ਕਰ ਸਕੇ ਕੀ ਉਹ ਵਿਅਕਤੀ ਹਿਰਾਸਤ ਵਿੱਚ ਹੈ। ਗਵਾਹਾਂ ਨੇ ਇਸ ਅਰਾਜਕਤਾ ਭਰੇ ਦਿ੍ਰਸ਼ ਦਾ ਜ਼ਿਕਰ ਕੀਤਾ ਕਿ ਕਰਿਆਨੇ ਦੀ ਦੁਕਾਨ ਵਿੱਚ ਕਈ ਜ਼ੋਰਦਾਰ ਧਮਾਕੇ ਹੋਏ ਸਨ। ਇੱਕ ਆਦਮੀ ਨੇ ਕਿਹਾ ਕਿ ਉਸ ਨੇ ਪਹਿਲਾਂ ਸੋਚਿਆ ਕਿ ਕਿਸੇ ਨੇ ਸਟੋਰ ਦੇ ਅੰਦਰ ਕੋਈ ਚੀਜ਼ ਸੁੱਟ ਦਿੱਤੀ ਹੈ, ਪਰ ਤੀਜੀ ਗੋਲੀ ਚੱਲਦੇ ਹੀ ਲੋਕਾਂ ਨੇ ਭੱਜਣਾ ਸ਼ੁਰੂ ਕਰ ਦਿੱਤਾ ਸੀ।