ਬਾਰਸੀਲੋਨਾ, 20 ਦਸੰਬਰ (ਪੋਸਟ ਬਿਊਰੋ)- ਅਰਜਨਟੀਨਾ ਸੁਪਰਸਟਾਰ ਲਿਓਨ ਮੈਸੀ ਨੇ ਬਾਰਸੀਲੋਨਾ ਵੱਲੋਂ ਖੇਡਦੇ ਹੋਏ ਵੇਲੇਂਸੀਆ ਦੇ ਖਿਲਾਫ ਸਪੈਨਿਸ਼ ਲੀਗ ਲਾ ਲੀਗਾ ਵਿੱਚ ਵੱਡੀ ਪ੍ਰਾਪਤੀ ਦਰਜ ਕੀਤੀ ਹੈ।
ਮੈਸੀ ਨੇ ਇੱਕ ਫੁੱਟਬਾਲ ਕਲੱਬ ਵੱਲੋਂ ਖੇਡਦੇ ਹੋਏ ਸਭ ਤੋਂ ਵੱਧ ਗੋਲ ਕਰਨ ਦੇ ਮਾਮਲੇ ਵਿੱਚ ਬਰਾਜੀਲ ਦੇ ਪ੍ਰਸਿੱਧ ਖਿਡਾਰੀ ਪੇਲੇ ਦੀ ਬਰਾਬਰੀ ਕਰ ਲਈ ਹੈ। ਉਸ ਨੇ ਬਾਰਸੀਲੋਨਾ ਦੇ ਲਈ ਬੀਤੇ ਦਿਨ 643ਵਾਂ ਗੋਲ ਕੀਤਾ। ਪੇਲੇ ਨੇ ਬਰਾਜੀਲ ਦੇ ਕਲੱਬ ਸਾਂਤੋਸ ਦੇ ਲਈ 19 ਸੈਸ਼ਨਾਂ ਵਿੱਚ 643 ਗੋਲ ਕੀਤੇ ਸਨ।ਅਰਜਨਟੀਨਾ ਦੇ 33 ਸਾਲਾ ਖਿਡਾਰੀ ਨੇ ਹਾਫ ਟਾਈਮ ਤੋਂ ਥੋੜ੍ਹਾ ਸਮਾਂ ਪਹਿਲਾਂ ਹੇਡਰ ਨਾਲ ਇਹ ਗੋਲ ਕੀਤਾ। ਇਸ ਤੋਂ ਪਹਿਲਾਂ ਉਨ੍ਹਾਂ ਦੀ ਪੈਨਾਲਟੀ ਨੂੰ ਵੇਲੇਂਸੀਆ ਦੇ ਕੀਪਰ ਜਾਮੇ ਡੋਮੇਨੇਕ ਨੇ ਰੋਕ ਦਿੱਤਾ ਸੀ। ਬਾਰਸੀਲੋਨਾ ਨੇ ਇਹ ਮੁਕਾਬਲਾ 2-1 ਨਾਲ ਆਪਣੇ ਨਾਂਅ ਕਰ ਲਿਆ। ਬਾਰਸਾ ਦੇ ਲਈ ਉਨ੍ਹਾਂ ਦੇ ਇਲਾਵਾ ਰੋਨਾਲਡ ਅਰਾਉਜੋ ਨੇ 52ਵੇਂ ਮਿੰਟ ਵਿੱਚ ਗੋਲ ਕੀਤਾ। ਵੇਲੇਂਸੀਆ ਦੇ ਲਈ ਇੱਕੋ ਇੱਕ ਗੋਲ ਮੁਕਟਾਰ ਦਿਆਖਾਬੀ ਨੇ 29ਵੇਂ ਮਿੰਟ ਵਿੱਚ ਕੀਤਾ ਸੀ।