ਵਾਸਿ਼ੰਗਟਨ, 16 ਜੁਲਾਈ (ਪੋਸਟ ਬਿਊਰੋ): ਅਮਰੀਕਾ ਦੀ ਰਿਪਬਲਿਕਨ ਪਾਰਟੀ ਨੇ ਸੋਮਵਾਰ ਦੇਰ ਰਾਤ ਅਧਿਕਾਰਤ ਤੌਰ 'ਤੇ ਡੋਨਾਲਡ ਟਰੰਪ ਨੂੰ ਆਪਣਾ ਰਾਸ਼ਟਰਪਤੀ ਉਮੀਦਵਾਰ ਐਲਾਨ ਦਿੱਤਾ। ਵਿਸਕਾਨਸਿਨ ਦੇ ਮਿਲਵਾਕੀ ਸ਼ਹਿਰ ਵਿੱਚ ਹੋਏ ਪਾਰਟੀ ਸੰਮੇਲਨ ਵਿੱਚ ਟਰੰਪ ਨੂੰ ਡੈਲੀਗੇਟਾਂ ਤੋਂ 2387 ਵੋਟਾਂ ਮਿਲੀਆਂ। ਉਸ ਨੂੰ ਉਮੀਦਵਾਰ ਵਜੋਂ ਚੁਣੇ ਜਾਣ ਲਈ 1215 ਵੋਟਾਂ ਦੀ ਲੋੜ ਸੀ।
ਪੈਨਸਿਲਵੇਨੀਆ 'ਚ 13 ਜੁਲਾਈ ਨੂੰ ਹੋਏ ਹਮਲੇ ਤੋਂ ਬਾਅਦ ਇਹ ਪਹਿਲੀ ਵਾਰ ਸੀ ਕਿ ਟਰੰਪ ਕਿਸੇ ਜਨਤਕ ਪਲੇਟਫਾਰਮ 'ਤੇ ਨਜ਼ਰ ਆਏ। ਉਨ੍ਹਾਂ ਦੇ ਕੰਨ 'ਤੇ ਪੱਟੀ ਬੰਨ੍ਹੀ ਹੋਈ ਸੀ। ਗੋਲੀ ਚੱਲਣ ਦੇ 48 ਘੰਟੇ ਬਾਅਦ ਪਾਰਟੀ ਨੇ ਉਨ੍ਹਾਂ ਨੂੰ ਰਾਸ਼ਟਰਪਤੀ ਅਹੁਦੇ ਦਾ ਉਮੀਦਵਾਰ ਐਲਾਨ ਦਿੱਤਾ।
ਟਰੰਪ ਜਿਵੇਂ ਹੀ ਕਾਨਫਰੰਸ ਵਿੱਚ ਪਹੁੰਚੇ ਸਮਰਥਕਾਂ ਨੇ ‘ਯੂਐੱਸਏ-ਯੂਐੱਸਏ’ ਦੇ ਨਾਅਰੇ ਲਾਏ। ਲੋਕ ਹਵਾ ਵਿੱਚ ਮੁੱਠੀ ਲਹਿਰਾਉਂਦੇ ਹੋਏ ‘ਫਾਈਟ-ਫਾਈਟ’ ਕਹਿੰਦੇ ਵੀ ਦੇਖੇ ਗਏ। ਦਰਅਸਲ ਸ਼ਨੀਵਾਰ ਨੂੰ ਗੋਲੀ ਲੱਗਣ ਤੋਂ ਬਾਅਦ ਟਰੰਪ ਨੇ ਹਵਾ 'ਚ ਮੁੱਠੀ ਚੁੱਕ ਕੇ ਫਾਈਟ-ਫਾਈਟ ਕਿਹਾ।
ਸੰਮੇਲਨ 'ਚ ਟਰੰਪ ਦੇ ਨਾਲ ਉਨ੍ਹਾਂ ਦੇ ਪੁੱਤਰ ਐਰਿਕ ਅਤੇ ਡੋਨਾਲਡ ਜੂਨੀਅਰ ਵੀ ਮੌਜੂਦ ਸਨ। ਕਾਨਫਰੰਸ ਖਤਮ ਹੋਣ ਤੋਂ ਬਾਅਦ ਜਦੋਂ ਟਰੰਪ ਬਾਹਰ ਨਿਕਲਣ ਲੱਗੇ ਤਾਂ ਲੋਕਾਂ ਨੇ ‘ਵੀ ਲਵ ਟਰੰਪ’ ਦੇ ਨਾਅਰੇ ਵੀ ਲਾਏ। ਇਸ ਦੌਰਾਨ ਕੁਝ ਸਮਰਥਕਾਂ ਦੀਆਂ ਅੱਖਾਂ ਵੀ ਨਮ ਹੋ ਗਈਆਂ। ਹਾਲਾਂਕਿ ਟਰੰਪ ਨੇ ਖੁਦ ਸੰਮੇਲਨ 'ਚ ਇਕ ਵਾਰ ਵੀ ਗੋਲੀ ਦਾ ਜਿ਼ਕਰ ਨਹੀਂ ਕੀਤਾ।