ਕੁਏਟਾ, ਪਾਕਿਸਤਾਨ, 12 ਅਪਰੈਲ (ਪੋਸਟ ਬਿਊਰੋ) : ਸ਼ੁੱਕਰਵਾਰ ਨੂੰ ਦੱਖਣਪੱਛਮੀ ਪਾਕਿਸਤਾਨ ਦੇ ਸ਼ਹਿਰ ਕੁਏਟਾ ਵਿੱਚ ਇੱਕ ਓਪਨ ਏਅਰ ਮਾਰਕਿਟ ਵਿੱਚ ਆਤਮਘਾਤੀ ਹਮਲਾਵਰ ਵੱਲੋਂ ਖੁਦ ਨੂੰ ਉਡਾ ਲਏ ਜਾਣ ਕਾਰਨ ਘੱਟੋ ਘੱਟ 20 ਵਿਅਕਤੀ ਮਾਰੇ ਗਏ ਤੇ ਦਰਜਨਾਂ ਹੋਰ ਜ਼ਖ਼ਮੀਂ ਹੋ ਗਏ। ਇਹ ਜਾਣਕਾਰੀ ਪੁਲਿਸ ਤੇ ਹਸਪਤਾਲ ਅਧਿਕਾਰੀਆਂ ਨੇ ਦਿੱਤੀ। 
ਇਹ ਬੰਬ ਧਮਾਕਾ ਸ਼ੀਆ ਮੁਸਲਮਾਨਾਂ ਦੀ ਬਹੁਤਾਤ ਵਾਲੇ ਰਿਹਾਇਸ਼ੀ ਇਲਾਕੇ ਵਿੱਚ ਹੋਇਆ। ਬੰਬ ਧਮਾਕੇ ਤੋਂ ਤੁਰੰਤ ਬਾਅਦ ਹੀ ਗੁੱਸੇ ਵਿੱਚ ਆਏ ਦਰਜਨਾਂ ਸ਼ੀਆ ਨੌਜਵਾਨਾਂ ਨੇ ਕੁਏਟਾ ਵਿੱਚ ਰੋਹ ਭਰੀ ਰੈਲੀ ਕੀਤੀ। ਉਨ੍ਹਾਂ ਅਧਿਕਾਰੀਆਂ ਤੋਂ ਵਧੇਰੇ ਸਕਿਊਰਿਟੀ ਮੁਹੱਈਆ ਕਰਵਾਉਣ ਦੀ ਮੰਗ ਕੀਤੀ ਤੇ ਹਮਲੇ ਲਈ ਜ਼ਿੰਮੇਵਾਰ ਲੋਕਾਂ ਨੂੰ ਗ੍ਰਿਫਤਾਰ ਕਰਨ ਦੀ ਵੀ ਮੰਗ ਕੀਤੀ। ਉਨ੍ਹਾਂ ਸੁੰਨੀ ਮੁਸਲਮਾਨਾਂ, ਜਿਨ੍ਹਾਂ ਨੇ ਪਿਛਲੇ ਕਈ ਸਾਲਾਂ ਵਿੱਚ ਬਲੋਚਿਸਤਾਨ ਪ੍ਰੋਵਿੰਸ ਵਿੱਚ ਇਸੇ ਤਰ੍ਹਾਂ ਦੇ ਹਮਲੇ ਕਰਕੇ ਕਈ ਮਾਸੂਮ ਲੋਕਾਂ ਨੂੰ ਵੀ ਮਾਰਿਆ, ਵੱਲੋਂ ਕੀਤੀਆਂ ਜਾ ਰਹੀਆਂ ਹਿੰਸਕ ਗਤੀਵਿਧੀਆਂ ਦੀ ਆਲੋਚਨਾ ਵੀ ਕੀਤੀ।  
ਸੀਨੀਅਰ ਪੁਲਿਸ ਚੀਫ ਅਬਦੁਰ ਰਜ਼ਾਕ ਚੀਮਾ ਨੇ ਆਖਿਆ ਕਿ ਇੰਜ ਲੱਗ ਰਿਹਾ ਸੀ ਕਿ ਸੀਆ ਦੀ ਹਜ਼ਾਰਾ ਕਮਿਊਨਿਟੀ ਨੂੰ ਮੁੱਖ ਤੌਰ ਉੱਤੇ ਨਿਸ਼ਾਨਾ ਬਣਾਇਆ ਗਿਆ। ਉਨ੍ਹਾਂ ਦੱਸਿਆ ਕਿ ਇਸ ਘਟਨਾ ਦਾ ਸ਼ਿਕਾਰ ਲੋਕਾਂ ਵਿੱਚੋਂ ਕਈਆਂ ਦੀ ਹਾਲਤ ਕਾਫੀ ਨਾਜੁæਕ ਬਣੀ ਹੋਈ ਹੈ। ਪ੍ਰੋਵਿੰਸ ਦੇ ਗ੍ਰਹਿ ਮੰਤਰੀ  ਮੀਰ ਜਿਆਉੱਲਾਹ ਲੰਗਾਊ ਨੇ ਆਖਿਆ ਕਿ ਆਤਮਘਾਤੀ ਬੰਬਾਰ ਮਾਰਕਿਟ ਵਿੱਚ ਗਿਆ ਤੇ ਉਸ ਨੇ ਸ਼ੀਆ ਤੇ ਸੁੰਨੀ ਦੋਵਾਂ ਨੂੰ ਹੀ ਮਾਰ ਮੁਕਾਇਆ। ਅਜੇ ਤੱਕ ਇਸ ਹਮਲੇ ਦੀ ਜ਼ਿੰਮੇਵਾਰੀ ਕਿਸੇ ਨੇ ਨਹੀਂ ਲਈ। ਪਰ ਪਹਿਲਾਂ ਵੀ ਹੋ ਚੁੱਕੇ ਅਜਿਹੇ ਹਮਲਿਆਂ ਦੀ ਜ਼ਿੰਮੇਵਾਰੀ ਸ਼ੀਆ ਅੱਤਵਾਦੀ ਲੈ ਚੁੱਕੇ ਹਨ।