ਪਿਛਲੇ ਦਿਨੀਂ ਫਿਲਮ ‘ਟੋਟਲ ਧਮਾਲ’ ਵਿੱਚ ਨਜ਼ਰ ਆਏ ਅਨਿਲ ਕਪੂਰ ਨੇ ਇੱਕ ਰਿਐਲਿਟੀ ਸ਼ੋਅ ਵਿੱਚ ਪਹੁੰਚ ਕੇ ਆਪਣੀ ਇੱਕ ਪੁਰਾਣੀ ਫਿਲਮ ਨਾਲ ਜੁੜੇ ਦਿਲਚਸਪ ਕਿੱਸੇ ਨੂੰ ਉਥੇ ਮੌਜੂਦ ਸਾਰੇ ਲੋਕਾਂ ਨਾਲ ਸਾਂਝਾ ਕੀਤਾ। ਸ਼ੋਅ ਵਿੱਚ ਉਸ ਦੇ ਸਾਹਮਣੇ ਇੱਕ ਨੰਨ੍ਹੇ ਗਾਇਕ ਨੇ ਉਸ ਦੀ ਸੁਪਰਹਿੱਟ ਫਿਲਮ ‘1942 : ਏ ਲਵ ਸਟੋਰੀ’ ਦਾ ਗੀਤ ‘ਕੁਛ ਨਾ ਕਹੋ..’ ਗਾਇਆ ਤਾਂ ਅਨਿਲ ਨੇ ਦੱਸਿਆ ਕਿ ਇਸ ਗੀਤ ਦੀ ਸ਼ੂਟਿੰਗ ਦੌਰਾਨ ਕੁਝ ਅਜਿਹਾ ਹੋਇਆ ਸੀ ਕਿ ਉਸ ਬਾਰੇ ਸੋਚ ਕੇ ਉਸ ਨੂੰ ਅੱਜ ਵੀ ਹਾਸਾ ਆ ਜਾਂਦਾ ਹੈ।
ਇਹ ਰੋਮਾਂਟਿਕ ਗੀਤ ਅਨਿਲ ਅਤੇ ਮਨੀਸ਼ਾ ਕੋਇਰਾਲਾ 'ਤੇ ਫਿਲਮਾਇਆ ਗਿਆ ਸੀ। ਅਨਿਲ ਨੇ ਕਿਹਾ, ‘ਜਦੋਂ ਅਸੀਂ ਇਸ ਗੀਤ ਦੀ ਸ਼ੂਟਿੰਗ ਕਰ ਰਹੇ ਸੀ ਤਾਂ ਮੈਨੂੰ ਕਿਹਾ ਗਿਆ ਕਿ ਤੁਸੀਂ ਮਨੀਸ਼ਾ ਜੀ ਨੂੰ ਬਾਹਾਂ 'ਚ ਚੁੱਕ ਕੇ ਪੌੜੀਆਂ 'ਤੇ ਚੜ੍ਹਨਾ ਹੈ। ਮੈਨੂੰ ਲੱਗਾ ਕਿ ਇਹ ਆਸਾਨ ਹੋਵੇਗਾ, ਪਰ ਜਦੋਂ ਮੈਂ ਉਨ੍ਹਾਂ ਨੂੰ ਚੁੱਕਿਆ ਤਾਂ ਪਹਿਲਾ ਕਦਮ ਚੁੱਕਣ ਪਿੱਛੋਂ ਮੈਂ ਡਿੱਗ ਗਿਆ। ਮੈਂ ਮਨੀਸ਼ਾ ਨੂੰ ਕਿਹਾ ਕਿ ਤੁਸੀਂ ਇੰਨੇ ਪਤਲੇ ਦਿਸਦੇ ਹੋ, ਪਰ ਹੋ ਥੋੜ੍ਹੇ ਜਿਹੇ ਭਾਰੇ। ਇਸ ਉਤੇ ਉਨ੍ਹਾਂ ਨੇ ਕਿਹਾ ਕਿ ਕਿਉਂਕਿ ਮੈਂ ਨੇਪਾਲ ਤੋਂ ਹਾਂ, ਇਸ ਲਈ ਮੇਰੀਆਂ ਹੱਡੀਆਂ ਮਜ਼ਬੂਤ ਅਤੇ ਭਾਰੀਆਂ ਹਨ।’ ਆਪਣੀ ਗੱਲ ਜਾਰੀ ਰੱਖਦੇ ਹੋਏ ਅਨਿਲ ਨੇ ਕਿਹਾ, ‘ਉਸ ਨੂੰ ਚੁੱਕ ਕੇ ਮੈਂ ਮਰਦਾਨਗੀ ਦਿਖਾਉਣਾ ਚਾਹੁੰਦਾ ਸੀ, ਪਰ ਸਾਰਿਆਂ ਸਾਹਮਣੇ ਕਚਰਾ ਹੋ ਗਿਆ। ਮੈਂ ਇੱਕ ਵਾਰ ਫਿਰ ਉਸ ਨੂੰ ਚੁੱਕਣ ਦੀ ਕੋਸ਼ਿਸ਼ ਕੀਤੀ, ਪਰ ਮੇਰੇ ਲਈ ਇਹ ਬਹੁਤ ਮੁਸ਼ਕਲ ਸੀ।’