ਜਲੰਧਰ, 21 ਮਾਰਚ (ਪੋਸਟ ਬਿਊਰੋ)- ਸੀ ਆਈ ਏ ਸਟਾਫ ਦੀ ਪੁਲਸ ਨੇ ਦੀਵਾਲੀ ਤੋਂ ਪਹਿਲਾਂ ਥਾਣਾ ਰੈਣਕ ਬਾਜ਼ਾਰ ਦੀ ਏ ਸੀ ਮਾਰਕੀਟ 'ਚ ਲੁੱਟਣ ਆਏ ਨੌਜਵਾਨਾਂ ਅਤੇ ਜੂਆ ਖੇਡਣ ਵਾਲਿਆਂ ਦੇ ਵਿਵਾਦ ਵਿੱਚ ਚੱਲੀ ਗੋਲੀ ਦੇ ਮਾਮਲੇ 'ਚ ਲੋੜੀਂਦੇ ਦੋ ਨੌਜਵਾਨਾਂ ਨੂੰ ਗ੍ਰਿਫਤਾਰ ਕਰਕੇ ਰਿਵਾਲਵਰ ਤੇ ਕਾਰਤੂਸ ਬਰਾਮਦ ਕੀਤੇ ਹਨ।
ਇਸ ਸੰਬੰਧ ਵਿੱਚ ਡੀ ਸੀ ਪੀ ਗੁਰਮੀਤ ਸਿੰਘ ਨੇ ਦੱਸਿਆ ਕਿ ਦੋ ਨਵੰਬਰ 2018 ਨੂੰ ਥਾਣਾ-4 ਦੀ ਹੱਦ ਵਿਚਲੀ ਏ ਸੀ ਮਾਰਕੀਟ ਵਿੱਚ ਕੁਝ ਲੋਕ ਦੇਰ ਰਾਤ ਜੂਆ ਖੇਡ ਰਹੇ ਸਨ ਕਿ ਲੁੱਟਣ ਆਏ ਕੁਝ ਨੌਜਵਾਨਾਂ ਨਾਲ ਉਨ੍ਹਾਂ ਦੀ ਲੜਾਈ ਹੋ ਗਈ ਤੇ ਗੋਲੀ ਚੱਲ ਗਈ। ਇਕ ਗੋਲੀ ਜੂਆ ਲੁੱਟਣ ਆਏ ਨੌਜਵਾਨਾਂ ਦੇ ਸਾਥੀ ਨੂੰ ਲੱਗੀ ਅਤੇ ਜੂਆ ਖੇਡਣ ਵਾਲਿਆਂ ਦਾ ਇਕ ਸਾਥੀ ਭੱਜਦਾ ਹੋਇਆ ਆਪਣੀ ਲੱਤ ਤੁੜਵਾ ਬੈਠਾ ਸੀ। ਪੁਲਸ ਵੱਲੋਂ ਦੋਵਾਂ ਧਿਰਾਂ ਦੇ 16 ਨੌਜਵਾਨਾਂ ਖਿਲਾਫ ਕੇਸ ਦਰਜ ਕਰ ਕੇ ਬਾਕੀਆਂ ਨੂੰ ਗ੍ਰਿਫਤਾਰ ਕਰ ਲਿਆ ਸੀ, ਪਰ ਵਿਵੇਕ ਮਹਾਜਨ ਤੇ ਰਿਸ਼ੂ ਹਾਲੇ ਪੁਲਸ ਦੇ ਹੱਥੇ ਨਹੀਂ ਚੜ੍ਹੇ ਸਨ। ਕੱਲ੍ਹ ਸੀ ਆਈ ਏ ਸਟਾਫ ਦੀ ਪੁਲਸ ਨੂੰ ਪਤਾ ਲੱਗਾ ਕਿ ਦੋਵੇਂ ਜਣੇ ਵਾਈ ਪੁਆਇੰਟ ਭਗਤ ਸਿੰਘ ਕਾਲੋਨੀ ਲਾਗੇ ਕਿਸੇ ਦੀ ਉਡੀਕ 'ਚ ਹਨ। ਪੁਲਸ ਨੇ ਛਾਪੇਮਾਰੀ ਕਰਕੇ ਦੋਵਾਂ ਨੂੰ ਗ੍ਰਿਫਤਾਰ ਕਰਕੇ ਵਿਵੇਕ ਮਹਾਜਨ ਕੋਲੋਂ ਰਿਵਾਲਵਰ ਤੇ ਪੰਜ ਕਾਰਤੂਸ ਬਰਾਮਦ ਕੀਤੇ ਅਤੇ ਦੋਵਾਂ ਨੂੰ ਅਦਾਲਤ 'ਚ ਪੇਸ਼ ਕੀਤਾ ਹੈ।