ਓਨਟਾਰੀਓ, 14 ਫਰਵਰੀ (ਪੋਸਟ ਬਿਊਰੋ) : ਓਨਟਾਰੀਓ ਵਿੱਚ ਗੈਸ ਦੀਆਂ ਕੀਮਤਾਂ ਵਿੱਚ ਥੋੜ੍ਹਾ ਹੋਰ ਵਾਧਾ ਹੋਣ ਜਾ ਰਿਹਾ ਹੈ।
Gasbuddy.com <https://www.gasbuddy.com/> ਉੱਤੇ ਸੀਨੀਅਰ ਪੈਟਰੋਲੀਅਮ ਵਿਸ਼ਲੇਸ਼ਕ ਡੈਨ ਮੈਕਟੀਗ ਦਾ ਕਹਿਣਾ ਹੈ ਕਿ ਅੱਜ ਅੱਧੀ ਰਾਤ ਤੋਂ ਗੈਸ ਦੀਆਂ ਕੀਮਤਾਂ ਵਿੱਚ ਪ੍ਰਤੀ ਲੀਟਰ ਪਿੱਛੇ 7 ਸੈਂਟ ਦਾ ਵਾਧਾ ਹੋਣ ਜਾ ਰਿਹਾ ਹੈ। ਇਨ੍ਹਾਂ ਕੀਮਤਾਂ ਵਿੱਚ ਇਹ ਉਛਾਲ ਰਿਫਾਈਨਰੀਜ਼ ਵੱਲੋਂ ਜਨਵਰੀ ਤੋਂ ਲੀਟਰ ਪਿੱਛੇ ਗੈਸੋਲੀਨ ਉੱਤੇ 6 ਸੈਂਟ ਦੀ ਛੋਟ ਦੇਣ ਦਾ ਹੀ ਨਤੀਜਾ ਹੈ।
ਦਸੰਬਰ ਤੇ ਜਨਵਰੀ ਵਿੱਚ ਉੱਤਰੀ ਅਮਰੀਕਾ ਵਿੱਚ ਗੈਸੋਲੀਨ ਦੀ ਭਰਮਾਰ ਰਹੀ ਤੇ ਹੁਣ ਲੱਗ ਰਿਹਾ ਹੈ ਕਿ ਉਸ ਦਾ ਅੰਤ ਹੋ ਗਿਆ ਹੈ। ਹੁਣ ਇੱਕ ਰਾਤ ਵਿੱਚ ਹੀ ਇਹ ਕੀਮਤਾਂ 7 ਸੈਂਟ ਤੱਕ ਵੱਧ ਜਾਣਗੀਆਂ। ਮਾਂਟਰੀਅਲ ਵਿੱਚ ਵੀ ਹੋਲਸੇਲ ਕੀਮਤਾਂ ਵਿੱਚ 4 ਸੈਂਟ ਦਾ ਇਜਾਫਾ ਹੋ ਸਕਦਾ ਹੈ।
ਵੀਰਵਾਰ ਸਵੇਰੇ ਗੈਸ ਸਟੇਸ਼ਨਾਂ ਨੂੰ ਇਹ ਨੋਟਿਸ ਦਿੱਤਾ ਗਿਆ ਸੀ ਕਿ ਓਨਟਾਰੀਓ ਵਿੱਚ ਉਨ੍ਹਾਂ ਦੀਆਂ ਹੋਲਸੇਲ ਕੀਮਤਾਂ ਵਿੱਚ ਲੀਟਰ ਪਿੱਛੇ 6.2 ਸੈਂਟ ਦਾ ਵਾਧਾ ਹੋ ਸਕਦਾ ਹੈ। ਇਸ ਤੋਂ ਇਲਾਵਾ ਇੱਥੇ ਇਹ ਦੱਸਣਾ ਵੀ ਬਣਦਾ ਹੈ ਕਿ ਅਪਰੈਲ ਤੋਂ ਕਾਰਬਨ ਟੈਕਸ ਕਾਰਨ ਨਿਊ ਬਰੰਜ਼ਵਿੱਕ ਵਿੱਚ ਪ੍ਰਤੀ ਲੀਟਰ ਪਿੱਛੇ 5 ਸੈਂਟ, ਓਨਟਾਰੀਓ ਵਿੱਚ 4.8 ਸੈਂਟ, ਮੈਨੀਟੋਬਾ ਤੇ ਸਸਕੈਚਵਨ ਵਿੱਚ 4.7 ਸੈਂਟ ਦਾ ਇਜਾਫਾ ਹੋਣ ਦੀ ਸੰਭਾਵਨਾ ਹੈ।