ਬੀਸੀ, 14 ਫਰਵਰੀ (ਪੋਸਟ ਬਿਊਰੋ) : ਬੀਸੀ ਦੇ ਇੱਕ ਉੱਘੇ ਚੀਫ ਵੱਲੋਂ ਇਹ ਪੇਸ਼ੀਨਿਗੋਈ ਕੀਤੀ ਜਾ ਰਹੀ ਹੈ ਕਿ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੱਲੋਂ ਸਾਬਕਾ ਅਟਾਰਨੀ ਜਨਰਲ ਜੋਡੀ ਵਿਲਸਨ ਰੇਅਬੋਲਡ ਨਾਲ ਕੀਤਾ ਜਾਣ ਵਾਲਾ ਮਾੜਾ ਸਲੂਕ ਉਨ੍ਹਾਂ ਨੂੰ ਮਹਿੰਗਾ ਪੈ ਸਕਦਾ ਹੈ। ਉਨ੍ਹਾਂ ਆਖਿਆ ਕਿ ਰੇਅਬੋਲਡ ਨਾਲ ਕੀਤੇ ਜਾਣ ਵਾਲੇ ਮਾੜੇ ਸਲੂਕ ਕਾਰਨ ਟਰੂਡੋ ਫਰਸਟ ਨੇਸ਼ਨ ਦੀਆਂ ਸਾਰੀਆਂ ਵੋਟਾਂ ਤੋਂ ਹੱਥ ਧੁਆ ਬੈਠਣਗੇ।
ਯੂਨੀਅਨ ਆਫ ਬੀਸੀ ਇੰਡੀਅਨ ਚੀਫਜ਼ (ਯੂਬੀਸੀਆਈਸੀ) ਦੇ ਵਾਈਸ ਪ੍ਰੈਜ਼ੀਡੈਂਟ ਬੌਬ ਚੈਂਬਰਲਿਨ ਨੇ ਵੀਰਵਾਰ ਨੂੰ ਇੱਕ ਇੰਟਰਵਿਊ ਵਿੱਚ ਆਖਿਆ ਕਿ ਦੇਸ਼ ਭਰ ਦੇ ਫਰਸਟ ਨੇਸ਼ਨ ਆਗੂ ਟਰੂਡੋ ਵੱਲੋਂ ਸਾਬਕਾ ਅਟਾਰਨੀ ਜਨਰਲ ਨਾਲ ਕੀਤੇ ਗਏ ਵਿਵਹਾਰ ਤੋਂ ਕਾਫੀ ਹੈਰਾਨ ਹਨ ਜਿਸ ਦੇ ਸਿੱਟੇ ਉਨ੍ਹਾਂ ਨੂੰ ਅਕਤੂਬਰ ਵਿੱਚ ਹੋਣ ਜਾ ਰਹੀਆਂ ਅਗਲੀਆਂ ਚੋਣਾਂ ਵਿੱਚ ਭੁਗਤਣੇ ਪੈ ਸਕਦੇ ਹਨ। ਜਿ਼ਕਰਯੋਗ ਹੈ ਕਿ ਚੈਂਬਰਲਿਨ ਦਾ ਇਹ ਬਿਆਨ ਯੂਬੀਸੀਆਈਸੀ ਵੱਲੋਂ ਜਾਰੀ ਕੀਤੇ ਗਏ ਉਸ ਖੁੱਲ੍ਹੇ ਖ਼ਤ ਤੋਂ ਦੋ ਦਿਨ ਬਾਅਦ ਆਇਆ ਹੈ ਜਿਸ ਵਿੱਚ ਜੋਡੀ ਵਿਲਸਨ ਰੇਅਬੋਲਡ ਨਾਲ ਵਿਤਕਰਾ ਤੇ ਲਿੰਗ ਦੇ ਅਧਾਰ ਉੱਤੇ ਫਰਕ ਕਰਨ ਦਾ ਦੋਸ਼ ਲਾਇਆ ਗਿਆ ਸੀ।
ਚੈਂਬਰਲਿਨ, ਜਿਨ੍ਹਾਂ ਆਖਿਆ ਕਿ ਉਹ ਲੰਮੇਂ ਸਮੇਂ ਤੋਂ ਐਨਡੀਪੀ ਵੋਟਰ ਹਨ, ਨੇ ਇਹ ਪੇਸ਼ੀਨਿਗੋਈ ਵੀ ਕੀਤੀ ਕਿ ਬਹੁਤੇ ਫਰਸਟ ਨੇਸ਼ਨਜ਼ ਆਰੇਂਜ, ਭਾਵ ਐਨਡੀਪੀ, ਨੂੰ ਵੋਟ ਪਾਉਣਗੇ। ਇਸ ਤਰ੍ਹਾਂ ਦੀਆਂ ਕਿਆਸਅਰਾਈਆਂ ਨਿਊ ਡੈਮੋਕ੍ਰੈਟਸ, ਜੋ ਕਿ ਆਪਣਾ ਆਧਾਰ ਮਜ਼ਬੂਤ ਕਰਨ ਲਈ ਸੰਘਰਸ਼ ਕਰ ਰਹੀ ਹੈ ਤੇ ਫੰਡਰੇਜਿ਼ੰਗ ਲਈ ਜੂਝ ਰਹੀ ਹੈ, ਲਈ ਖੁਸ਼ੀ ਵਾਲੀ ਖਬਰ ਹਨ।ਪਰ ਕੁੱਝ ਕੁ ਇੰਡੀਜੀਨਸ ਆਗੂਆਂ ਦਾ ਇਸ ਮਾਮਲੇ ਵਿੱਚ ਵੱਖਰਾ ਖਿਆਲ ਹੈ। ਮੁਰੇ ਸਿਨਕਲੇਅਰ ਸਮੇਤ ਕਈ ਇੰਡੀਜੀਨਸ ਸੈਨੇਟਰਜ਼ ਨੇ ਵੀਰਵਾਰ ਨੂੰ ਇੱਕ ਚਿੱਠੀ ਜਾਰੀ ਕਰਕੇ ਆਖਿਆ ਹੈ ਕਿ ਰੇਅਬੋਅਡ ਦੀ ਕੈਬਨਿਟ ਤੋਂ ਵਿਦਾਈ ਸੁਲ੍ਹਾ ਮਾਮਲੇ ਵਿੱਚ ਕੋਈ ਮਾਰੂ ਭੂਮਿਕਾ ਨਹੀਂ ਨਿਭਾਵੇਗੀ।