ਓਟਵਾ, 14 ਫਰਵਰੀ (ਪੋਸਟ ਬਿਊਰੋ) : ਪਬਲਿਕ ਹੈਲਥ ਏਜੰਸੀ ਆਫ ਕੈਨੇਡਾ ਦਾ ਕਹਿਣਾ ਹੈ ਕਿ ਟਿਜੂਆਨਾ, ਮੈਕਸਿਕੋ ਦੇ ਕਲੀਨਿਕ ਤੋਂ ਸਰਜਰੀ ਕਰਵਾਉਣ ਵਾਲੇ 30 ਦੇ ਲੱਗਭਗ ਕੈਨੇਡੀਅਨਾਂ ਨੂੰ ਖਤਰਨਾਕ ਇਨਫੈਕਸ਼ਨ ਹੋਣ ਦਾ ਖਤਰਾ ਹੈ।
ਪਰ ਏਜੰਸੀ ਇਸ ਬਾਰੇ ਪੂਰੀ ਤਰ੍ਹਾਂ ਯਕੀਨ ਨਾਲ ਕੁੱਝ ਨਹੀਂ ਆਖ ਸਕਦੀ। ਪਿਛਲੇ ਮਹੀਨੇ ਯੂਐਸ ਸੈਂਟਰਜ਼ ਫੌਰ ਡਜ਼ੀਜ਼ ਕੰਟਰੋਲ ਵੱਲੋਂ ਕੀਤੀ ਗਈ ਜਾਂਚ ਤੋਂ ਬਾਅਦ ਇਹ ਪਾਇਆ ਗਿਆ ਕਿ ਟਿਜੂਆਨਾ ਦੇ ਗ੍ਰੈਂਡ ਵਿਊ ਹਸਪਤਾਲ ਵਿੱਚ ਭਾਰ ਘੱਟ ਕਰਨ ਲਈ ਕਰਵਾਈ ਗਈ ਸਰਜਰੀ ਤੋਂ ਬਾਅਦ ਕੈਨੇਡੀਅਨਾਂ ਨੂੰ ਵੀ ਉਨ੍ਹਾਂ ਅਮਰੀਕੀ ਮਰੀਜ਼ਾਂ ਵਾਂਗ ਇਨਫੈਕਸ਼ਨ ਹੋ ਸਕਦੀ ਹੈ ਜਿਹੜੇ ਐਂਟੀਬਾਇਓਟਿਕ ਨੂੰ ਵੀ ਜਰ ਲੈਣ ਵਾਲੇ ਬੈਕਟੀਰੀਆ ਦਾ ਸਿ਼ਕਾਰ ਹੋਣ ਮਗਰੋਂ ਇਨਫੈਕਸ਼ਨ ਨਾਲ ਗ੍ਰਸਤ ਹੋਏ ਸਨ। ਟਿਜੂਆਨਾ ਅਮਰੀਕੀ ਸਰਹੱਦ ਦੇ ਐਨ ਨੇੜੇ, ਸੈਨ ਡਿਏਗੋ ਦੇ ਕੋਲ ਹੈ।
ਕੈਨੇਡਾ ਦੇ ਡਿਪਟੀ ਚੀਫ ਪਬਲਿਕ ਹੈਲਥ ਆਫੀਸਰ ਡਾ. ਹੌਵਰਡ ਨਜੂ ਨੇ ਆਖਿਆ ਕਿ ਹੋ ਸਕਦਾ ਹੈ ਕਿ ਸਾਨੂੰ ਅਜਿਹੀ ਸਰਜਰੀ ਕਰਵਾਉਣ ਵਾਲੇ ਕੈਨੇਡੀਅਨਾਂ ਦੇ ਸਹੀ ਅੰਕੜੇ ਬਾਰੇ ਪਤਾ ਨਾ ਲੱਗ ਸਕੇ। ਅਸੀਂ ਤਾਂ ਇਹ ਯਕੀਨੀ ਬਣਾਉਣ ਦੀ ਕੋਸਿ਼ਸ਼ ਕਰ ਰਹੇ ਹਾਂ ਕਿ ਅਜਿਹੇ ਸਾਰੇ ਕੈਨੇਡੀਅਨਾਂ ਨੂੰ ਸੰਭਾਵੀ ਖਤਰੇ ਬਾਰੇ ਜਾਣੂ ਕਰਵਾ ਸਕੀਏ ਤਾਂ ਕਿ ਉਹ ਆਪਣਾ ਮੈਡੀਕਲ ਫੌਲੋ ਅੱਪ ਕਰਵਾ ਸਕਣ।
ਬੁੱਧਵਾਰ ਨੂੰ ਫੈਡਰਲ ਪਬਲਿਕ ਹੈਲਥ ਏਜੰਸੀ ਨੇ ਇੱਕ ਨੋਟਿਸ ਜਾਰੀ ਕਰਕੇ ਗ੍ਰੈਂਡ ਵਿਊ ਹਸਪਤਾਲ ਤੋਂ ਸਰਜਰੀ ਕਰਵਾਉਣ ਵਾਲੇ ਮਰੀਜ਼ਾਂ ਨੂੰ ਸਲਾਹ ਦਿੱਤੀ ਹੈ ਕਿ ਉਹ ਉਸ ਹਾਲਤ ਵਿੱਚ ਤੁਰੰਤ ਆਪਣੀ ਮੈਡੀਕਲ ਜਾਂਚ ਕਰਵਾਉਣ ਜੇ ਉਨ੍ਹਾਂ ਨੂੰ ਇਨਫੈਕਸ਼ਨ ਦੇ ਲੱਛਣ ਜਿਵੇਂ ਕਿ ਬੁਖਾਰ, ਲਾਲੀ, ਪਸ ਜਾਂ ਆਪਰੇਸ਼ਨ ਵਾਲੀ ਥਾਂ ਉੱਤੇ ਸੋਜਿ਼ਸ਼ ਨਜ਼ਰ ਆਉਂਦੀ ਹੈ। ਜਿਸ ਬੈਕਟੀਰੀਆ ਕਾਰਨ ਖਤਰਾ ਹੋ ਸਕਦਾ ਹੈ ਉਸ ਨੂੰ ਸੀਊਡੋਮੋਨਸ ਐਰੂਗਿਨੋਸਾ ਵਜੋਂ ਜਾਣਿਆ ਜਾਂਦਾ ਹੈ। ਇਹ ਮੈਡੀਕਲ ਸੈਟਿੰਗਜ਼ ਵਿੱਚ ਉਨ੍ਹਾਂ ਮਰੀਜ਼ਾਂ ਲਈ ਖਤਰਾ ਹੋ ਸਕਦਾ ਹੈ ਜਿਨ੍ਹਾਂ ਨੇ ਸਰਜਰੀ ਕਰਵਾਈ ਹੁੰਦੀ ਹੈ।