ਚੰਡੀਗੜ੍ਹ, 14 ਫਰਵਰੀ (ਪੋਸਟ ਬਿਊਰੋ)- ਮਰਹੂਮ ਐਮ ਐਸ ਰੰਧਾਵਾ ਵੱਲੋਂ ਲੋਕ ਸੰਗੀਤ ਲਈ ਅਜਾਇਬਘਰ ਬਣਾਏ ਜਾਣ ਦੇ ਸੁਪਨੇ ਨੂੰ ਠੋਕਰ ਮਾਰ ਕੇ ਪੰਜਾਬ ਆਰਟਸ ਕੌਂਸਲ ਦੀ ਪ੍ਰੋਗਰਾਮ ਡਾਇਰੈਕਟਰ ਗਾਇਕਾ ਸੁਖਮਿੰਦਰ ਕੌਰ (ਸੁੱਖੀ ਬਰਾੜ) ਨੇ ਕਈ ਕਲਾਕਾਰਾਂ ਦੀਆਂ ਯਾਦਾਂ ਸਮੋਈ ਬੈਠੇ ਹਾਲ ‘ਸੰਗੀਤਸ਼ਾਲਾ' ਨੂੰ ਦਫਤਰ ਬਣਾ ਲਿਆ ਹੈ।
ਜਾਣਕਾਰ ਸੂਤਰਾਂ ਮੁਤਾਬਕ ਸੁੱਖੀ ਬਰਾੜ ਚੰਡੀਗੜ੍ਹ ਦੇ ਪੰਜਾਬ ਕਲਾ ਭਵਨ ਦੇ ਪੰਜਾਬ ਆਰਟਸ ਕੌਂਸਲ 'ਚ ਬੀਤੇ ਸ਼ਨਿਚਰਵਾਰ ਆਈ ਅਤੇ ਸੰਗੀਤਸ਼ਾਲਾ, ਜੋ ਲੋਕ ਸਾਜ਼ਾਂ ਨਾਲ ਸਬੰਧਤ ਪੰਜਾਬ ਦਾ ਇਕੋ-ਇਕ ਅਜਾਇਬਘਰ ਹੈ, ਨੂੰ ਉਸ ਨੇ ਆਪਣਾ ਦਫਤਰ ਬਣਾ ਲਿਆ। ਸੁੱਖੀ ਬਰਾੜ ਨੇ ਅਗਾਊਂ ਪ੍ਰਵਾਨਗੀ ਲਏ ਬਗੈਰ ਆਪਣੇ ਇਸ ਦਫਤਰ ਦੇ ਲਈ ਕਰੀਬ 70,000 ਰੁਪਏ ਦਾ ਫਰਨੀਚਰ ਵੀ ਖਰੀਦ ਲਿਆ ਤੇ ਪ੍ਰੀਸ਼ਦ ਨੂੰ ਇਸ ਦੀ ਅਦਾਇਗੀ ਕਰਨ ਲਈ ਕਹਿ ਦਿੱਤਾ।
ਵਰਨਣ ਯੋਗ ਹੈ ਕਿ ਪੰਜਾਬ ਦੇ ਵਿਰਸੇ ਨਾਲ ਜੁੜੀਆਂ ਚੀਜ਼ਾਂ ਸਾਂਭਣ ਵਿੱਚ ਹਮੇਸ਼ਾ ਮੋਹਰੀ ਰਹੇ ਰੰਧਾਵਾ ਲਲਿਤ ਕਲਾਵਾਂ ਲਈ ਇਕ ਵਿਲੱਖਣ ਅਜਾਇਬਘਰ ਬਣਾਉਣ ਦੇ ਚਾਹਵਾਨ ਸਨ ਤੇ ਉਨ੍ਹਾਂ ਨੇ 1979 ਵਿੱਚ ਪੰਜਾਬ ਦੇ ਉਘੇ ਲੋਕ ਕਲਾਕਾਰਾਂ ਨਾਲ ਜੁੜੀਆਂ ਚੀਜ਼ਾਂ ਸਾਂਭਣੀਆਂ ਆਰੰਭ ਕੀਤੀਆਂ ਸਨ। ਇਨ੍ਹਾਂ ਵਸਤਾਂ ਵਿੱਚ ਸੁਰਿੰਦਰ ਕੌਰ ਦੇ ਘੁੰਗਰੂ, ਯਮਲਾ ਜੱਟ ਦੀ ਤੂੰਬੀ, ਅਮਰ ਸਿੰਘ ਸ਼ੌਂਕੀ ਦੇ ਢੱਡ ਅਤੇ ਸਾਰੰਗੀ, ਬੇਲੀ ਰਾਮ ਦੇ ਅਲਗੋਜ਼ੇ, ਗੁਰਦਾਸ ਮਾਨ ਦੀ ਡਫਲੀ ਸ਼ਾਮਲ ਹਨ। ਸੰਗੀਤਸ਼ਾਲਾ ਦੀਆਂ ਕੰਧਾਂ ਉੱਤੇ ਪੰਜਾਬ ਦੇ ਕਈ ਪ੍ਰਸਿੱਧ ਕਲਾਕਾਰਾਂ ਦੇ ਚਿੱਤਰ ਵੀ ਲੱਗੇ ਹੋਏ ਹਨ। ਪਤਾ ਲੱਗਾ ਹੈ ਕਿ ਇਨ੍ਹਾਂ ਵਸਤਾਂ ਨੂੰ ਗਾਇਕਾ ਦੇ ਦਫਤਰ ਲਈ ਪਾਸੇ ਕਰ ਦਿੱਤਾ ਗਿਆ ਹੈ, ਪਰ ਚਿੱਤਰ ਲੱਗੇ ਹੋਏ ਹਨ। ਸੰਗੀਤਸ਼ਾਲਾ ਦੇ ਹਾਲ ਦੇ ਬਾਹਰ ਬਰਾੜ ਦੇ ਨਾਂ ਦੀ ਤਖਤੀ ਲਟਕੀ ਹੋਈ ਹੈ।
ਪੰਜਾਬ ਸੰਗੀਤ ਨਾਟਕ ਅਕਾਦਮੀ ਦੇ ਮੁਖੀ ਤੇ ਕੌਂਸਲ ਦੇ ਕਾਰਜਕਾਰੀ ਮੈਂਬਰ ਰੰਗਮੰਚ ਨਾਲ ਜੁੜੇ ਨਾਟਕਕਾਰ ਕੇਵਲ ਧਾਲੀਵਾਲ ਨੇ ਗਾਇਕਾ ਦੇ ਇਸ ਕਦਮ ਨੂੰ ਮਹਾਨ ਸੰਗੀਤ ਹਸਤੀਆਂ ਦਾ ਨਿਰਾਦਰ ਕਰਾਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਸਤਿੰਦਰ ਸੱਤੀ ਦੇ ਕਾਰਜਕਾਲ ਵੇਲੇ ਵੀ ਸੰਗੀਤਸ਼ਾਲਾ ਨੂੰ ਲਾਇਬ੍ਰੇਰੀ ਬਣਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਸੀ ਤੇ ਰੋਸ ਪ੍ਰਗਟਾਉਣ 'ਤੇ ਇਸ ਫੈਸਲੇ ਨੂੰ ਵਾਪਸ ਲੈ ਲਿਆ ਗਿਆ ਸੀ। ਕੌਂਸਲ ਦੇ ਚੇਅਰਮੈਨ ਕਵੀ ਸੁਰਜੀਤ ਪਾਤਰ ਨੇ ਕਿਹਾ ਕਿ ਮਾਮਲਾ ਉਨ੍ਹਾਂ ਦੇ ਧਿਆਨ ਵਿੱਚ ਆਇਆ ਹੈ ਤੇ ਇਸ ਨੂੰ ਜਨਰਲ ਬਾਡੀ ਦੀ ਮੀਟਿੰਗ ਵਿੱਚ ਰੱਖਿਆ ਜਾਵੇਗਾ।