ਗੁਰਦਾਸਪੁਰ, 15 ਜਨਵਰੀ (ਪੋਸਟ ਬਿਊਰੋ)- ਐਤਵਾਰ ਸ਼ਾਮ ਜਦ ਲੋਕ ਆਪਣੇ ਘਰਾਂ ਵਿੱਚ ਲੋਹੜੀ ਮਨਾ ਰਹੇ ਸਨ ਤੇ ਭੁੱਗਾ ਸੇਕ ਰਹੇ ਸਨ ਤਾਂ ਥਾਣਾ ਕਾਹਨੂਵਾਨ ਦੇ ਪਿੰਡ ਸੱਲੋਪੁਰ ਵਿੱਚ ਕੁਝ ਲੋਕਾਂ ਨੇ ਪੰਚਾਇਤੀ ਚੋਣਾਂ ਦੀ ਰੰਜਿਸ਼ ਕੱਢਣ ਦੇ ਲਈ ਇੱਕ ਘਰ 'ਤੇ ਤੇਜ਼ਧਾਰ ਹਥਿਆਰਾਂ ਅਤੇ ਇੱਟਾਂ ਨਾਲ ਹਮਲਾ ਕਰ ਕੇ ਇੱਕ ਮਹਿਲਾ ਦੀ ਹੱਤਿਆ ਕਰ ਦਿੱਤੀ, ਜਦ ਕਿ ਹਮਲੇ ਵਿੱਚ ਮ੍ਰਿਤਕ ਦਾ ਭਤੀਜਾ ਜ਼ਖਮੀ ਹੋ ਗਿਆ। ਥਾਣਾ ਕਾਹਨੂਵਾਨ ਪੁਲਸ ਨੇ ਛੇ ਲੋਕਾਂ ਦੇ ਖਿਲਾਫ ਹੱਤਿਆ ਦਾ ਮਾਮਲਾ ਦਰਜ ਕੀਤਾ ਹੈ। ਸਾਰੇ ਦੋਸ਼ੀ ਫਰਾਰ ਹਨ।
ਪਿੰਡ ਸੱਲੋਪੁਰ ਦੇ ਚੌਕੀਦਾਰ ਪੰਡਿਤ ਤਰਸੇਮ ਸਿੰਘ ਨੇ ਦੱਸਿਆ ਕਿ ਚੋਣਾਂ ਦੌਰਾਨ ਪਿੰਡ ਵਿੱਚ ਦੋ ਉਮੀਦਵਾਰ ਖੜੇ ਸਨ। ਅਸੀਂ ਉਮੀਦਵਾਰ ਦੀਦਾਰ ਸਿੰਘ ਕਿਰਤੀ ਦਾ ਸਮਰਥਨ ਕਰਦੇ ਸੀ, ਸਾਡੇ ਗੁਆਂਢੀ ਮੁਖਤਿਆਰ ਸਿੰਘ ਦਾ ਪਰਵਾਰ ਦੂਸਰੇ ਉਮੀਦਵਾਰ ਦੇ ਨਾਲ ਸੀ। ਇਸੇ ਕਾਰਨ ਮੁਖਤਿਆਰ ਸਿੰਘ ਦਾ ਪਰਵਾਰ ਸਾਡੇ ਨਾਲ ਰੰਜਿਸ਼ ਰੱਖਦਾ ਸੀ। ਤਰਸੇਮ ਨੇ ਦੱਸਿਆ ਕਿ ਮੇਰਾ ਭਤੀਜਾ ਹੀਰਾ ਸਿੰਘ ਪੁੱਤਰ ਰਤਨ ਸਿੰਘ ਚੋਣਾਂ ਵਿੱਚ ਸਭ ਤੋਂ ਅੱਗੇ ਸੀ, ਜਿਸ ਕਾਰਨ ਉਕਤ ਲੋਕਾਂ ਨੇ ਹੀਰਾ ਸਿੰਘ ਦਾ ਕਤਲ ਕਰਨ ਦੀ ਯੋਜਨਾ ਬਣਾ ਰੱਖੀ ਸੀ। ਐਤਵਾਰ ਸਾਰਾ ਦਿਨ ਉਕਤ ਪਰਵਾਰ ਨੇ ਰੰਜਿਸ਼ ਦੇ ਤਹਿਤ ਹੀਰਾ ਨੂੰ ਕਤਲ ਕਰਨਾ ਚਾਹਿਆ, ਪ੍ਰੰਤੂ ਸ਼ਾਮ ਤੱਕ ਉਹ ਉਨ੍ਹਾਂ ਦੇ ਹੱਥ ਨਹੀਂ ਲੱਗਾ। ਦੇਰ ਸ਼ਾਮ ਜਦ ਅਸੀਂ ਸਭ ਘਰ ਬੈਠੇ ਸੀ ਤਾਂ ਮੁਖਤਿਆਰ ਸਿੰਘ ਦਾ ਬੇਟਾ ਹੀਰਾ ਨੂੰ ਬੁਲਾ ਆਪਣੇ ਘਰ ਸ਼ਰਾਬ ਪੀਣ ਲਈ ਲੈ ਗਿਆ। ਉਥੇ ਪਹਿਲਾਂ ਤੋਂ ਹੀ ਕੁਝ ਲੋਕ ਮੌਜੂਦ ਸਨ। ਹੀਰਾ ਦੇ ਉਥੇ ਪਹੁੰਚਦੇ ਸਾਰ ਉਨ੍ਹਾਂ ਨੇ ਹੀਰਾ ਨੂੰ ਕੁੱਟਣਾ ਸ਼ੁਰੂ ਕਰ ਦਿੱਤਾ। ਉਹ ਕਿਸੇ ਤਰ੍ਹਾਂ ਨਾਲ ਭੱਜ ਕੇ ਘਰ ਪਹੁੰਚਿਆ ਤਾਂ ਉਕਤ ਲੋਕਾਂ ਨੇ ਤੇਜ਼ਧਾਰ ਹਥਿਆਰਾਂ ਅਤੇ ਇੱਟਾਂ ਨਾਲ ਸਾਡੇ ਘਰ 'ਤੇ ਹਮਲੇ ਕਰ ਦਿੱਤਾ। ਇਸ ਦੌਰਾਨ ਮੇਰੀ ਪਤਨੀ ਮਨਜੀਤ ਕੌਰ ਜਦ ਦਰਵਾਜ਼ਾ ਬੰਦ ਕਰਨ ਲਈ ਅੱਗੇ ਹੋਈ ਤਾਂ ਦੋਸ਼ੀਆਂ ਨੇ ਉਸ ਦੇ ਸਿਰ 'ਤੇ ਇੱਟ ਮਾਰ ਦਿੱਤੀ, ਜਿਸ ਕਾਰਨ ਉਸ ਦੀ ਮੌਕੇ 'ਤੇ ਮੌਤ ਹੋ ਗਈ। ਉਥੇ ਹੀ ਹੀਰਾ ਸਿੰਘ ਨੂੰ ਵੀ ਸੱਟਾਂ ਲੱਗੀਆਂ ਹਨ, ਜਿਸ ਨੂੰ ਸਿਵਲ ਹਸਪਤਾਲ ਵਿੱਚ ਭਰਤੀ ਕਰਾਇਆ ਗਿਆ ਹੈ।