ਮੇਅ ਨੂੰ ਬੇਭਰੋਸਗੀ ਮਤੇ ਦਾ ਕਰਨਾ ਪਵੇਗਾ ਸਾਹਮਣਾ
ਲੰਡਨ, 15 ਜਨਵਰੀ (ਪੋਸਟ ਬਿਊਰੋ) : ਬ੍ਰਿਟਿਸ਼ ਨੀਤੀਘਾੜਿਆਂ ਨੇ ਪ੍ਰਧਾਨ ਮੰਤਰੀ ਥੈਰੇਸਾ ਮੇਅ ਵੱਲੋਂ ਯੂਰਪੀਅਨ ਯੂਨੀਅਨ ਨਾਲੋਂ ਤੋੜ ਵਿਛੋੜੇ ਲਈ ਲਿਆਂਦੀ ਡੀਲ ਨੂੰ ਮੂਲੋਂ ਨਕਾਰ ਦਿੱਤਾ। ਇਸ ਨਾਲ ਬ੍ਰੈਗਜਿ਼ਟ ਪ੍ਰਕਿਰਿਆ ਤਾਂ ਧਰੀ ਧਰਾਈ ਰਹਿ ਹੀ ਗਈ ਉਲਟਾ ਮੇਅ ਸਰਕਾਰ ਨੂੰ ਬੇਭਰੋਸਗੀ ਮਤੇ ਦਾ ਸਾਹਮਣਾ ਵੀ ਕਰਨਾ ਪੈ ਸਕਦਾ ਹੈ।
ਇਸ ਹਾਰ ਦੀਆਂ ਕਿਆਸਅਰਾਈਆਂ ਤਾਂ ਪਹਿਲਾਂ ਹੀ ਲਾਈਆਂ ਜਾ ਰਹੀਆਂ ਸਨ। ਪਰ ਜਿਸ ਪੱਧਰ ਉੱਤੇ ਮੇਅ ਨੂੰ ਹਾਰ ਮਿਲੀ ਉਸ ਨਾਲ ਉਨ੍ਹਾਂ ਦੀ ਕਮਜ਼ੋਰ ਲੀਡਰਸਿ਼ਪ ਨੂੰ ਨੁਕਸਾਨ ਪਹੁੰਚ ਸਕਦਾ ਹੈ। ਇਸ ਮੁੱਦੇ ਦੇ ਪੱਖ ਵਿੱਚ ਜਿੱਥੇ 202 ਵੋਟਾਂ ਪਈਆਂ ਉੱਥੇ ਹੀ ਇਸ ਦੇ ਖਿਲਾਫ 432 ਵੋਟਾਂ ਪਈਆਂ। ਇੱਥੇ ਦੱਸਣਾ ਬਣਦਾ ਹੈ ਕਿ ਬ੍ਰੈਗਜਿ਼ਟ ਡੀਲ ਨੂੰ ਸਿਰੇ ਚੜ੍ਹਾਉਣ ਲਈ ਮੇਅ ਨੇ ਇੱਕ ਪਾਸੇ ਆਪਣਾ ਸਿਆਸੀ ਕਰੀਅਰ ਦਾਅ ਉੱਤੇ ਲਾਇਆ ਤੇ ਦੂਜੇ ਪਾਸੇ ਦੋ ਸਾਲ ਗਾਲਣ ਦੇ ਬਾਵਜੂਦ ਉਨ੍ਹਾਂ ਦੇ ਹੱਥ ਕੁੱਝ ਨਹੀਂ ਲੱਗਿਆ। ਬ੍ਰਿਟੇਨ ਦੇ ਇਤਿਹਾਸ ਵਿੱਚ ਹਾਊਸ ਆਫ ਕਾਮਨਜ਼ ਵਿੱਚ ਸਰਕਾਰ ਨੂੰ ਮਿਲੀ ਇਹ ਵੱਡੀ ਹਾਰ ਹੈ।
ਸਪੀਕਰ ਜੌਹਨ ਬਰਕੋਅ ਨੇ ਇਸ ਸਬੰਧੀ ਨਤੀਜਿਆਂ ਦਾ ਐਲਾਨ ਕੀਤਾ। ਹੁਣ ਨੀਤੀਘਾੜੇ ਬੁੱਧਵਾਰ ਨੂੰ ਬੇਭਰੋਸਗੀ ਮਤੇ ਦੇ ਸਬੰਧ ਵਿੱਚ ਵੋਟ ਪਾਉਣਗੇ। ਜੇ ਸਰਕਾਰ ਹਾਰ ਜਾਂਦੀ ਹੈ ਤਾਂ ਨਤੀਜਿਆਂ ਨੂੰ ਪਲਟਾਉਣ ਲਈ ਉਨ੍ਹਾਂ ਕੋਲ 14 ਦਿਨ ਦਾ ਸਮਾਂ ਹੋਵੇਗਾ ਤੇ ਜਾਂ ਫਿਰ ਨੈਸ਼ਨਲ ਚੋਣਾਂ ਹੋਣਗੀਆਂ।
ਹਾਲਾਂਕਿ ਪਾਰਲੀਆਮੈਂਟ ਵਿੱਚ ਮੇਅ ਕੋਲ ਬਹੁਗਿਣਤੀ ਦਾ ਸਾਥ ਨਹੀਂ ਹੈ ਪਰ ਫਿਰ ਵੀ ਉਹ ਇਸ ਵੋਟ ਤੋਂ ਬਾਅਦ ਬਚ ਸਕਦੀ ਹੈ ਬਸ਼ਰਤੇ ਉਸ ਦੀ ਆਪਣੀ ਕੰਜ਼ਰਵੇਟਿਵ ਪਾਰਟੀ ਦੇ ਮੈਂਬਰ ਉਸ ਦੇ ਉਲਟ ਨਾ ਹੋਣ। ਇੱਥੇ ਦੱਸਣਾ ਬਣਦਾ ਹੈ ਕਿ ਨੌਰਦਰਨ ਆਇਰਲੈਂਡ ਡੈਮੋਕ੍ਰੈਟਿਕ ਯੂਨੀਅਨਿਸਟ ਪਾਰਟੀ ਨੇ ਸਪਸ਼ਟ ਕਰ ਦਿੱਤਾ ਹੈ ਕਿ ਉਹ ਮੇਅ ਦਾ ਸਾਥ ਦੇਣਗੇ।