-ਕੇਜਰੀਵਾਲ ਨੂੰ ਭੇਜੇ ਅਸਤੀਫੇ 'ਚ ਲਿਖੀ ਖਰੀ-ਖੋਟੀ
ਚੰਡੀਗੜ੍ਹ, 6 ਜਨਵਰੀ (ਪੋਸਟ ਬਿਊਰੋ)- ਆਮ ਆਦਮੀ ਪਾਰਟੀ 'ਚੋਂ ਸਸਪੈਂਡ ਭੁਲੱਥ ਦੇ ਵਿਧਾਇਕ ਸੁਖਪਾਲ ਸਿੰਘ ਖਹਿਰਾ ਨੇ ਪਾਰਟੀ ਦੀ ਮੁਢਲੀ ਮੈਂਬਰੀ ਤੋਂ ਅਸਤੀਫਾ ਦੇ ਦਿੱਤਾ ਹੈ। ਖਹਿਰਾ ਨੇ ਆਪਣਾ ਅਸਤੀਫਾ ਅਰਵਿੰਦ ਕੇਜਰੀਵਾਲ ਨੂੰ ਭੇਜਿਆ ਹੈ ਤੇ ਹਾਲ ਹੀ 'ਚ ਅਸਤੀਫਾ ਦੇਣ ਵਾਲੇ ਐਚ.ਐਸ. ਫੂਲਕਾ ਤੋਂ ਬਿਲਕੁਲ ਉਲਟ, ਖਹਿਰਾ ਨੇ ਲੰਬੇ ਚੌੜੇ ਲਿਖੇ ਅਸਤੀਫੇ 'ਚ ਖੂਬ ਖਰੀ - ਖੋਟੀ ਕਹੀ ਹੈ। ਖਹਿਰਾ ਨੇ ਅਸਤੀਫੇ 'ਚ ਕਿਹਾ ਹੈ ਕਿ ਜਿਸ ਸਮੇਂ ਦੇਸ਼ ਦੀਆਂ ਰਿਵਾਇਤੀ ਰਾਜਨੀਤਿਕ ਪਾਰਟੀਆਂ ਤੋਂ ਦੁਖੀ ਹੋ ਕੇ ਲੋਕਾਂ ਨੇ ਆਮ ਆਦਮੀ ਪਾਰਟੀ 'ਤੇ ਭਰੋਸਾ ਜਤਾਇਆ ਸੀ, ਉਸ ਵਕਤ ਉਮੀਦ ਉਠੀ ਸੀ ਕਿ ਇਹ ਪਾਰਟੀ ਦੇਸ਼ ਤੋਂ ਭ੍ਰਿਸ਼ਟਾਚਾਰ ਨੂੰ ਹਟਾਏਗੀ, ਇਸ ਤੋਂ ਪ੍ਰਭਾਵਿਤ ਹੋ ਕੇ ਉਨ੍ਹਾਂ ਨੇ ਵੀ ਹਜ਼ਾਰਾਂ ਪੰਜਾਬੀ ਐਨ.ਆਰ.ਆਈਜ਼ ਦੇ ਕਹਿਣ 'ਤੇ ਪਾਰਟੀ ਜੁਆਇਨ ਕੀਤੀ ਸੀ, ਲੇਕਿਨ ਕੁੱਝ ਸਮੇਂ 'ਚ ਹੀ ਇਹ ਸਪੱਸ਼ਟ ਹੋ ਗਿਆ ਹੈ ਕਿ ਇਥੇ ਵੀ ਰਿਵਾਇਤੀ ਪਾਰਟੀਆਂ ਦਾ ਹੀ ਕਲਚਰ ਹੈ। ਖਹਿਰਾ ਨੇ ਕਿਹਾ ਕਿ 2017 ਦੀਆਂ ਚੋਣਾਂਦੌਰਾਨ ਉਨ੍ਹਾਂ ਨੂੰ ਪੂਰੀ ਤਰ੍ਹਾਂ ਸਪੱਸ਼ਟ ਹੋ ਗਿਆ ਸੀ ਕਿ ਪਾਰਟੀ 'ਚ ਅੰਦਰਲਾ ਲੋਕਤੰਤਰ ਬਿਲਕੁਲ ਨਹੀਂ ਹੈ। ਟਿਕਟਾਂ ਲਈ ਪੈਸੇ ਦੇ ਲੈਣ-ਦੇਣ ਤੇ ਪੱਖਪਾਤ ਦੀਆਂ ਸ਼ਿਕਾਇਤਾਂ ਆਈਆਂ, ਲੇਕਿਨ ਕੇਜਰੀਵਾਲ ਕੋਲ ਉਨ੍ਹਾਂ ਨੂੰ ਸੁਣਨ ਦਾ ਸਮਾਂ ਨਹੀਂ ਸੀ, ਕਿਉਂਕਿ ਉਹ ਸਿਰਫ ਆਪਣੇ ਵਲੋਂ ਤਾਇਨਾਤ ਸੂਬੇਦਾਰਾਂ ਦੀ ਹੀ ਗੱਲ ਸੁਣਦੇ ਸਨ। ਜਿਸ ਦਾ ਖਾਮਿਆਜਾ 100 ਸੀਟਾਂ ਦਾ ਦਾਅਵਾ ਕਰਨ ਵਾਲੀ 'ਆਪ' ਸਿਰਫ 20 ਸੀਟਾਂ ਤੱਕ ਸਿਮਟਣ ਨਾਲ ਭਰਨਾ ਪਿਆ। ਅਰਵਿੰਦ ਕੇਜਰੀਵਾਲ ਵਲੋਂ ਅਕਾਲੀ ਨੇਤਾ ਬਿਕਰਮ ਸਿੰਘ ਮਜੀਠਿਆ ਤੋਂ ਮੁਆਫ਼ੀ ਮੰਗਣ ਦੇ ਫੈਸਲੇ ਨੂੰ ਕਾਇਅਰਤਾ ਕਰਾਰ ਦਿੰਦਿਆਂ ਖਹਿਰਾ ਨੇ ਕਿਹਾ ਕਿ ਅਜਿਹਾ ਕਰਕੇ ਆਪ ਸੁਪਰੀਮੋ ਨੇ ਆਪਣੇ ਦੋਹਰੇਪਨ ਦਾ ਪ੍ਰਦਰਸ਼ਨ ਕੀਤਾ ਸੀ ਤੇ ਇਹ ਪੰਜਾਬ ਦੇ ਦਰਿਆਈ ਪਾਣੀ ਦੇ ਹੱਕ 'ਤੇ ਵੀ ਉਹੋ ਜਿਹਾ ਹੀ ਦੋਗਲਾ ਰਿਹਾ।