ਓਨਟਾਰੀਓ, 20 ਜਨਵਰੀ (ਪੋਸਟ ਬਿਊਰੋ) : ਪ੍ਰੋਵਿੰਸ ਵਿੱਚ ਕੋਵਿਡ-19 ਪਾਬੰਦੀਆਂ ਨੂੰ ਹੌਲੀ ਹੌਲੀ ਹਟਾਉਣ ਲਈ ਓਨਟਾਰੀਓ ਨੇ 31 ਜਨਵਰੀ ਤੋਂ ਇੰਡੋਰ ਡਾਈਨਿੰਗ ਤੇ ਜਿੰਮਜ਼ ਨੂੰ ਮੁੜ ਖੋਲ੍ਹਣ ਤੇ ਇੱਕਠ ਦੀ ਲਿਮਿਟ ਵਧਾਉਣ ਦਾ ਐਲਾਨ ਕੀਤਾ ਹੈ।
ਵੀਰਵਾਰ ਨੂੰ ਪ੍ਰੀਮੀਅਰ ਡੱਗ ਫੋਰਡ ਨੇ ਆਖਿਆ ਕਿ ਸਾਨੂੰ ਇਹ ਵਿਸ਼ਵਾਸ ਹੈ ਕਿ ਮਾੜਾ ਸਮਾਂ ਹੁਣ ਬੀਤ ਚੁੱਕਿਆ ਹੈ ਤੇ ਅਸੀਂ ਬੜੀ ਅਹਿਤਿਆਤ ਨਾਲ ਪਬਲਿਕ ਹੈਲਥ ਮਾਪਦੰਡਾਂ ਨੂੰ ਸੁਖਾਲਾ ਕਰਨ ਜਾ ਰਹੇ ਹਾਂ। ਪ੍ਰੋਵਿੰਸ ਨੇ ਆਖਿਆ ਕਿ 31 ਜਨਵਰੀ ਤੋਂ ਸ਼ੁਰੂ ਹੋ ਕੇ ਸੋਸ਼ਲ ਇੱਕਠ ਦੀ ਸਮਰੱਥਾ ਇੰਡੋਰਜ਼ ਲਈ 10 ਤੇ ਆਊਟਡੋਰਜ਼ ਲਈ 25 ਕਰ ਦਿੱਤੀ ਜਾਵੇਗੀ। ਇੰਡੋਰ ਡਾਈਨਿੰਗ, ਜਿੰਮਜ਼, ਰੀਟੇਲਰਜ਼, ਸ਼ਾਪਿੰਗ ਮਾਲਜ਼ ਤੇ ਸਿਨੇਮਾਜ਼ 50 ਫੀ ਸਦੀ ਸਮਰੱਥਾ ਨਾਲ ਖੁੱਲ੍ਹਣਗੇ।
ਮਿਊਜ਼ੀਅਮ, ਗੈਲਰੀਜ਼, ਐਕੁਏਰੀਅਮ, ਜ਼ੂ, ਕੈਸੀਨੋ, ਬਿੰਗੋ ਹਾਲ ਤੇ ਹੋਰ ਗੇਮਿੰਗ ਅਸਟੈਬਲਿਸ਼ਮੈਂਟਸ ਵੀ ਮੁੜ ਖੁੱਲ੍ਹ ਸਕਦੀਆਂ ਹਨ।ਸਰਕਾਰ ਖੇਡ ਮੁਕਾਬਲਿਆਂ, ਕੰਸਰਟ ਵੈਨਿਊਜ਼ ਤੇ ਥਿਏਟਰਜ਼ ਨੂੰ 50 ਫੀ ਸਦੀ ਸਮਰੱਥਾ ਜਾਂ 500 ਲੋਕ, ਜੋ ਵੀ ਘੱਟ ਹੋਵੇ, ਨਾਲ ਖੋਲ੍ਹ ਸਕਦੀ ਹੈ। ਪਬਲਿਕ ਹੈਲਥ ਰੁਝਾਨਾਂ ਦੀ ਨਿਗਰਾਨੀ ਲਈ ਰੀਓਪਨਿੰਗ ਦਾ ਹਰ ਕਦਮ 21 ਦਿਨਾਂ ਦੇ ਵਕਫੇ ਉੱਤੇ ਅਮਲ ਵਿੱਚ ਲਿਆਂਦਾ ਜਾਵੇਗਾ।
ਇਸ ਦੌਰਾਨ ਫੋਰਡ ਨੇ ਆਖਿਆ ਕਿ ਅਸੀਂ ਫੂਕ ਫੂਕ ਕੇ ਕਦਮ ਰੱਖਣਾ ਚਾਹੁੰਦੇ ਹਾਂ ਤੇ ਦੁਬਾਰਾ ਅਜਿਹੇ ਹਾਲਾਤ ਨਹੀਂ ਬਣਨ ਦੇਣਾ ਚਾਹੁੰਦੇ ਜਿੱਥੇ ਸਾਨੂੰ ਇਸ ਸਥਿਤੀ ਵਿੱਚੋਂ ਮੁੜ ਲੰਘਣਾ ਹੋਵੇ। ਇਸ ਲਈ ਜੇ ਸਾਨੂੰ ਹਰ ਕਦਮ ਵਿੱਚ ਥੋੜ੍ਹਾ ਫਰਕ ਵੀ ਰੱਖਣਾ ਪਿਆ ਤਾਂ ਅਸੀਂ ਰੱਖਾਂਗੇ। 21 ਫਰਵਰੀ ਨੂੰ ਓਨਟਾਰੀਓ ਇੰਡੋਰ ਸੋਸ਼ਲ ਗੈਦਰਿੰਗ ਦੀ ਹੱਦ 25 ਵਿਅਕਤੀ ਅਤੇ ਆਊਟਡੋਰ ਦੀ ਹੱਦ 100 ਵਿਅਕਤੀ ਕਰੇਗਾ।
ਇਸ ਦੌਰਾਨ ਜਿਨ੍ਹਾਂ ਥਾਂਵਾਂ ਉੱਤੇ ਵੈਕਸੀਨੇਸ਼ਨ ਦੇ ਸਬੂਤ ਦੀ ਲੋੜ ਹੈ ਜਿਵੇਂ ਨਾਈਟਕਲੱਬਜ਼, ਵੈਡਿੰਗ ਰਿਸੈਪਸ਼ਨਜ਼, ਡਾਂਸ ਵਾਲੀਆਂ ਥਾਂਵਾਂ, ਬਾਥਹਾਊਸ ਤੇ ਸੈਕਸ ਕਲੱਬਜ਼ ਦੀ ਸਮਰੱਥਾ ਵੀ 25 ਫੀ ਸਦੀ ਕੀਤੀ ਜਾਵੇਗੀ। ਖੇਡ ਮੁਕਾਬਲਿਆਂ ਦੇ ਦਰਸ਼ਕਾਂ, ਕੰਸਰਟ ਵੈਨਿਊਜ਼ ਤੇ ਥਿਏਟਰਜ਼ ਦੀ ਸਮਰੱਥਾ 21 ਫਰਵਰੀ ਤੋਂ 50 ਫੀ ਸਦੀ ਕਰ ਦਿੱਤੀ ਜਾਵੇਗੀ। ਜਿਨ੍ਹਾਂ ਥਾਂਵਾਂ ਉੱਤੇ ਵੈਕਸੀਨੇਸ਼ਨ ਦੇ ਸਬੂਤ ਦੀ ਲੋੜ ਨਹੀਂ ਹੋਵੇਗੀ ਉੱਥੇ ਲੋਕਾਂ ਨੂੰ ਦੋ ਮੀਟਰ ਦੀ ਫਿਜ਼ੀਕਲ ਦੂਰੀ ਬਰਕਰਾਰ ਰੱਖਣੀ ਹੋਵੇਗੀ।
14 ਮਾਰਚ ਨੂੰ ਓਨਟਾਰੀਓ ਇੰਡੋਰ ਪਬਲਿਕ ਸੈਟਿ਼ੰਗਜ਼ ਤੋਂ ਕਪੈਸਿਟੀ ਲਿਮਿਟ ਹਟਾ ਲਵੇਗਾ ਪਰ ਵੈਕਸੀਨੇਸ਼ਨ ਦਾ ਸਬੂਤ ਜ਼ਰੂਰ ਵਿਖਾਉਣਾ ਹੋਵੇਗਾ।