ਓਨਟਾਰੀਓ, 20 ਜਨਵਰੀ (ਪੋਸਟ ਬਿਊਰੋ) : ਓਨਟਾਰੀਓ ਸਰਕਾਰ ਵੱਲੋਂ ਸਿਟੀ ਆਫ ਬਰੈਂਪਟਨ, ਮਿਸੀਸਾਗਾ ਅਤੇ ਪੀਲ ਵਿੱਚ ਪਬਲਿਕ ਟਰਾਂਜਿ਼ਟ ਸਰਵਿਸਿਜ਼ ਦੇ ਪਸਾਰ ਤੇ ਸੁਧਾਰ ਲਈ ਕ੍ਰਮਵਾਰ 15,625,839 ਡਾਲਰ, 18,932,146 ਡਾਲਰ ਅਤੇ 482,539 ਡਾਲਰ ਮੁਹੱਈਆ ਕਰਵਾਏ ਜਾ ਰਹੇ ਹਨ। ਇਹ ਫੰਡਿੰਗ ਪ੍ਰੋਵਿੰਸ ਦੇ ਗੈਸ ਟੈਕਸ ਪ੍ਰੋਗਰਾਮ ਦਾ ਹਿੱਸਾ ਹੈ, ਜਿਸ ਤਹਿਤ ਇਸ ਸਾਲ 375·6 ਮਿਲੀਅਨ ਡਾਲਰ 107 ਮਿਊਂਸਪੈਲਿਟੀਜ਼ ਨੂੰ ਦਿੱਤੇ ਜਾਣਗੇ, ਜੋ ਅੱਗੇ ਪਬਲਿਕ ਟਰਾਂਜਿ਼ਟ ਵਿੱਚ ਲਾਏ ਜਾਣਗੇ।
ਬਰੈਂਪਟਨ ਵੈਸਟ ਤੋਂ ਐਮਪੀਪੀ ਅਮਰਜੋਤ ਸੰਧੂ ਨੇ ਆਖਿਆ ਕਿ ਕੋਵਿਡ-19 ਦੌਰਾਨ ਸੰਘਰਸ਼ ਕਰ ਰਹੀਆਂ ਕਮਿਊਨਿਟੀਜ਼ ਲਈ ਸਰਵਿਸ ਦਾ ਪੱਧਰ ਮੇਨਟੇਨ ਕਰਨ ਵਾਸਤੇ ਸਾਡੀ ਸਰਕਾਰ ਜਾਣਦੀ ਹੈ ਕਿ ਪਬਲਿਕ ਟਰਾਂਜਿ਼ਟ ਸਿਸਟਮ ਵਧੇਰੇ ਅਹਿਮ ਹੈ। ਇਸ ਲਈ ਇਸ ਦਾ ਸਮਰਥਨ ਕਰਨਾ ਜ਼ਰੂਰੀ ਹੈ। ਉਨ੍ਹਾਂ ਆਖਿਆ ਕਿ ਇਸੇ ਲਈ ਇਸ ਸਾਲ ਪੰਪ ਉੱਤੇ ਘਟੀ ਸੇਲ ਵਾਸਤੇ ਅਸੀਂ ਗੈਸ ਟੈਕਸ ਫੰਡਿੰਗ ਵਿੱਚ ਸੱਭ ਤੋਂ ਉੱਪਰ ਹਾਂ।
ਇਸ ਦੌਰਾਨ ਮਿਸੀਸਾਗਾ-ਸਟਰੀਟਸਵਿੱਲ ਤੋਂ ਐਮਪੀਪੀ ਨੀਨਾ ਟਾਂਗਰੀ ਨੇ ਆਖਿਆ ਕਿ ਸਾਡੀ ਸਰਕਾਰ ਵੱਲੋਂ ਪਬਲਿਕ ਟਰਾਂਜਿ਼ਟ ਸਿਸਟਮਜ਼ ਦੀ ਅਹਿਮੀਅਤ ਨੂੰ ਧਿਆਨ ਵਿੱਚ ਰੱਖਦਿਆਂ ਸਾਡੀ ਕਮਿਊਨਿਟੀ ਨੂੰ ਦਰਪੇਸ਼ ਚੁਣੌਤੀਆਂ ਦਾ ਖਿਆਲ ਰੱਖਿਆ ਜਾ ਰਿਹਾ ਹੈ। ਇਸ ਗੈਸ ਟੈਕਸ ਪ੍ਰੋਗਰਾਮ ਤਹਿਤ ਸਿਟੀ ਆਫ ਮਿਸੀਸਾਗਾ ਨੂੰ 18 ਮਿਲੀਅਨ ਡਾਲਰ ਤੋਂ ਉੱਪਰ ਦੀ ਤੇ ਪੀਲ ਰੀਜਨ ਨੂੰ 400,000 ਡਾਲਰ ਤੋਂ ਵੱਧ ਦੀ ਫੰਡਿੰਗ ਮੁਹੱਈਆ ਕਰਵਾਈ ਜਾਵੇਗੀ। ਇਸ ਨਾਲ ਸਾਡੀ ਕਮਿਊਨਿਟੀ ਨੂੰ ਕਾਫੀ ਫਾਇਦਾ ਹੋਵੇਗਾ। ਇਸ ਨਾਲ ਮਿਊਂਸਪੈਲਿਟੀਜ਼ ਲੋਕਲ ਪਬਲਿਕ ਟਰਾਂਜਿ਼ਟ ਸਿਸਟਮਜ਼ ਦੀ ਮਦਦ ਕਰ ਸਕਣਗੀਆਂ ਤੇ ਰਾਈਡਰਸਿ਼ਪ ਵਿੱਚ ਵੀ ਵਾਧਾ ਹੋਵੇਗਾ।
ਪਿਛਲੇ ਸਾਲ ਦਰਾਨ ਪ੍ਰੋਵਿੰਸ ਵਿੱਚ ਕਿੰਨੇ ਲੀਟਰ ਗੈਸੋਲੀਨ ਵਿਕੀ ਇਸ ਉੱਤੇ ਗੈਸ ਟੈਕਸ ਪ੍ਰੋਗਰਾਮ ਲਈ ਫੰਡਿੰਗ ਨਿਰਭਰ ਕਰਦੀ ਹੈ। ਜਿਹੜੀਆਂ ਮਿਊਂਸਪੈਲਿਟੀਜ਼ ਆਪਣੀਆਂ ਕਮਿਊਨਿਟੀਜ਼ ਵਿੱਚ ਪਬਲਿਕ ਟਰਾਂਜਿ਼ਟ ਸਰਵਿਸਿਜ਼ ਦਾ ਸਮਰਥਨ ਕਰਦੀਆਂ ਹਨ ਉਨ੍ਹਾਂ ਨੂੰ ਪ੍ਰੋਵਿੰਸ਼ੀਅਲ ਗੈਸ ਟੈਕਸ ਆਮਦਨ ਦਾ ਦੋ ਸੈੱਟ ਪ੍ਰਤੀ ਲੀਟਰ ਪਿੱਛੇ ਹਿੱਸਾ ਮਿਲਦਾ ਹੈ। ਜਿਸ ਦੀ ਵਰਤੋਂ ਸਰਵਿਸ ਦੇ ਘੰਟੇ ਵਧਾਉਣ, ਟਰਾਂਜਿ਼ਟ ਗੱਡੀਆਂ ਖਰੀਦਣ, ਰੂਟ ਜੋੜਨ, ਪਹੁੰਚ ਵਿੱਚ ਸੁਧਾਰ ਕਰਨ ਜਾਂ ਬੁਨਿਆਦੀ ਢਾਂਚੇ ਨੂੰ ਅਪਗ੍ਰੇਡ ਕਰਨ ਲਈ ਕੀਤੀ ਜਾ ਸਕਦੀ ਹੈ।
ਕੋਵਿਡ-19 ਕਾਰਨ ਗੈਸ ਦੀ ਵਿੱਕਰੀ ਘਟਣ ਨਾਲ ਇਸ ਸਾਲ ਦੀ ਗੈਸ ਟੈਕਸ ਫੰਡਿੰਗ ਵਿੱਚ 120·4 ਮਿਲੀਅਨ ਡਾਲਰ ਦੀ ਵਾਧੂ ਫੰਡਿੰਗ ਸ਼ਾਮਲ ਕੀਤੀ ਗਈ ਹੈ ਤਾਂ ਕਿ ਮਿਊਂਸਪੈਲਿਟੀਜ਼ ਵੱਲੋਂ ਆਪਣੇ ਟਰਾਂਜਿ਼ਟ ਸਿਸਟਮਜ਼ ਦੀ ਮਦਦ ਕੀਤੀ ਜਾ ਸਕੇ। ਟਰਾਂਸਪੋਰਟੇਸ਼ਨ ਮੰਤਰੀ ਕੈਰੋਲੀਨ ਮਲਰੋਨੀ ਨੇ ਆਖਿਆ ਕਿ ਕੋਵਿਡ-19 ਮਹਾਂਮਾਰੀ ਦੌਰਾਨ ਅਸੀਂ ਵੇਖਿਆ ਹੈ ਕਿ ਫਰੰਟਲਾਈਨ ਵਰਕਰਜ਼ ਲਈ ਪਬਲਿਕ ਟਰਾਂਜਿ਼ਟ ਕਿੰਨੀ ਜ਼ਰੂਰੀ ਹੈ। ਇਸ ਤੋਂ ਇਲਾਵਾ ਇਨ੍ਹਾਂ ਸਰਵਿਸਿਜ਼ ਉੱਤੇ ਨਿਰਭਰ ਕਰਨ ਵਾਲੇ ਓਨਟਾਰੀਓ ਵਾਸੀਆਂ ਨੂੰ ਮੈਡੀਕਲ ਅਪੁਆਇੰਟਮੈਂਟਸ, ਗ੍ਰੌਸਰੀ ਸਟੋਰ ਤੇ ਹੋਰ ਅਹਿਮ ਲੋਕੇਸ਼ਨਾਂ ਉੱਤੇ ਜਾਣ ਲਈ ਓਨਟਾਰੀਓ ਵਾਸੀਆਂ ਨੂੰ ਇਨ੍ਹਾਂ ਸੇਵਾਵਾਂ ਦੀ ਕਿੰਨੀ ਲੋੜ ਹੈ ਅਸੀਂ ਇਹ ਵੀ ਸਮਝਦੇ ਹਾਂ।