ਰੋਹਤਕ, 6 ਦਸੰਬਰ (ਪੋਸਟ ਬਿਊਰੋ)- ਪੀ ਜੀ ਆਈ ਐਮ ਐਸ ਰੋਹਤਕ ਦੇ ਸਰਜਰੀ ਵਿਭਾਗ ਦੇ ਡਾਕਟਰ ਪਰਮੇਲ ਕੁਮਾਰ ਨੇ ਦੱਸਿਆ ਕਿ ਮੈਂ ਸਰਜਰੀ ਵਿਭਾਗ ਵਿੱਚ ਰਜਿਸਟਰਾਰ ਸਰਜਨ ਹਾਂ, ਮੈਂ ਦੇਖਿਆ ਹੈ ਕਿ ਫੌਜ ਵਿੱਚ ਵੀ ਫੌਜੀਆਂ ਨੂੰ ਇੱਕ-ਦੋ ਗੋਲੀ ਲੱਗਣ ਤਾਂ ਉਹ ਵੀ ਇੰਨੀ ਹਿੰਮਤ ਘੱਟ ਦਿਖਾਉਂਦੇ ਹਨ, ਜਿੰਨੀ 19 ਸਾਲ ਦੀ ਤਨਿਸ਼ਕਾ ਨੇ ਦਿਖਾਈ ਹੈ। ਇਹ ਮੇਰੇ ਜੀਵਨ ਦਾ ਪਹਿਲਾ ਅਜਿਹਾ ਕੇਸ ਹੈ, ਜਿਸ ਵਿੱਚ ਇੱਕ ਲੜਕੀ ਇੰਨੀ ਹਿੰਮਤ ਵਾਲੀ ਹੈ ਕਿ ਸਰੀਰ ਵਿੱਚ ਸੱਤ ਗੋਲੀਆਂ ਲੱਗਣ ਪਿੱਛੋਂ ਵੀ ਅੱਠ ਘੰਟੇ ਤਕ ਸਰਜਰੀ ਵਿੱਚ ਪੂਰਾ ਸਹਿਯੋਗ ਕਰਦੀ ਰਹੀ, ਕਿਉਂਕਿ ਸਰਜਰੀ ਦੌਰਾਨ ਮਰੀਜ਼ ਨੂੰ ਹੋਸ਼ ਵਿੱਚ ਰੱਖਣਾ ਜ਼ਰੂਰੀ ਸੀ। ਇਸ ਦੇ ਲਈ ਅਸੀਂ ਉਸ ਨਾਲ ਗੱਲ ਕਰਦੇ ਰਹੇ, ਤਾਂ ਕਿ ਉਹ ਹੋਸ਼ ਵਿੱਚ ਰਹਿ ਸਕੇ। ਤਨਿਸ਼ਕਾ ਸੱਤ ਗੋਲੀਆਂ ਲੱਗਣ ਦੇ ਬਾਅਦ ਵੀ ਸਾਡੇ ਨਾਲ ਗੱਲ ਕਰਦੀ ਰਹੀ। ਅਜਿਹੇ ਵਿੱਚ ਕਰੀਬ ਚਾਰ ਲੀਟਰ ਫਲੂਡ ਤੇ ਡਰੱਗਸ ਦਿੱਤੀ ਅਤੇ ਬੀ ਪੀ ਲੈਵਲ ਸੁਧਰਣ ਉੱਤੇ ਹੀ ਸਰਜਰੀ ਕੀਤੀ ਜਾ ਸਕੀ।
ਸਰਜਰੀ ਦੇ ਬਾਅਦ ਤੋਂ ਤਨਿਸ਼ਕਾ ਅਜੇ ਬੋਲਣ ਦੀ ਹਾਲਤ ਵਿੱਚ ਨਹੀਂ। ਸਰੀਰ ਵਿੱਚ ਜ਼ਖਮ ਤੇ ਦਰਦ ਨੂੰ ਸਹਿਣ ਕਰਦੇ ਹੋਏ ਉਸ ਨੇ ਦੱਸਿਆ ਕਿ ਕਿਵੇਂ ਉਸ ਨੂੰ ਬਦਮਾਸ਼ਾਂ ਨੇ ਕਾਫੀ ਪ੍ਰੇਸ਼ਾਨ ਕੀਤਾ ਹੋਇਆ ਸੀ। ਪੀ ਜੀ ਆਈ ਐਮ ਐਸ ਦੇ ਆਪਰੇਸ਼ਨ ਥੀਏਟਰ ਵਿੱਚ ਰਾਤ ਸਵਾ 12 ਵਜੇ ਤਨਿਸ਼ਕਾ ਭਰਤੀ ਹੋਈ ਸੀ। ਇਥੇ ਜਦ ਤਨਿਸ਼ਕਾ ਆਈ ਤਾਂ ਕਾਫੀ ਨਾਜ਼ੁਕ ਹਾਲਤ ਵਿੱਚ ਸੀ। ਪੇਟ ਦੀ ਥੈਲੀ ਵਿੱਚ ਅੱਗਿਓਂ ਅਤੇ ਪਿੱਛਿਓਂ ਇੱਕ ਗੋਲੀ ਨਿਕਲੀ ਹੋਈ ਹੈ। ਲੀਵਰ ਦਾ ਕਾਫੀ ਹਿੱਸਾ ਡੈਮੇਜ ਮਿਲਿਆ। ਹਾਰਟ ਦੇ ਨੇੜੇ ਡਾਇਫਰਾਮ ਵਿੱਚ ਤਿੰਨ ਛੇਕ ਮਿਲੇ। ਇੱਕ ਗੋਲੀ ਲੈਫਟ ਕਿਡਨੀ ਵਿੱਚ ਲੱਗੀ ਹੈ, ਉਥੇ ਖੂਨ ਦਾ ਗੋਲਾ ਬਣਿਆ ਹੈ। ਇੱਥੋਂ ਬਲੀਡਿੰਗ ਹੋ ਰਹੀ ਸੀ। ਇਸ ਨੂੰ ਸਰਜਰੀ ਕਰਕੇ ਰੋਕਿਆ ਗਿਆ। ਲੰਗਸ ਵਿੱਚ ਵੀ ਇੰਜਰੀ ਮਿਲੀ ਹੈ। ਸਰਜਰੀ ਦੇ ਬਾਅਦ ਸਿਟੀ ਸਕੈਨ ਕਰਵਾਉਣ ਉੱਤੇ ਪਤਾ ਲੱਗਾ ਕਿ ਸਾਹ ਤੇ ਖਾਣ ਵਾਲੀ ਨਾੜੀ ਦੇ ਨੇੜੇ ਵੀ ਇੱਕ ਗੋਲੀ ਲੱਗੀ ਹੈ।