ਸੋਨੀਪਤ, 6 ਦਸੰਬਰ (ਪੋਸਟ ਬਿਊਰੋ)- ਭਾਰਤ ਸਰਕਾਰ ਦੇ ਖਿਲਾਫ ਚੱਲਦੇ ਸੰਘਰਸ਼ ਦੌਰਾਨ ਕੁੰਡਲੀ-ਬਾਰਡਰ ਉੱਤੇ ਬੀਤੇ ਦਿਨ ਸੰਯੁਕਤ ਕਿਸਾਨ ਮੋਰਚੇ ਨੇ ਅੰਦੋਲਨ ਦੇ ਇੱਕ ਸਾਲ ਦਾ ਲੇਖਾ-ਜੋਖਾ ਪੇਸ਼ ਕੀਤਾ ਹੈ।
ਕਿਰਤੀ ਕਿਸਾਨ ਯੂਨੀਅਨ ਪੰਜਾਬ ਦੇ ਨੇਤਾ ਰਵਿੰਦਰ ਸਿੰਘ ਨੇ ਦੱਸਿਆ ਕਿ 29 ਨਵੰਬਰ 2021 ਤਕ ਮੋਰਚੇ ਨੂੰ ਦੇਸ਼-ਵਿਦੇਸ਼ ਤੋਂ ਛੇ ਕਰੋੜ 35 ਲੱਖ 83 ਹਜ਼ਾਰ 940 ਰੁਪਏ ਚੰਦਾ ਮਿਲਿਆ। ਸਭ ਤੋਂ ਵੱਧ ਚੰਦਾ ਐਨ ਆਰ ਆਈਜ਼ ਨੇ ਦਿੱਤਾ। ਪੰਜ ਕਰੋੜ 39 ਲੱਖ 83 ਹਜ਼ਾਰ 940 ਰੁਪਏ ਖਰਚ ਹੋਏ ਅਤੇ 96 ਲੱਖ ਬਚੇ ਹਨ। ਸਭ ਤੋਂ ਵੱਧ 81.47 ਲੱਖ ਰੁਪਏ ਸਟੇਜ, ਲਾਈਟ ਐਂਡ ਸਾਊਂਡ ਉੱਤੇ ਖਰਚ ਹੋਏ। ਪਾਣੀ ਉੱਤੇ 17.95 ਲੱਖ ਖਰਚ ਹੋਏ। ਉਨ੍ਹਾਂ ਕਿਹਾ ਕਿ ਅੰਦੋਲਨ ਜਲਦੀ ਖਤਮ ਨਾ ਹੋਇਆ ਤਾਂ ਹੋਰ ਪੈਸਿਆਂ ਦੀ ਲੋੜ ਪਵੇਗੀ।
ਇਸ ਦੌਰਾਨ ਡਾਕਟਰੀ ਉੱਤੇ 68,57,772 ਰੁਪਏ ਖਰਚ ਹੋਏ, ਪਾਣੀ ਉੱਤੇ 17,95,426 ਰੁਪਏ, ਤਿ੍ਰਪਾਲ, ਕੈਮਰੇ, ਵਾਕੀ-ਟਾਕੀ ਆਦਿ ਉੱਤੇ 38,37,307 ਰੁਪਏ, ਸਫਾਈ ਉੱਤੇ 32,80,450 ਰੁਪਏ, ਲੰਗਰਾਂ ਦੇ ਟੈਂਟ ਉੱਤੇ 51,00,000 ਰੁਪਏ, ਵਾਟਰ ਪਰੂਫ ਟੈਂਟ ਦੇ 19,28,000 ਰੁਪਏ, ਟਿਕਰੀ-ਕੁੰਡਲੀ ਬਾਰਡਰ ਉੱਤੇ 45,00,000 ਰੁਪਏ ਦਾ ਖਰਚ। ਆਈ ਟੀ ਸੈਲ ਉੱਤੇ 36,82,000 ਰੁਪਏ ਤੇ ਸਟੇਜ, ਲਾਈਟ, ਸਾਊਂਡ ਉੱਤੇ 81,47,000 ਰੁਪਏ ਖਰਚ ਹੋਏ ਹਨ। ਮੋਰਚੇ ਦੇ ਨੇਤਾ ਡਾਕਟਰ ਸਤਨਾਮ ਸਿੰਘ ਅਜਨਾਲਾ ਨੇ ਕਿਹਾ ਕਿ ਸਰਕਾਰ ਤੋਂ ਕਮੇਟੀ ਨੂੰ ਕੀ ਭਰੋਸਾ ਮਿਲਦਾ ਹੈ, ਇਸੇ ਤੋਂ ਅੰਦੋਲਨ ਦਾ ਭਵਿੱਖ ਤੈਅ ਹੋਵੇਗਾ।