ਮੁੰਬਈ, 27 ਨਵੰਬਰ (ਪੋਸਟ ਬਿਊਰੋ)- ਸਾਲ 2008 ਵਿੱਚ ਹੋਏ 26/11 ਅੱਤਵਾਦੀ ਹਮਲੇ ਵਿੱਚ ਮਹਾਰਾਸ਼ਟਰ ਦੇ ਓਦੋਂ ਦੇ ਦਹਿਸ਼ਤਗਰਦੀ ਵਿਰੋਧੀ ਸਕੁਆਡ(ਏ ਟੀ ਐਸ) ਦੇ ਚੀਫ ਹੇਮੰਤ ਕਰਕਰੇ ਓਦੋਂ ਪਾਕਿਸਤਾਨੀ ਅੱਤਵਾਦੀਆਂ ਹੱਥੋਂ ਮਾਰੇ ਗਏ ਸਨ। 13 ਸਾਲ ਬਾਅਦ ਉਨ੍ਹਾਂ ਦੀ ਬੇਟੀ ਜੁਈ ਕਰਕਰੇ ਨੇ ਹੇਮੰਤ ਦੀ ਬੁਲੇਟ ਪਰੂਫ ਜੈਕੇਟ ਬਾਰੇ ਸਵਾਲ ਖੜ੍ਹੇ ਕੀਤੇ ਹਨ ਕਿ ਉਹ ਜੈਕੇਟ ਉਸ ਦੇ ਬਾਅਦ ਕਿੱਥੇ ਗਈ ਹੈ।
ਜੁਈ ਕਰਕਰੇ ਨੇ ਕਿਹਾ, ‘‘ਤਰੀਕ 20 ਨਵੰਬਰ 2008 ਸਵੇਰੇ ਦਾ ਸਮਾਂ ਸੀ। ਹਾਲਚਾਲ ਜਾਣਨ ਲਈ ਮਾਂ ਦਾ ਫੋਨ ਆਇਆ। ਅਮਰੀਕਾ ਵਿੱਚ ਉਦੋ ਥੈਂਕਸ ਗਿਵਿੰਗ ਵੀਕ ਚੱਲ ਰਿਹਾ ਸੀ। ਮੈਂ ਮਾਂ ਨੂੰ ਦੱਸਿਆ ਕਿ ਸ਼ਿਕਾਗੋ ਵਿੱਚੋਂ ਮੇਰੀ ਨਨਾਣ ਆਈ ਹੈ, ਮੈਂ ਉਨ੍ਹਾਂ ਨੂੰ ਬੋਸਟਨ ਘੁਮਾਉਣ ਲਈ ਲੈ ਜਾ ਰਹੀ ਹਾਂ। ਇਸ ਪਿੱਛੋਂ ਅਸੀਂ ਘੁੰਮਣ ਨਿਕਲ ਗਏ। ਇਸੇ ਦੌਰਾਨ ਜਰਮਨੀ ਤੋਂ ਮੇਰੀ ਭੈਣ ਦਾ ਫ਼ੋਨ ਆਇਆ ਕਿ ਪਾਪਾ ਹੈਲਮੇਟ ਤੇ ਬੁਲੇਟ ਪਰੂਫ ਜੈਕੇਟ ਪਹਿਨ ਕੇ ਇੱਕ ਅੱਤਵਾਦੀ ਐਕਿਟੀਵਿਟੀ ਵਿੱਚ ਜਾ ਰਹੇ ਹਨ। ਮੈਂ ਇਸ ਗੰਭੀਰਤਾ ਨਾਲ ਨਹੀਂ ਲਿਆ। ਮੈਨੂੰ ਹਮੇਸ਼ਾ ਲੱਗਦਾ ਸੀ ਕਿ ਪਾਪਾ ਸੁਪਰ ਹੀਰੋ ਹਨ, ਉਨ੍ਹਾਂ ਨੂੰ ਕਦੀ ਕੁਝ ਨਹੀਂ ਹੋ ਸਕਦਾ, ਉਹ ਸਾਰਿਆਂ ਨੂੰ ਬਚਾ ਲੈਣਗੇ।ਘਰ ਆਉਂਦੇ ਸਾਰ ਮੈਂ ਟੀ ਵੀ ਆਨ ਕੀਤਾ। ਟੀ ਵੀ ਉੱਤੇ ਨਿਊਜ਼ ਫਲੈਸ਼ ਹੋ ਰਹੀ ਸੀ ਕਿ ਹੇਮੰਤ ਕਰਕਰੇ ਜ਼ਖ਼ਮੀ ਹੋਏ ਹਨ। ਮੈਂਨੂੰ ਲੱਗਾ ਕਿ ਬਹੁਤੀ ਸੀਰੀਅਸ ਗੱਲ ਨਹੀਂ। ਇੰਨੇ ਵਿੱਚ ਨਿਊਜ਼ ਫਲੈਸ਼ ਹੋਣ ਲੱਗੀ ਕਿ ਹੇਮੰਤ ਕਰਕਰੇ ਨਹੀਂ ਰਹੇ। ਮੈਨੂੰ ਇਸ ਉੱਤੇ ਯਕੀਨ ਨਹੀਂ ਹੋਇਆ। ਮੈਂ ਸੋਚ ਵੀ ਨਹੀਂ ਸਕਦੀ ਸੀ ਕਿ ਪਾਪਾ ਨਾਲ ਅਜਿਹਾ ਹਾਦਸਾ ਹੋ ਜਾਵੇਗਾ। ਉਦੋ ਮੇਰੇ ਪਤੀ ਦਾ ਫੋਨ ਆਇਆ ਕਿ ਮੈਂ ਘਰ ਆ ਰਿਹਾ ਹਾਂ। ਉਨ੍ਹਾਂ ਦੀ ਗੱਲ ਸੁਣ ਕੇ ਮੈਨੂੰ ਪਹਿਲੀ ਦਫਾ ਲੱਗਾ ਕਿ ਇਹ ਹੋ ਗਿਆ ਹੈ। ਮੇਰੀ ਭੈਣ ਦਾ ਮੈਸੇਜ ਆਇਆ ਕਿ ‘ਪਾਪਾ ਗੇਲੇ' (ਪਾਪਾ ਨਹੀਂ ਰਹੇ) ਮੈਂ ਇੱਕਦਮ ਸ਼ਾਕਡ ਸੀ। ਮਾਂ ਨੂੰ ਫ਼ੋਨ ਲਾਇਆ ਤਾਂ ਪਤਾ ਲੱਗਾ ਕਿ ਮਾਮਾ ਉਨ੍ਹਾਂ ਨੂੰ ਹਸਪਤਾਲ ਵਿੱਚ ਪਾਪਾ ਦੀ ਡੈਡ ਬਾਡੀ ਦਿਖਾਉਣ ਲੈ ਗਏ ਹਨ। ਅਸੀਂ ਉਸੇ ਦਿਨ ਭਾਰਤ ਆਉਣਾ ਚਾਹੁੰਦੇ ਸੀ, ਪਰ ਨਹੀਂ ਆ ਸਕੇ, ਏਅਰਪੋਰਟ ਉੱਤੇ ਰੈਡ ਅਲਰਟ ਸੀ। ਦੋ ਦਿਨ ਬਾਅਦ ਅਸੀਂ ਭਾਰਤ ਪੁੱਜੇ। ਪੋਸਟਮਾਰਟਮ ਦੇ ਸਮੇਂ ਦੀ ਲਿਸਟ ਵਿੱਚ ਕਾਫ਼ੀ ਸਾਮਾਨ ਸੀ, ਪਰ ਬੁਲੇਟ ਪਰੂਫ ਜੈਕੇਟ ਗਾਇਬ ਸੀ। ਮੈਂ ਸ਼ਾਕਡ ਸੀ ਕਿ ਇਹ ਕਿਦਾਂ ਹੋਇਆ। ਇਸ ਸਵਾਲ ਦੇ ਜਵਾਬ ਵਿੱਚ ਮਾਂ ਬੀਮਾਰ ਹੋ ਗਈ। ਬਹੁਤ ਲੋਕ ਘਰ ਆਉਂਦੇ ਅਤੇ ਬੋਲਦੇ ਸੀ ਕਿ ਅਸੀਂ ਕਰਕਰੇ ਪਰਵਾਰ ਦੇ ਨਾਲ ਹਾਂ। ਮੀਡੀਆ ਅਤੇ ਕੁਝ ਐਨ ਜੀ ਓ ਨੇ ਇਸ ਸਵਾਲ ਨੂੰ ਫਾਲੋ ਕੀਤਾ। ਮਾਂ ਅਤੇ ਅਸੀਂ ਜਾਣਨਾ ਚਾਹੁੰਦੇ ਸੀ ਕਿ ਆਖਰੀ ਬੁਲੇਟ ਪਰੂਫ ਜੈਕੇਟ ਕਿਥੇ ਗਈ?'' ਇਸ ਸਵਾਲ ਦਾ ਜਵਾਬ ਅਜੇ ਤੱਕ ਨਹੀਂ ਮਿਲ ਸਕਿਆ।