ਟੋਰਾਂਟੋ, 20 ਅਕਤੂਬਰ (ਪੋਸਟ ਬਿਊਰੋ) : ਦੋ ਸਾਲ ਦੇ ਅਰਸੇ ਦੌਰਾਨ 18 ਸਾਲ ਦੀ ਇੱਕ ਲੜਕੀ ਤੋਂ ਵੇਸ਼ਵਾਗਮਨੀ ਕਰਵਾਉਣ ਵਾਲੇ ਮਿਸੀਸਾਗਾ ਦੇ ਇੱਕ ਵਿਅਕਤੀ ਨੂੰ ਪੀਲ ਰੀਜਨਲ ਪੁਲਿਸ ਵੱਲੋਂ ਚਾਰਜ ਕੀਤਾ ਗਿਆ ਹੈ।
ਪੀਲ ਪੁਲਿਸ ਨੇ ਆਖਿਆ ਕਿ ਇਸ ਸਬੰਧ ਵਿੱਚ ਜਾਂਚ ਉਨ੍ਹਾਂ ਵੱਲੋਂ ਸਤੰਬਰ ਵਿੱਚ ਹੀ ਸ਼ੁਰੂ ਕਰ ਦਿੱਤੀ ਗਈ ਸੀ। ਪੁਲਿਸ ਅਨੁਸਾਰ ਮਸ਼ਕੂਕ ਨੇ ਅਗਸਤ 2017 ਤੇ ਮਾਰਚ 2019 ਦਰਮਿਆਨ ਇਸ ਲੜਕੀ ਤੋਂ ਜ਼ਬਰਦਸਤੀ ਵੇਸ਼ਵਾਗਮਨੀ ਕਰਵਾਈ ਤੇ ਉਸ ਤੋਂ ਆਪ ਆਰਥਿਕ ਲਾਹਾ ਲਿਆ।
ਪੁਲਿਸ ਨੇ ਮਿਸੀਸਾਗਾ ਤੋਂ 59 ਸਾਲਾ ਰੌਸ ਹੈਂਡਰਸਨ ਨੂੰ ਮਨੁੱਖੀ ਸਮਗਲਿੰਗ ਦੇ ਇੱਕ ਮਾਮਲੇ, ਸੈਕਸੁਅਲ ਸਰਵਿਸਿਜ਼ ਦੇ ਇੱਕ ਮਾਮਲੇ, ਦੂਜੇ ਵਿਅਕਤੀ ਨੂੰ ਜ਼ਬਰਦਸਤੀ ਨਿਯੰਤਰਣ ਵਿੱਚ ਰੱਖਣ ਦੇ ਇੱਕ ਮਾਮਲੇ ਤੇ ਜਿਨਸੀ ਹਮਲਾ ਕਰਨ ਤੇ ਹਮਲਾ ਕਰਨ ਦੇ ਇੱਕ ਇੱਕ ਮਾਮਲੇ ਦੇ ਸਬੰਧ ਵਿੱਚ ਚਾਰਜ ਕੀਤਾ ਹੈ। ਜਾਂਚਕਾਰਾਂ ਨੂੰ ਸ਼ੱਕ ਹੈ ਕਿ ਇਸ ਵਿਅਕਤੀ ਦਾ ਸਿ਼ਕਾਰ ਕਈ ਹੋਰ ਮਹਿਲਾਵਾਂ ਵੀ ਹੋਈਆਂ ਹੋ ਸਕਦੀਆਂ ਹਨ। ਇਸ ਸਬੰਧ ਵਿੱਚ ਜਾਣਕਾਰੀ ਰੱਖਣ ਵਾਲਿਆਂ ਨੂੰ ਪੁਲਿਸ ਨੇ ਸਾਹਮਣੇ ਆਉਣ ਦੀ ਅਪੀਲ ਕੀਤੀ ਹੈ।