ਕੋਲਕਾਤਾ, 18 ਅਕਤੂਬਰ (ਪੋਸਟ ਬਿਊਰੋ)- ਪੱਛਮੀ ਬੰਗਾਲ ਵਿੱਚ ਰਾਜ ਕਰਦੀ ਹੁਕਮਰਾਨ ਤਿ੍ਰਣਮੂਲ ਕਾਂਗਰਸ ਦੇ ਕਮਾਰਹਟੀ ਤੋਂ ਵਿਧਾਇਕ ਮਦਨ ਮਿੱਤਰਾ ਨੇ ਭੂ-ਮਾਫੀਆ ਵੱਲੋਂ ਉਨ੍ਹਾਂ ਦੇ ਹਲਕੇ ਵਿੱਚ ਖੇਡ ਮੈਦਾਨ ਦੀ ਜ਼ਮੀਨ ਉੱਤੇ ਕਬਜ਼ੇ ਦੀ ਕੋਸ਼ਿਸ਼ ਉੱਤੇ ਧਮਕੀ ਦਿੱਤੀ ਹੈ ਕਿ ਜੇ ਉਹ ਬਾਜ਼ ਨਾ ਆਏ ਤਾਂ ਉਹ ਉਨ੍ਹਾਂ ਦੇ ਹੱਥ ਵੱਢ ਦੇਵੇਗਾ। ਬਾਅਦ ਵਿੱਚ ਵਿਧਾਇਕ ਨੇ ਆਪਣੇ ਇਤਰਾਜ਼ਯੋਗ ਬਿਆਨ ਵਾਸਤੇ ਮੁਆਫੀ ਮੰਗ ਲਈ ਹੈ।
ਸਾਬਕਾ ਖੇਡ ਮੰਤਰੀ ਇਸ ਵਿਧਾਇਕ ਨੇ ਦਾਅਵਾ ਕੀਤਾ ਹੈ ਕਿ ਕੁਝ ਵਿਅਕਤੀ ਬੇਲਗੜ੍ਹੀਆ ਇਲਾਕੇ ਦੇ ਮੇਘਾਦ ਮੱਠ ਵਿੱਚ ਅਪਾਰਟਮੈਂਟ ਕੰਪਲੈਕਸ ਉਸਾਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਉਨ੍ਹਾਂ ਕਿਹਾ, ‘‘ਜਿਸ ਖੇਡ ਮੈਦਾਨ ਨੂੰ ਮੈਂ ਅਤੇ ਪਾਰਲੀਮੈਂਟ ਮੈਂਬਰ ਸੌਗਾਤਾ ਰਾਏ ਖੂਬਸੂਰਤ ਬਣਾਉਣ ਦੀ ਯੋਜਨਾ ਬਣਾ ਰਹੇ ਸੀ, ਉਸ ਉੱਤੇ ਕੁਝ ਅਪਰਾਧੀਆਂ ਵੱਲੋਂ ਗੈਰ ਕਾਨੂੰਨੀ ਉਸਾਰੀ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਸੀ। ਤਿੰਨ ਵਿਅਕਤੀਆਂ ਦਾ ਨਾਂਅ ਲਗਾਤਾਰ ਸਾਹਮਣੇ ਆ ਰਿਹਾ ਹੈ। ਉਹ ਮੇਰੀ ਨਜ਼ਰ ਹੇਠ ਹਨ ਅਤੇ ਮੈਂ ਉਨ੍ਹਾਂ ਖਿਲਾਫ ਕੇਸ ਦਰਜ ਕਰਵਾਵਾਂਗਾ ਅਤੇ ਮੈਂ ਮੈਦਾਨ ਨੂੰ ਬਚਾਉਣ ਲਈ ਜਨ ਅੰਦੋਲਨ ਵੀ ਸ਼ੁਰੂ ਕਰਾਂਗਾ।'' ਮਿੱਤਰਾ ਨੇ ਫੇਸਬੁਕ ਉੱਤੇ ਕਿਹਾ, ‘‘ਜੇ ਭੂ-ਮਾਫੀਆ ਸੋਚਦਾ ਹੈ ਕਿ ਉਹ ਉਨ੍ਹਾਂ ਨੂੰ ਧਮਕੀ ਜਾਂ ਖਰੀਦਣ ਦੀ ਕੋਸ਼ਿਸ਼ ਕਰ ਸਕਦਾ ਹੈ ਤਾਂ ਉਹ ਗਲਤ ਹਨ। ਜੇ ਉਨ੍ਹਾਂ ਮੈਦਾਨ ਉੱਤੇ ਇੱਕ ਉਂਗਲ ਵੀ ਰੱਖਣ ਦੀ ਕੋਸ਼ਿਸ਼ ਕੀਤੀ ਤਾਂ ਮੈਂ ਉਨ੍ਹਾਂ ਦੇ ਹੱਥ ਵੱਢ ਦੇਵਾਂਗਾ। ਲੋੜ ਪੈਣ ਉੱਤੇ ਮੈਂ ਮੁੱਖ ਮੰਤਰੀ ਮਮਤਾ ਬੈਨਰਜੀ ਕੋਲ ਜਾ ਕੇ ਉਨ੍ਹਾਂ ਵੱਲੋਂ ਪਾਰਟੀ ਦਾ ਨਾਂਅ ਖਰਾਬ ਕਰਨ ਦੀ ਸ਼ਿਕਾਇਤ ਵੀ ਕਰਾਂਗਾ।'' ਨਾਇਹਾਟੀ ਤੋਂ ਵਿਧਾਇਕ ਪਾਰਤਾ ਭੌਮਿਕ ਨੇ ਮਿੱਤਰਾ ਦੇ ਬਿਆਨ ਦੀ ਹਮਾਇਤ ਕੀਤੀ ਹੈ। ਕਮਾਰਹਡਟੀ ਤੋਂ ਸਾਬਕਾ ਵਿਧਾਇਕ ਮਾਨਸ ਮੁਖਰਜੀ ਨੇ ਵੀ ਖੇਡ ਮੈਦਾਨ ਕਾਇਮ ਰੱਖਣ ਲਈ ਸ਼ੁਰੂ ਕੀਤੇ ਜਾਣ ਵਾਲੇ ਅੰਦੋਲਨ ਵਿੱਚ ਮਿੱਤਰਾ ਨੂੰ ਹਮਾਇਤ ਦੇਣ ਦਾ ਐਲਾਨ ਕੀਤਾ ਹੈ।