ਟੋਰਾਂਟੋ, 13 ਅਕਤੂਬਰ (ਪੋਸਟ ਬਿਊਰੋ) : ਟੋਰਾਂਟੋ ਜ਼ੂ ਵੱਲੋਂ 12 ਸਾਲ ਤੇ ਇਸ ਤੋਂ ਵੱਧ ਉਮਰ ਦੇ ਸਾਰੇ ਵਿਜ਼ੀਟਰਜ਼ ਲਈ ਇਹ ਸ਼ਰਤ ਰੱਖੀ ਜਾ ਰਹੀ ਹੈ ਕਿ ਮਸ਼ਹੂਰ ਟੂਰਿਸਟ ਅਟਰੈਕਸ਼ਨ ਆਉਣ ਤੋਂ ਪਹਿਲਾਂ ਕੋਵਿਡ-19 ਖਿਲਾਫ ਪੂਰੀ ਵੈਕਸੀਨੇਸ਼ਨ ਕਰਵਾ ਕੇ ਹੀ ਆਉਣ।
ਇਸ ਨਵੀਂ ਨੀਤੀ, ਜਿਸ ਦਾ ਐਲਾਨ ਬੁੱਧਵਾਰ ਨੂੰ ਕੀਤਾ ਗਿਆ, ਤਹਿਤ ਮਹਿਮਾਨਾਂ, ਮੈਂਬਰਾਂ, ਬਿਜ਼ਨਸ ਪਾਰਟਨਰਜ਼ ਤੇ ਕਾਂਟਰੈਕਟਰਜ਼ ਨੂੰ ਜ਼ੂ ਵਿੱਚ ਦਾਖਲ ਹੋਣ ਤੋਂ ਪਹਿਲਾਂ ਆਪਣੇ ਪੂਰੀ ਤਰ੍ਹਾਂ ਵੈਕਸੀਨੇਟ ਹੋਣ ਦਾ ਸਬੂਤ ਦੇਣਾ ਹੋਵੇਗਾ। ਇੱਕ ਨਿਊਜ਼ ਰਲੀਜ਼ ਵਿੱਚ ਜ਼ੂ ਨੇ ਆਖਿਆ ਕਿ ਭਾਵੇਂ ਫੈਸਿਲਿਟੀਜ਼ ਕੋਲ ਲੋਕਾਂ ਦੇ ਮਨੋਰੰਜਨ ਲਈ ਕਈ ਆਊਟਡਰ ਸਪੇਸਿਜ਼ ਹਨ, ਕਈ ਇੰਡੋਰ ਸਪੇਸਿਜ਼ ਅਜਿਹੀਆਂ ਹਨ ਜਿੱਥੇ ਮਹਿਮਾਨ ਅਕਸਰ ਜਾਣਾ ਪਸੰਦ ਕਰਦੇ ਹਨ।
ਜੂ਼ ਨੇ ਆਖਿਆ ਕਿ ਉਨ੍ਹਾਂ ਨੂੰ ਆਪਣੇ ਮਹਿਮਾਨਾਂ, ਸਟਾਫ ਤੇ ਜਾਨਵਰਾਂ ਨੂੰ ਕੋਵਿਡ-19 ਤੋਂ ਬਚਾਉਣ ਲਈ ਹਰ ਤਰ੍ਹਾਂ ਦੀ ਅਹਿਤਿਆਤ ਵਰਤਣੀ ਹੋਵੇਗੀ। ਟੋਰਾਂਟੋ ਜ਼ੂ ਦੇ ਸੀਈਓ ਡੌਲਫ ਡੀਜੌਂਗ ਨੇ ਇੱਕ ਲਿਖਤੀ ਬਿਆਨ ਵਿੱਚ ਆਖਿਆ ਕਿ ਕਈ ਜਾਨਵਰ, ਜਿਵੇਂ ਕਿ ਗੁਰਿੱਲਾ, ਓਰੈਂਗੋਟੈਨ, ਚੀਤਾ ਤੇ ਸ਼ੇਰ ਆਦਿ ਵੀ ਕੋਵਿਡ-19 ਕਾਰਨ ਬਹੁਤ ਹੀ ਨਾਜ਼ੁਕ ਦੌਰ ਵਿੱਚੋਂ ਲੰਘ ਰਹੇ ਹਨ। ਸਾਨੂੰ ਉਨ੍ਹਾਂ ਦੀ ਹਿਫਾਜ਼ਤ ਵੀ ਕਰਨੀ ਹੋਵੇਗੀ। ਇਹ ਪਾਲਿਸੀ 25 ਅਕਤੂਬਰ ਤੋਂ ਲਾਗੂ ਹੋਵੇਗੀ।