ਕਪੂਰਥਲਾ, 4 ਅਗਸਤ (ਪੋਸਟ ਬਿਊਰੋ)- ਪੰਜਾਬ ਦੇ ਕਈ ਜ਼ਿਲ੍ਹਿਆਂ ਵਿੱਚ ਚਾਲੀ ਦੇ ਕਰੀਬ ਚੋਰੀ ਦੀਆਂ ਵਾਰਦਾਤਾਂ ਕਰ ਕੇ ਦਹਿਸ਼ਤ ਫੈਲਾ ਚੁੱਕੇ ਇੱਕ ਗੈਂਗ ਦੇ ਸੱਤ ਦੋਸ਼ੀਆਂ ਨੂੰ ਜ਼ਿਲ੍ਹਾ ਪੁਲਸ ਨੇ ਗ੍ਰਿਫਤਾਰ ਕੀਤਾ ਅਤੇ ਚੋਰੀ ਕੀਤਾ 145 ਲੀਟਰ ਟਰਾਂਸਫਾਰਮਰਾਂ ਦਾ ਤੇਲ, ਕਾਰ ਅਤੇ ਚਾਰ ਨਸ਼ੀਲੇ ਇੰਜੈਕਸ਼ਨ ਤੇ 14 ਸ਼ੀਸ਼ੀਆਂ ਫੜੀਆਂ ਹਨ।

ਐਸ ਐਸ ਪੀ ਹਰਕਮਲਪ੍ਰੀਤ ਸਿੰਘ ਖੱਖ ਨੇ ਦੱਸਿਆ ਕਿ ਜ਼ਿਲ੍ਹਾ ਕਪੂਰਥਲਾ ਵਿੱਚ ਪਾਵਰਕਾਮ ਅਤੇ ਸਥਾਨਕ ਲੋਕਾਂ ਤੋਂ ਟਰਾਂਸਫਾਰਮਰਾਂ ਵਿੱਚੋਂ ਤੇਲ ਚੋਰੀ ਦੇਕਾਰਨ ਬਿਜਲੀ ਸਪਲਾਈ ਵਿੱਚ ਰੁਕਾਵਟਾਂ ਦੀਆਂ ਲਗਾਤਾਰ ਸ਼ਿਕਾਇਤਾਂ ਮਿਲ ਰਹੀਆਂ ਸਨ। ਇਨ੍ਹਾਂ ਵਾਰਦਾਤਾਂ ਨੂੰ ਰੋਕਣ ਲਈ ਡੀ ਐਸ ਪੀ ਸੁਰਿੰਦਰ ਸਿੰਘ ਦੀ ਨਿਗਰਾਨੀ ਵਿੱਚ ਐਸ ਐਚ ਓ ਸਦਰ ਕਪੂਰਥਲਾ ਗੁਰਦਿਆਲ ਸਿੰਘ ਨੇ ਜਦ ਇਲਾਕੇ ਵਿੱਚ ਛਾਪੇਮਾਰੀ ਕੀਤੀ ਤਾਂ ਚੋਰੀ ਦੀ ਵਾਰਦਾਤ ਦੀ ਯੋਜਨਾ ਬਣਾ ਰਹੇ ਸੱਤ ਦੋਸ਼ੀਆਂ ਭਾਨ ਸਿੰਘ ਉਰਫ ਭਾਨਾ, ਸੁੱਖਾ ਉਰਫ ਕੱਟਾ ਵਾਸੀ ਸੁੰਦਰ ਨਗਰ, ਜਸਕਰਨ ਸਿੰਘ ਉਰਫ ਬੰਟੀ ਵਾਸੀ ਪ੍ਰੀਤ ਨਗਰ, ਦੀਪਕ ਕੁਮਾਰ ਹਰਮਨਜੋਤ ਸਿੰਘ ਪਿੰਡ ਰੱਤਾ ਨੌਂ ਆਬਾਦ, ਸਤਵਿੰਦਰ ਸਿੰਘ ਵਾਸੀ ਆਰ ਸੀ ਐਫ ਖੇਤਰ ਅਤੇ ਜਰਨੈਲ ਸਿੰਘ ਵਾਸੀ ਪਿੰਡ ਬਹੁਈ ਕਪੂਰਥਲਾ ਨੂੰ ਗ੍ਰਿਫਤਾਰ ਕਰ ਲਿਆ ਹੈ।