ਵੈਨਕੂਵਰ, 4 ਅਗਸਤ (ਪੋਸਟ ਬਿਊਰੋ) : ਬ੍ਰਿਟਿਸ਼ ਕੋਲੰਬੀਆ ਵਿੱਚ ਹਰ ਸੱਤਵੇਂ ਤੋਂ ਦਸਵੇਂ ਦਿਨ ਉੱਤੇ ਡੈਲਟਾ ਵੇਰੀਐਂਟ ਦੇ ਮਾਮਲੇ ਦੁੱਗਣੇ ਹੋ ਰਹੇ ਹਨ। ਇਹ ਖੁਲਾਸਾ ਮਾਹਿਰਾਂ ਵੱਲੋਂ ਕੀਤਾ ਗਿਆ ਹੈ।
ਯੂਨੀਵਰਸਿਟੀ ਆਫ ਬ੍ਰਿਟਿਸ਼ ਕੋਲੰਬੀਆ ਦੀ ਪੋ੍ਰਫੈਸਰ ਸਾਰਾਹ ਓਟੋ ਨੇ ਆਖਿਆ ਕਿ ਜਿਹੜਾ ਵੇਰੀਐਂਟ ਪਹਿਲਾਂ ਭਾਰਤ ਵਿੱਚ ਫੈਲਿਆ, ਉਸ ਨੇ ਯੂਨਾਈਟਿਡ ਕਿੰਗਡਮ ਵਿੱਚ ਪੈਦਾ ਹੋਏ ਵੇਰੀਐਂਟ ਨੂੰ ਵੀ ਪਿੱਛੇ ਛੱਡ ਦਿੱਤਾ ਹੈ। ਯੂਨੀਵਰਸਿਟੀ ਦੇ ਜ਼ੂਓਲੋਜੀ ਵਿਭਾਂਗ ਵਿੱਚ ਮਹਾਂਮਾਰੀ ਦੇ ਵਿਕਾਸ ਦੇ ਮੈਥੇਮੈਟੀਕਲ ਮਾਡਲਜ਼ ਦੀ ਮਾਹਿਰ ਓਟੋ ਨੇ ਦੱਸਿਆ ਕਿ ਪ੍ਰੋਵਿੰਸ ਵਿੱਚ ਇਸ ਸਮੇਂ ਡੈਲਟਾ ਵੇਰੀਐਂਟ ਸੱਭ ਤੋਂ ਜਿ਼ਆਦਾ ਆਮ ਹੋ ਚੁੱਕਿਆ ਹੈ।ਐਲਫਾ ਦੇ ਮੁਕਾਬਲੇ ਹਰ ਹਫਤੇ ਇਸ ਦੇ ਮਾਮਲੇ ਦੁੱਗਣੇ ਹੋ ਗਏ ਹਨ।
ਡੈਲਟਾ ਵੇਰੀਐਂਟ ਨਾਲ ਵਾਇਰਲ ਦਾ ਬੋਝ ਹਜ਼ਾਰ ਗੁਣਾਂ ਵੱਧ ਗਿਆ ਹੈ ਤੇ ਇਹ ਅਸਾਨੀ ਨਾਲ ਫੈਲ ਸਕਦਾ ਹੈ। ਮੰਗਲਵਾਰ ਨੂੰ ਪ੍ਰੋਵਿੰਸ ਵਿੱਚ ਕੋਵਿਡ-19 ਦੇ 700 ਤੋਂ ਵੱਧ ਮਾਮਲੇ ਰਿਪੋਰਟ ਕੀਤੇ ਗਏ। ਇਹ ਚਾਰ ਦਿਨਾਂ ਦਾ ਅੰਕੜਾ ਸੀ। ਬੀ ਸੀ ਦੇ ਅੰਦਰੂਨੀ ਹਿੱਸੇ, ਜਿੱਥੇ ਵੈਕਸੀਨੇਸ਼ਨ ਦੀ ਦਰ ਕਾਫੀ ਘੱਟ ਹੈ ਉੱਥੋਂ ਨਾਲੋਂ ਇਹ ਮਾਮਲੇ ਅੱਧੇ ਤੋਂ ਵੀ ਘੱਟ ਸਨ।ਸਾਈਮਨ ਫਰੇਜ਼ਰ ਯੂਨੀਵਰਸਿਟੀ ਦੇ ਮੈਥੇਮੈਟਿਕਸ ਦੇ ਪ੍ਰੋਫੈਸਰ ਪਾਲ ਟੱਪਰ ਦਾ ਕਹਿਣਾ ਹੈ ਕਿ ਡੈਲਟਾ ਵੇਰੀਐਂਟ ਹੀ ਇਸ ਪ੍ਰੋਵਿੰਸ ਵਿੱਚ ਕੋਵਿਡ-19 ਮਾਮਲਿਆਂ ਵਿੱਚ ਹੋਏ ਇਜਾਫੇ ਦਾ ਮੁੱਖ ਕਾਰਨ ਹੈ।
ਉਨ੍ਹਾਂ ਆਖਿਆ ਕਿ ਪਾਬੰਦੀਆਂ ਵਿੱਚ ਢਿੱਲ ਦੇਣ ਤੇ ਅਰਥਚਾਰੇ ਨੂੰ ਮੁੜ ਖੋਲ੍ਹਣ ਲਈ ਕੀਤੀਆਂ ਜਾ ਰਹੀਆਂ ਕੋਸਿ਼ਸ਼ਾਂ ਕਰਕੇ ਵੀ ਕੋਵਿਡ-19 ਦੇ ਮਾਮਲਿਆਂ ਵਿੱਚ ਵਾਧਾ ਹੋਇਆ ਹੈ।ਉਨ੍ਹਾਂ ਆਖਿਆ ਕਿ ਜੇ ਐਲਫਾ ਵੇਰੀਐਂਟ ਦੋ ਵਿਅਕਤੀਆਂ ਨੂੰ ਪ੍ਰਭਾਵਿਤ ਕਰਦਾ ਹੈ ਤਾਂ ਡੈਲਟਾ ਤਿੰਨ ਵਿਅਕਤੀਆਂ ਨੂੰ ਪ੍ਰਭਾਵਿਤ ਕਰਦਾ ਹੈ।ਇਹ ਮਾੜੀ ਖਬਰ ਹੈ।ਪਰ ਇਸ ਦੇ ਨਾਲ ਹੀ ਉਨ੍ਹਾਂ ਆਖਿਆ ਕਿ ਜਿਨ੍ਹਾਂ ਇਲਾਕਿਆਂ ਵਿੱਚ ਵੈਕਸੀਨੇਸ਼ਨ ਦੀ ਦਰ ਜਿ਼ਆਦਾ ਹੈ ਉੱਥੇ ਇਨਫੈਕਸ਼ਨ ਘੱਟ ਹੈ।