ਜਲੰਧਰ, 2 ਅਗਸਤ (ਪੋਸਟ ਬਿਊਰੋ)- ਇਸ ਸ਼ਹਿਰ ਦੇ ਰਸੀਲਾਨਗਰ ਦੇ ਵਸਨੀਕ ਸਾਬਕਾ ਫੌਜੀ ਨਾਇਕ ਹਰਪਾਲ ਸਿੰਘ ਨਾਲ 10 ਲੱਖ ਦੀ ਠੱਗੀ ਦਾ ਕੇਸ ਲੁਧਿਆਣਾ ਤੋਂ ਗ੍ਰਿਫਤਾਰ ਹੋਈ ਮਾਨਸਾ ਦੀ ਵਸਨੀਕ ਟਿਕਟਾਕ ਸਟਾਰ ਸੁਖਬੀਰ ਕੌਰ ਦੀ ਗ੍ਰਿਫਤਾਰੀ ਨਾਲ ਸੁਲਝ ਗਿਆ ਹੈ। ਜਲੰਧਰ ਦੇ ਥਾਣਾ ਪੰਜ ਦੀ ਪੁਲਸ ਸੁਖਬੀਰ ਉਰਫ ਸੁੱਖੀ ਨੂੰ ਬਠਿੰਡਾ ਜੇਲ੍ਹ ਤੋਂ ਪ੍ਰੋਡਕਸ਼ਨ ਵਾਰੰਟ ਉੱਤੇ ਲਿਆਈ ਤਾਂ ਉਸ ਦੀ ਜਾਂਚ ਵਿੱਚ ਹੋਏ ਖੁਲਾਸਿਆਂ ਦੇ ਕਾਰਨ ਫਿਰੋਜ਼ਪੁਰ ਵਿੱਚ ਰਹਿਣ ਵਾਲਾ ਡਾਕਟਰ ਰਾਜੀਵ ਮੈਨੀ ਵੀ ਇਸ ਕੇਸ ਵਿੱਚ ਗ੍ਰਿਫਤਾਰ ਕਰ ਲਿਆ ਗਿਆ।
ਮਿਲੀ ਜਾਣਕਾਰੀ ਅਨੁਸਾਰ ਹਰਪਾਲ ਸਿੰਘ ਨੇ 18 ਜੂਨ 2020 ਨੂੰ ਥਾਣਾ ਪੰਜ ਦੀ ਪੁਲਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਦੱਸਿਆ ਸੀ ਕਿ ਉਹ ਫੌਜ ਤੋਂ ਬਤੌਰ ਨਾਇਕ ਰਿਟਾਇਰ ਹੋਇਆ ਅਤੇ ਉਸ ਦੀ ਬੇਟੀ ਜਲੰਧਰ ਦੇ ਗੁਜਰਾਲ ਨਗਰ ਦੇ ਇੱਕ ਹਸਪਤਾਲ ਵਿੱਚ ਸਟਾਫ ਨਰਸ ਹੈ। ਉਸ ਦੀ ਬੇਟੀ ਨੂੰ ਹਸਪਤਾਲ ਵਿੱਚ ਡਾਕਟਰ ਰਾਜੀਵ ਮੈਣੀ ਮਿਲੇ ਤੇ ਕਿਹਾ ਕਿ ਉਹ ਲੋਕਾਂ ਨੂੰ ਵਿਦੇਸ਼ ਭੇਜਦੇ ਹਨ ਅਤੇ ਉਥੇ ਨੌਕਰੀ ਵੀ ਲਵਾਉਂਦੇ ਹਨ। ਹਰਪਾਲ ਸਿੰਘ ਨੇ ਦੱਸਿਆ ਕਿ ਡਾਕਟਰ ਨੇ ਇਹ ਵੀ ਕਿਹਾ ਸੀ ਕਿ ਮਾਨਸਾ ਵਿੱਚ ਰਹਿੰਦੀ ਉਸ ਦੀ ਇੱਕ ਜਾਣਕਾਰ ਸੁਖਬੀਰ ਕੌਰ ਸੁੱਖੀ ਬਹੁਤ ਵੱਡੀ ਟ੍ਰੈਵਲ ਏਜੰਟ ਹੈ। ਇਸ ਪਿੱਛੋਂ ਉਨ੍ਹਾਂ ਦੀ ਬੇਟੀ ਨੇ ਘਰ ਆ ਕੇ ਗੱਲ ਕੀਤੀ ਤਾਂ ਉਨ੍ਹਾਂ ਨੇ ਆਪਣੇ ਬੇਟੇ ਅਤੇ ਨੂੰਹ ਨੂੰ ਵਿਦੇਸ਼ ਭੇਜਣ ਦਾ ਫੈਸਲਾ ਕੀਤਾ। ਡਾਕਟਰ ਰਾਜੀਵ ਮੈਣੀ ਨੇ ਉਨ੍ਹਾਂ ਦੇ ਬੇਟੇ ਅਤੇ ਨੂੰਹ ਨੂੰ ਮਲੇਸ਼ੀਆ ਭੇਜਣ ਅਤੇ ਨੌਕਰੀ ਲਵਾਉਣ ਦੇ 10 ਲੱਖ ਰੁਪਏ ਲਏ। ਸ਼ਿਕਾਇਤ ਵਿੱਚ ਇਹ ਵੀ ਦੱਸਿਆ ਕਿ ਡਾਕਟਰ ਰਾਜੀਵ ਨੇ ਉਨ੍ਹਾਂ ਨੂੰ ਫਗਵਾੜਾ ਗੇਟ ਦੇ ਟ੍ਰੈਵਲ ਏਜੰਟ ਅਜੈ ਕੁਮਾਰ ਅਤੇ ਲੁਧਿਆਣਾ ਦੇ ਤੇਜਿੰਦਰ ਨਾਲ ਮਿਲਾਇਆ, ਇਹ ਪੈਸੇ ਉਨ੍ਹਾਂ ਸਭਨਾਂ ਦੀ ਮੀਟਿੰਗ ਵਿੱਚ ਦਿੱਤੇ ਸਨ।