* ਸਰਕਾਰ ਨੇ ਝੁਕ ਕੇ ਪੋਸਟਾਂ ਦਾ ਇਸ਼ਤਿਹਾਰ ਜਾਰੀ ਕੀਤਾ
ਪਟਿਆਲਾ, 2 ਅਗਸਤ (ਪੋਸਟ ਬਿਊਰੋ)- ਬੇਰੋਜ਼ਗਾਰ ਈ ਟੀ ਟੀ ਟੈਟ ਪਾਸ ਅਧਿਆਪਕਾਂ ਦਾ ਇਸ਼ਤਿਹਾਰ ਜਾਰੀ ਹੋਣ ਤੋਂ ਬਾਅਦ ਆਖਰ ਕੱਲ੍ਹ ਟਾਵਰ ਉੱਤੇ ਚੜ੍ਹੇ ਸੁਰਿੰਦਰਪਾਲ ਨੂੰ ਬੇਹੋਸ਼ੀ ਦੀ ਹਾਲਤ ਵਿੱਚ 135 ਦਿਨਾਂ ਪਿੱਛੋਂ ਹੇਠਾਂ ਉਤਾਰ ਲਿਆ ਗਿਆ। ਇਸ ਮੌਕੇ ਭਾਰੀ ਪੁਲਸ ਫੋਰਸ ਤਾਇਨਾਤ ਸੀ। ਰੱਸੀਆਂ ਨਾਲ ਬੰਨ੍ਹ ਕੇ ਹੇਠਾਂ ਉਤਾਰੇ ਗਏ ਸੁਰਿੰਦਰਪਾਲ ਨੂੰ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ, ਕਿਉਂਕਿ ਉਹ ਬਹੁਤ ਕਮਜ਼ੋਰ ਹੋ ਚੁੱਕਿਆ ਸੀ।
ਕੱਲ੍ਹ ਸਰਕਾਰ ਨੇ ਈ ਟੀ ਟੀ ਬੇਰੋਜ਼ਗਾਰ ਟੈਟ ਪਾਸ ਅਧਿਆਪਕਾਂ ਦੀਆਂ ਮੰਗਾਂ ਮੰਨ ਲਈਆਂ ਅਤੇ ਸੰਬੰਧਤ ਪੋਸਟਾਂ ਦਾ ਇਸ਼ਤਿਹਾਰ ਜਾਰੀ ਕਰ ਦਿੱਤਾ ਹੈ। ਬੇਰੋਜ਼ਗਾਰ ਅਧਿਆਪਕਾਂ ਨੇ ਕਿਹਾ ਕਿ ਉਹ ਪੱਕੇ ਰੋਜ਼ਗਾਰ ਦੀ ਮੰਗ ਕਰਦੇ ਸਨ, ਪਰ ਸਰਕਾਰ ਆਨਾਕਾਨੀ ਕਰ ਰਹੀ ਸੀ। ਕੱਲ੍ਹ ਸੁਰਿੰਦਰਪਾਲ ਨੂੰ ਟਾਵਰ ਤੋਂ ਉਤਾਰਨ ਲਈ ਪਟਿਆਲਾ ਪ੍ਰਸ਼ਾਸਨ ਤੇ ਪੁਲਸ ਅਧਿਕਾਰੀ ਅਤੇ ਪੰਜਾਬ ਦੇ ਹਜ਼ਾਰਾਂ ਬੇਰੋਜ਼ਗਾਰ ਈ ਟੀ ਟੀ ਟੈਟ ਪਾਸ ਅਧਿਆਪਕ ਵੀ ਮੌਜੂਦ ਸਨ।
ਜਾਅਲੀ ਆਧਾਰ ਕਾਰਡ ਬਣਾਉਣ ਵਾਲੇ ਗੈਂਗ ਦਾ ਪਰਦਾ ਫਾਸ਼
ਲੁਧਿਆਣਾ, 2 ਅਗਸਤ (ਪੋਸਟ ਬਿਊਰੋ)- ਕਰਾਈਮ ਬ੍ਰਾਂਚ ਲੁਧਿਆਣਾ ਦੀ ਟੀਮ ਨੇ ਇੱਕ ਅਜਿਹੇ ਗਿਰੋਹ ਦਾ ਪਰਦਾ ਫਾਸ਼ ਕੀਤਾ ਹੈ, ਜੋ ਆਧਾਰ ਕਾਰਡ ਬਣਵਾਉਣ ਅਤੇ ਉਨ੍ਹਾਂ ਦੀ ਸੋਧ ਕਰਨ ਲਈ ਜਾਅਲੀ ਸੈਂਟਰ ਚਲਾ ਕੇ ਉਥੇ ਆਧਾਰ ਕਾਰਡ ਬਣਾ ਰਿਹਾ ਸੀ। ਪੁਲਸ ਮੁਤਾਬਕ ਗ੍ਰਿਫਤਾਰ ਕੀਤੇ ਗਏ ਦੋਸ਼ੀਆਂ ਦੀ ਪਛਾਣ ਨਿਊ ਸੁਭਾਸ਼ ਨਗਰ ਦੇ ਵਾਸੀ ਰਾਜ ਕੁਮਾਰ ਉਰਫ ਰਾਜ, ਤਿਲਕ ਨਗਰ ਰਾਹੋਂ ਰੋਡ ਦੇ ਵਿਨੋਦ ਕੁਮਾਰ ਉਰਫ ਭੱਲਾ ਤੇ ਪਿੰਡ ਬਾਜੜਾ ਕਾਲੋਨੀ ਮੇਹਰਬਾਨ ਦੇ ਰਾਜ ਕੁਮਾਰ ਉਰਫ ਸੰਨੀ ਵਜੋਂ ਹੋਈ ਹੈ ਤੇ ਚੌਥਾ ਦੋਸ਼ੀ ਹਰਜਾਪ ਨਗਰ, ਮੁੰਡੀਆਂ ਕਲਾਂ ਕੁਲਦੀਪ ਕੁਮਾਰ ਸੀ, ਜਿਹੜਾ ਪੁਲਸ ਦੇ ਛਾਪੇ ਦੇ ਵਕਤ ਮੌਕਾ ਵੇਖ ਕੇ ਫਰਾਰ ਹੋ ਗਿਆ।
ਡੀ ਸੀ ਪੀ ਕਰਾਈਮ ਸਿਮਰਤਪਾਲ ਸਿੰਘ ਢੀਂਡਸਾ ਨੇ ਦੱਸਿਆ ਕਿ ਸਾਰੇ ਦੋਸ਼ੀ ਤਿਲਕ ਨਗਰ ਇਲਾਕੇ ਵਿੱਚ ਪੈਂਦੇ ਅਭੀ ਸਟੂਡੀਓ ਵਿੱਚ ਫਰਜ਼ੀ ਆਧਾਰ ਕਾਰਡ ਬਣਾਉਣ ਦਾ ਕਾਰੋਬਾਰ ਕਰਦੇ ਅਤੇ ਭੋਲੇ ਲੋਕਾਂ ਨੂੰ ਤੁਰੰਤ ਆਧਾਰ ਕਾਰਡ ਬਣਾਉਣ ਦਾ ਝਾਂਸਾ ਦੇ ਕੇ ਪੈਸੇ ਠੱਗਦੇ ਸਨ। ਸੂਚਨਾ ਤੋਂ ਬਾਅਦ ਪੁਲਸ ਨੇ ਅਭੀ ਸਟੂਡੀਓ ਵਿੱਚ ਛਾਪਾਮਾਰ ਕੇੇ ਮੁਲਜ਼ਮ ਰਾਜ ਕੁਮਾਰ ਸਨੀ ਨੂੰ ਗ੍ਰਿਫਤਾਰ ਕੀਤਾ ਹੈ ਅਤੇ ਚੌਥੇ ਦੋਸ਼ੀ ਕੁਲਦੀਪ ਕੁਮਾਰ ਦੀ ਤਲਾਸ਼ ਕਰ ਰਹੀ ਹੈ। ਕਰਾਈਮ ਬ੍ਰਾਂਚ ਦੀ ਟੀਮ ਨੇ ਮੌਕੇ ਤੋਂ ਤਿੰਨ ਲੈਪਟਾਪ, ਫਿੰਗਰ ਪ੍ਰਿੰਟ ਸਕੈਨਰ, ਮਸ਼ੀਨ, ਕਈ ਪ੍ਰਿੰਟਰ, ਵੱਖ-ਵੱਖ ਨਾਵਾਂ ਦੇ 16 ਆਧਾਰ ਕਾਰਡ, ਪੰਜ ਪੈਨ ਕਾਰਡ, ਪੰਜ ਵੋਟਰ ਕਾਰਡ, ਨੌਂ ਡੰਮੀ ਫਿੰਗਰ ਪ੍ਰਿੰਟ ਦੇ ਛਾਪੇ ਫੈਵੀਕੋਲ ਵਾਲੇ ਅਤੇ 36 ਸਰਟੀਫਿਕੇਟ ਆਧਾਰ ਕਾਰਡ ਲਈ ਭਰੇ ਹੋਏ ਫਾਰਮ ਬਰਾਮਦ ਕੀਤੇ ਹਨ।ਕਰਾਈਮ ਬ੍ਰਾਂਚ ਦੀ ਟੀਮ ਨੇ ਮੁਲਜ਼ਮਾਂ ਕੋਲੋਂ ਹਰੀਸ਼ ਪੁਸ਼ਕਰ ਨਾਂਅ ਦੇ ਕਿਸੇ ਫਰਜ਼ੀ ਐਮ ਐਲ ਏ ਦੀ ਫਰਜ਼ੀ ਮੋਹਰ ਵੀ ਬਰਾਮਦ ਕੀਤੀ ਹੈ। ਇਹ ਗੈਂਗ ਭੋਲੇ ਲੋਕਾਂ ਦੇ ਆਧਾਰ ਕਾਰਡ ਅਤੇ ਹੋਰ ਪਰੂਫ ਬਣਾਉਣ ਲਈ ਉਨ੍ਹਾਂ ਤੋਂ ਰਕਮ ਲੈਂਦਾ ਅਤੇ ਡਿਪਟੀ ਕਮਿਸ਼ਨਰ ਡੁਬਰੀ ਆਸਾਮ ਦੀ ਵੈਬਸਾਈਟ ਉੱਤੇ ਫਾਰਮ ਭਰ ਕੇ ਜਾਅਲੀ ਦਸਤਾਵੇਜ਼ ਬਣਾ ਕੇੇ ਦਸਤਾਵੇਜ਼ਾਂ ਉੱਤੇ ਫਰਜ਼ੀ ਐਮ ਐਲ ਏ ਹਰੀਸ਼ ਪੁਸ਼ਕਰ ਦੀ ਜਾਅਲੀ ਮੋਹਰ ਲਗਾ ਦਿੰਦੇ ਸਨ।ਪੁਲਸ ਮੁਤਾਬਕ ਇਹ ਆਈ ਡੀ ਅਸਾਮ ਦੇ ਡੁਬਰੀ ਇਲਾਕੇ ਲਈ ਬਣਾਈ ਗਈ ਸੀ, ਇਸ ਦੀ ਵਰਤੋਂਵੀ ਉਥੇ ਹੀ ਹੋਣੀ ਸੀ, ਪਰ ਮੁਲਜ਼ਮ ਗੈਰ ਕਾਨੂੰਨੀ ਤਰੀਕੇ ਨਾਲ ਰਾਹੋਂ ਰੋਡ ਦੇ ਤਿਲਕ ਨਗਰ ਵਿੱਚ ਕਰ ਰਹੇ ਸਨ।