ਖੰਨਾ, 2 ਅਗਸਤ (ਪੋਸਟ ਬਿਊਰੋ)- ਏਥੇ ਨੇੜੇ ਪਿੰਡ ਲਿਬੜਾ ਕੋਲ ਨੈਸ਼ਨਲ ਹਾਈਵੇ ਖੰਨਾ ਉੱਤੇਲੱਗੀ ਡਿਜੀਟਲ ਐਲ ਈ ਡੀ ਸਕਰੀਨ ਉੱਤੇ ਸ਼ਨੀਵਾਰ ਰਾਤ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਬਾਰੇ ਅਪਸ਼ਬਦ ਚੱਲਣ ਲੱਗ ਪਏ। ਇੱਕ ਢਾਬੇ ਵਾਲੇ ਨੇ ਇਹ ਸ਼ਬਦ ਦੇਖ ਕੇ ਪੁਲਸ ਨੂੰ ਦੱਸਿਆ ਤਾਂ ਪੁਲਸ ਨੇ ਓਥੇ ਪਹੁੰਚ ਕੇ ਸਕਰੀਨ ਦਾ ਕੁਨੈਕਸ਼ਨ ਕੱਟ ਦਿੱਤਾ, ਪਰ ਇੱਸ ਬਾਰੇ ਕੋਈ ਕਾਨੂੰਨੀ ਕਾਰਵਾਈ ਅਮਲ ਵਿੱਚ ਨਹੀਂ ਲਿਆਂਦੀ ਗਈ।
ਮਿਲੀ ਜਾਣਕਾਰੀ ਅਨੁਸਾਰ ਐਲ ਈ ਡੀ ਸਕਰੀਨ ਨੂੰ ਠੀਕ ਕਰਨ ਦੇ ਬਹਾਨੇ ਇੱਕ ਛੋਟਾ ਹਾਥੀ ਗੱਡੀ ਦੋ ਦਿਨ ਪਹਿਲਾਂ ਇੱਥੇ ਆਈ ਸੀ, ਜਿਹੜੀ ਇੱਕ ਢਾਬੇ ਦੇ ਸੀ ਸੀ ਟੀ ਵੀ ਕੈਮਰੇ ਵਿੱਚ ਦਿਖਾਈ ਦੇਂਦੀ ਹੈ, ਪਰ ਉਸ ਦਾ ਨੰਬਰ ਨਹੀਂ ਦਿੱਸਦਾ। ਸ਼ੱਕ ਕੀਤਾ ਜਾਂਦਾ ਹੈ ਕਿ ਉਸ ਦੇ ਬਾਅਦ ਇਹ ਸੁਨੇਹਾ ਸਕਰੀਨ ਉੱਤੇ ਚੱਲਿਆ ਹੋਵੇਗਾ, ਪਰ ਇਸ ਉੱਤੇ ਨਜ਼ਰ ਸ਼ਨੀਵਾਰ ਦੀ ਰਾਤ ਨੂੰ ਪਈ। ਆਮ ਤੌਰ ਉੱਤੇ ਇਸ ਸਕਰੀਨ ਉੱਤੇ ਟਰੈਫਿਕ ਨਿਯਮਾਂ ਦੇ ਪਾਲਣ ਸਬੰਧੀ ਸੰਦੇਸ਼ ਹੀ ਚਲਾਏ ਜਾਂਦੇ ਹਨ। ਇਸ ਸਕਰੀਨ ਉੱਤੇ ਪਹਿਲਾਂ ਕੇਜਰੀਵਾਲ ਦੀ ਸਰਕਾਰ ਬਣਨ ਦਾ ਦਾਅਵਾ ਕੀਤਾ ਗਿਆ ਤੇ ਉਸ ਦੇ ਬਾਅਦ ਪੰਜਾਬ ਦੇ ਮੁੁੱਖ ਮੰਤਰੀ ਦੇ ਵਿਰੁੱਧ ਅਪਸ਼ਬਦ ਚਲਾਏ ਗਏ, ਜਿਸ ਕਰ ਕੇ ਸੱ਼ਕ ਕੀਤਾ ਜਾ ਰਿਹਾ ਹੈ ਕਿ ਇਹ ਹਰਕਤ ਇਲਾਕੇ ਦੇ ਆਮ ਆਦਮੀ ਪਾਰਟੀ ਦੇ ਵਰਕਰਾਂ ਵਿੱਚੋਂ ਕਿਸੇ ਦੀ ਹੋਵੇਗੀ ਜਾਂ ਫਿਰ ਧਿਆਨ ਭਟਕਾਉਣ ਲਈ ਮੁੱਖ ਮੰਤਰੀ ਨੂੰ ਅਪਸ਼ਬਦ ਦੇ ਨਾਲ ਆਮ ਆਦਮੀ ਪਾਰਟੀ ਦੇ ਸਮਰਥਨ ਦਾ ਮੈਟਰ ਲਿਖ ਦਿੱਤਾ ਹੋਵੇਗਾ। ਇਹ ਵੀ ਕਿਹਾ ਜਾ ਰਿਹਾ ਹੈ ਕਿ ਸ਼ਾਇਦ ਕਿਸੇ ਨੇ ਆਮ ਆਦਮੀ ਪਾਰਟੀ ਨੂੰ ਬਦਨਾਮ ਕਰਨ ਲਈ ਕੀਤਾ ਹੋਵੇ। ਥਾਣਾ ਸਦਰ ਖੰਨਾ ਦੇ ਐਸ ਐਚ ਓ ਸਰਬਜੀਤ ਸਿੰਘ ਨੇ ਕਿਹਾ ਕਿ ਇਹ ਕੋਈ ਵੱਡੀ ਗੱਲ ਨਹੀਂ, ਇਸ ਦਾ ਕੋਈ ਕੇਸ ਦਰਜ ਨਹੀਂ ਕੀਤਾ ਗਿਆ।
ਅਕਾਲੀ ਦਲ ਦੇ ਕੇਂਦਰੀ ਵਰਕਿੰਗ ਕਮੇਟੀ ਦੇ ਮੈਂਬਰ ਯਾਦਵਿੰਦਰ ਸਿੰਘ ਯਾਦੂ ਨੇ ਕਿਹਾ ਕਿ ਜੀ ਟੀ ਰੋਡ ਉੱਤਲੀ ਐਲ ਈ ਡੀਸਕਰੀਨ ਉੱਤੇ ਮੁੱਖ ਮੰਤਰੀ ਬਾਰੇ ਲਿਖੇ ਅਪਸ਼ਬਦ ਇਖਲਾਕ ਤੋਂ ਡਿੱਗੇ ਲੋਕਾਂ ਦਾ ਕੰਮ ਹੈ ਅਤੇ ਅਕਾਲੀ ਦਲ ਨਿੰਦਾ ਕਰਦਾ ਹੈ, ਇਹ ਸ਼ਰਾਰਤ ਕਰਨ ਵਾਲੇ ਦੀ ਜਾਂਚ ਹੋਣੀ ਚਾਹੀਦੀ ਹੈ।ਬਲਾਕ ਸੰਮਤੀ ਖੰਨਾ ਦੇ ਚੇਅਰਮੈਨ ਸਤਨਾਮ ਸਿੰਘ ਸੋਨੀ ਨੇ ਕਿਹਾ ਕਿ ਕਿਸੇ ਵੀ ਮੁੱਖ ਮੰਤਰੀ ਬਾਰੇ ਅਜਿਹੀ ਘਟੀਆ ਸ਼ਬਦਾਵਲੀ ਨਿੰਦਣਯੋਗ ਹੈ। ਕੁਝ ਲੋਕ ਘਟੀਆ ਰਾਜਨੀਤੀ ਕਰ ਕੇ ਪੰਜਾਬ ਦਾ ਮਾਹੌਲ ਖਰਾਬ ਕਰਨਾ ਚਾਹੁੰਦੇ ਹਨ। ਜੀ ਟੀ ਰੋਡ ਤੋਂ ਰੋਜ਼ਾਨਾ ਵੱਡੀ ਗਿਣਤੀ ਵਿੱਚ ਲੋਕ ਧੀਆਂ-ਭੈਣਾਂ ਦੇ ਨਾਲ ਲੰਘਦੇ ਹਨ। ਇਹ ਸ਼ਬਦ ਲਿਖਣੇ ਘਟੀਆ ਮਾਨਸਿਕਤਾ ਦਾ ਪ੍ਰਗਟਾਵਾ ਹੈ। ਆਮ ਆਦਮੀ ਪਾਰਟੀ ਦੇ ਸਾਬਕਾ ਹਲਕਾ ਇੰਚਾਰਜ ਅਨਿਲ ਦੱਤ ਫੱਲੀ ਨੇ ਕਿਹਾ ਕਿ ਇਹ ਬਹੁਤ ਨਿੰਦਣਯੋਗ ਕੰਮ ਕੀਤਾ ਗਿਆ ਹੈ। ਕੁਝ ਲੋਕ ਆਮ ਆਦਮੀ ਪਾਰਟੀ ਉੱਤੇ ਦੋਸ਼ ਲਾ ਰਹੇ ਹਨ,ਸਾਡੀ ਪਾਰਟੀ ਇਸ ਘਟੀਆ ਰਾਜਨੀਤੀ ਵਿੱਚ ਯਕੀਨ ਨਹੀਂ ਰੱਖਦੀ।