ਬੀਜਿੰਗ, 2 ਅਗਸਤ (ਪੋਸਟ ਬਿਊਰੋ)- ਚੀਨ ਦੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨੇ ਆਪਣੇ ਦੇਸ਼ ਦੀ ਫ਼ੌਜ (ਪੀ ਐਲ ਏ) ਨੂੰ ਚਿਤਾਵਨੀ ਦਿੱਤੀ ਹੈ ਕਿ ਉਹ ਅਫਗਾਨਿਸਤਾਨ ਵਿੱਚ ਤਾਲਿਬਾਨ ਰਾਜ ਕਾਰਨ ਸ਼ਿੰਜ਼ਿਆਂਗ ਵਿੱਚ ਉਈਗਰ ਬਾਗੀਆਂ ਵਿਰੁੱਧ ਸੰਘਰਸ਼ ਲਈ ਤਿਆਰ ਰਹੇ। ਉਨ੍ਹਾ ਨੇ ਪੀ ਐਲ ਏ ਨੂੰ ਚਿਤਾਵਨੀ ਦਿੱਤੀ ਹੈ ਕਿ ਉਹ ਅਫਗਾਨਿਸਤਾਨ ਦੇਸ਼ ਦੀ ਸਰਹੱਦ ਉੱਤੇ ਹਥਿਆਰਬੰਦ ਸੰਘਰਸ਼ ਅਤੇ ਸੁਰੱਖਿਆ ਚਿੰਤਾਵਾਂ ਬਾਰੇ ਤਿਆਰ ਰਹਿਣ।
ਸੰਵਿਧਾਨ ਮੁਤਾਬਕ ਚੀਨੀ ਫ਼ੌਜ ਦੇ ਸਰਬ ਉਚ ਕਮਾਂਡਰ ਜਿਨਪਿੰਗ ਨੇ ਪੀ ਐਲ ਏ ਦੀ ਲੀਡਰਸ਼ਿਪ ਨੂੰ ਕਿਹਾ ਕਿ ਉਹ ਕਮਿਊਨਿਸਟ ਪਾਰਟੀ ਪ੍ਰਤੀ ਆਪਣੀ ਇੱਕਜੁੱਟਤਾ ਨੂੰ ਹੋਰ ਵੱਧ ਮਜ਼ਬੂਤ ਕਰਨ। ਇਹੀ ਨਹੀਂ, ਉਨ੍ਹਾਂ ਨੇ ਸਾਲ 2027 ਤੱਕ ਚੀਨੀ ਫ਼ੌਜ ਨੂੰ ਅਮਰੀਕਾ ਦੀ ਟੱਕਰ ਦੀ ਫ਼ੌਜ ਬਣਾਉਣ ਦਾ ਵੀ ਸੱਦਾ ਦਿੱਤਾ। ਜਿਨਪਿੰਗ ਨੇ ਕੱਲ੍ਹ ਕਿਹਾ ਕਿ ਚੀਨ ਨੂੰ ‘ਫ਼ੌਜੀ ਸੰਘਰਸ਼' ਲਈ ਤਿਆਰ ਰਹਿਣਾ ਚਾਹੀਦਾ ਹੈ, ਕਿਉਂਕਿ ਅਮਰੀਕਾ ਇਸ ਸਾਲ 11 ਸਤੰਬਰ ਤੱਕ ਅਫਗਾਨਿਸਤਾਨ ਤੋਂ ਵਾਪਸ ਜਾ ਰਿਹਾ ਹੈ। ਪਿਛਲੇ ਕਈ ਮਹੀਨਿਆਂ ਤੋਂ ਚੀਨੀ ਅਧਿਕਾਰੀ ਇਹ ਚਿਤਾਵਨੀ ਦੇ ਰਹੇ ਹਨ ਕਿ ਅਮਰੀਕਾ ਦੀ ਅਫਗਾਨਿਸਤਾਨ ਤੋਂ ਵਾਪਸੀ ਨਾਲ ਤਾਲਿਬਾਨ ਫਿਰ ਉਭਰ ਕੇ ਰਿਹਾ ਹੈ ਤੇ ਇਸ ਨਾਲ ਖੇਤਰੀ ਅਸੰਤੁਲਨ ਦਾ ਖਤਰਾ ਪੈਦਾ ਹੋ ਗਿਆ ਹੈ। ਵਰਨਣ ਯੋਗ ਹੈ ਕਿ ਜਿਨਪਿੰਗ ਅਤੇ ਚੀਨ ਦੇ ਵਿਦੇਸ਼ ਮੰਤਰੀ ਵਾਂਗ ਯੀ ਨੇ ਇਸ ਹਫ਼ਤੇ ਕਿਹਾ ਸੀ ਕਿ ਅਮਰੀਕਾ ਦੀ ਵਾਪਸੀ ਨਾਲ ਉਈਗਰ ਮੁਸਲਮਾਨਾਂ ਨੂੰ ਇੱਕ ਸੁਰੱਖਿਅਤ ਅੱਡਾ ਮਿਲ ਗਿਆ ਹੈ, ਜੋ ਚੀਨ ਦੇ ਸ਼ਿੰਜ਼ਿਆਂਗ ਸੂਬੇ ਵਿੱਚ ਕਮਿਊਨਿਸਟ ਪਾਰਟੀ ਉੱਤੇ ਹਮਲੇ ਕਰ ਸਕਦੇ ਹਨ।