ਚੰਡੀਗੜ੍ਹ, 1 ਅਗਸਤ (ਪੋਸਟ ਬਿਊਰੋ)- ਗੁਰੂਗਰਾਮ ਦੇ ਮੇਦਾਂਤਾ ਹਸਪਤਾਲ ਵਿੱਚ ਨੱਬੇ ਦਿਨਾਂ ਤੋਂ ਵੱਧ ਸਮੇਂ ਤੋਂ ਦਾਖਲ ਬਜ਼ੁਰਗ ਔਰਤ ਦੇ ਇਲਾਜ ਦਾ ਮੈਡੀਕਲ ਰਿਕਾਰਡ ਨਾ ਦੇਣ ਉੱਤੇ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਵਿੱਚ ਪਟੀਸ਼ਨ ਦਾਇਰ ਕੀਤੀ ਗਈ ਹੈ। ਹਸਪਤਾਲ ਨੇ ਇਲਾਜ ਦਾ ਬਿੱਲ ਸੱਠ ਲੱਖ ਰੁਪਏ ਤੋਂ ਵੱਧ ਬਣਾਇਆ ਹੈ।
ਇਸ ਪਟੀਸ਼ਨ ਉੱਤੇ ਪਹਿਲੀ ਸੁਣਵਾਈ ਦੇ ਬਾਅਦ ਹਾਈ ਕੋਰਟ ਨੇ ਹਰਿਆਣਾ ਸਰਕਾਰ ਤੇ ਮੇਦਾਂਤਾ ਨੂੰ ਨੋਟਿਸ ਭੇਜ ਕੇ ਜਵਾਬ ਮੰਗਿਆ ਹੈ। ਫਰੀਦਾਬਾਦ ਦੀ ਨੇਹਾ ਗੁਪਤਾ ਨੇ ਹਸਪਤਾਲ ਸਮੇਤ ਹਰਿਆਣਾ ਸਰਕਾਰ ਦੇ ਸਿਹਤ ਵਿਭਾਗ ਨੂੰ ਧਿਰ ਬਣਾ ਕੇ ਮੰਗ ਕੀਤੀ ਹੈ ਕਿ ਹਸਪਤਾਲ ਨੂੰ ਹੁਕਮ ਦਿੱਤੇ ਜਾਣ ਕਿ ਉਸ ਦੀ ਮਾਂ ਦਾ ਪੂਰਾ ਆਈ ਪੀ ਡੀ ਰਿਕਾਰਡ, ਜਿਸ ਵਿੱਚ ਹਿਸਟਰੀ ਸ਼ੀਟ, ਨਰਸਿੰਗ ਰਿਕਾਰਡ, ਡਰੱਗ ਚਾਰਟ, ਜਾਂਚ ਟੈਸਟ ਨਤੀਜੇ, ਇਲਾਜ ਵਾਲੇ ਬਿੱਲ ਸ਼ਾਮਲ ਹੋਣ, ਪੇਸ਼ ਕੀਤਾ ਜਾਏ। ਇਸ ਦੇ ਨਾਲ ਮੇਦਾਂਤਾ ਹਸਪਤਾਲ ਦੇ ਖਿਲਾਫ ਗਲਤ ਵਿਹਾਰ ਬਾਰੇ ਕਾਰਵਾਈ ਕੀਤੀ ਜਾਏ। ਪਟੀਸ਼ਨ ਵਿੱਚ ਕਿਹਾ ਗਿਆ ਹੈ ਕਿ ਉਸ ਦੀ ਮਾਂ ਤਿੰਨ ਮਹੀਨੇ ਤੋਂ ਹਸਪਤਾਲ ਵਿੱਚ ਹੈ ਅਤੇ ਵੱਖ-ਵੱਖ ਡਾਕਟਰ ਬਿਮਾਰੀਆਂ ਵੀ ਵੱਖ-ਵੱਖ ਦੱਸ ਰਹੇ ਹਨ ਅਤੇ ਇਲਾਜ ਵਿੱਚ ਲਾਪਰਵਾਹੀ ਕੀਤੀ ਜਾ ਰਹੀ ਹੈ।ਪਟੀਸ਼ਨਰ ਨੇ ਕਿਹਾ ਕਿ 27 ਅਪ੍ਰੈਲ ਨੂੰ ਉਸ ਦੀ ਮਾਂ ਮਧੂ ਗੁਪਤਾ ਕੋਰੋਨਾ ਦੇ ਇਲਾਜ ਲਈ ਮੇਦਾਂਤਾ ਹਸਪਤਾਲ ਭਰਤੀ ਕਰਵਾਈ ਸੀ। ਇਲਾਜ ਦੌਰਾਨ ਅਚਾਨਕ 19 ਮਈ ਨੂੰ ਮਧੂ ਗੁਪਤਾ ਨੂੰ ਹਸਪਤਾਲ ਦੀ ਲਾਬੀ ਵਿੱਚ ਰੱਖਿਆ ਗਿਆ, ਜਿੱਥੇ ਉਨ੍ਹਾਂ ਦਾ ਆਕਸੀਜਨ ਦਾ ਪੱਧਰ ਘੱਟ ਕੇ 25 ਹੋ ਗਿਆ, ਜਿਸ ਕਾਰਨ ਉਨ੍ਹਾਂ ਦੇ ਫੇਫੜਿਆਂ ਨੂੰ ਗੰਭੀਰ ਨੁਕਸਾਨ ਪੁੱਜਾ। ਫਿਰ 17 ਜੁਲਾਈ ਨੂੰ ਉਹ ਨਿਓਮੋਥੋਰਕਸ ਤੋਂ ਪੀੜਤ ਸੀ ਤੇ ਉਹ 18 ਘੰਟੇ ਦਰਦ ਨਾਲ ਤੜਫਦੀ ਰਹੀ, ਪਰ ਉਨ੍ਹਾਂ ਨੂੰ ਕੋਈ ਇਲਾਜ ਨਹੀਂ ਦਿੱਤਾ ਗਿਆ। ਇਸ ਦੇ ਬਾਅਦ ਪਟੀਸ਼ਨਰ ਨੇ ਆਪਣੀ ਮਾਂ ਦਾ ਮੈਡੀਕਲ ਰਿਕਾਰਡ ਦੇਖਣ ਦੀ ਮੰਗ ਕੀਤੀ। ਹਸਪਤਾਲ ਵਿੱਚ ਬਿਨਾਂ ਰਿਕਾਰਡ ਦਿੱਤੇ ਉਨ੍ਹਾਂ ਨੂੰ 60,55,232 ਰੁਪਏ ਦਾ ਬਿੱਲ ਫੜਾ ਕੇ ਕਿਹਾ ਕਿ ਅਜੇ ਦੋ ਮਹੀਨੇ ਰਿਕਵਰੀ ਲਈ ਲੱਗਣਗੇ। ਪਟੀਸ਼ਨਰ ਨੇ ਮੰਗ ਕੀਤੀ ਕਿ ਉਨ੍ਹਾਂ ਨੂੰ ਮੈਡੀਕਲ ਰਿਕਾਰਡ ਦਿੱਤਾ ਜਾਏ। ਆਪਣੀ ਮਾਂ ਦੇ ਇਲਾਜ ਬਾਰੇ ਉਹ ਸੈਕਿੰਡ ਓਪੀਨੀਅਨ ਲੈਣਾ ਚਾਹੰੁਦੇ ਹਨ, ਲਿਹਾਜ਼ਾ ਉਨ੍ਹਾਂ ਨੂੰ ਇਲਾਜ ਸਬੰਧੀ ਸਾਰੀ ਜਾਣਕਾਰੀ ਦਿੱਤੀ ਜਾਏ।