ਲੁਧਿਆਣਾ, 1 ਅਗਸਤ (ਪੋਸਟ ਬਿਊਰੋ)- ਸ਼ਹਿਰ ਦੇ ਸਭ ਤੋਂ ਬਿਜ਼ੀ ਬਾਬਾ ਥਾਨ ਸਿੰਘ ਚੌਕ ਨੇੜੇ ਕੱਲ੍ਹ ਦੁਪਹਿਰੇ ਦੋ ਨਸ਼ੇੜੀਆਂ ਨੇ ਕਾਰੋਬਾਰੀ ਨਿਤੀਸ਼ ਘਈ ਦੀ ਕਾਰ ਨੂੰ ਭਜਾ ਕੇ ਉਸ ਵਿੱਚ ਸਵਾਰ ਉਨ੍ਹਾਂ ਦੇ ਪੁੱਤਰਾਂ ਕੇਯੂਰ ਅਤੇ ਅਯੂਰ ਨੂੰ ਅਗਵਾ ਕਰਨ ਦੀ ਕੋਸ਼ਿਸ਼ ਕੀਤੀ। ਕਾਰ ਵਿੱਚ ਸਵਾਰ ਬੱਚਿਆਂ ਤੇ ਨੌਕਰਾਣੀ ਰਿੰਕੀ ਦੇ ਰੌਲਾ ਪਾਉਣ ਉੱਤੇ ਲੋਕਾਂ ਨੇ ਪਿੱਛਾ ਕਰ ਕੇ ਕਾਰ ਨੂੰ ਰੋਕ ਕੇ ਨਸ਼ੇੜੀਆਂ ਨੂੰ ਫੜ ਲਿਆ ਅਤੇ ਕੁਟਾਪਾ ਚਾੜਨ ਪਿੱਛੋਂ ਪੁਲਸ ਹਵਾਲੇ ਕਰ ਦਿੱਤਾ।
ਥਾਣਾ ਡਵੀਜ਼ਨ ਨੰਬਰ ਤਿੰਨ ਦੀ ਪੁਲਸ ਨੇ ਜਗਰਾਓਂ ਦੇ ਵਸਨੀਕ ਬੌਬੀ ਵਾਧਵਾ ਤੇ ਹਰਜੀਤ ਸਿੰਘ ਨੂੰ ਗ੍ਰਿਫਤਾਰ ਕਰ ਕੇ ਉਨ੍ਹਾਂ ਖਿਲਾਫ ਅਗਵਾ ਦਾ ਕੇਸ ਦਰਜ ਕਰ ਲਿਆ ਹੈ। ਮੁੱਢਲੀ ਜਾਂਚ ਤੋਂ ਪਤਾ ਲੱਗਾ ਕਿ ਦੋਵੇਂ ਨੌਜਵਾਨ ਨਸ਼ੇੜੀ ਹਨ।ਪੁਲਸ ਦੇ ਦੱਸਣ ਅਨੁਸਾਰ ਦੁਪਹਿਰੇ ਕਰੀਬ 12 ਵਜੇ ਬਾਬਾ ਥਾਨ ਸਿੰਘ ਚੌਕ ਦੀ ਇੱਕ ਛੋਲੇ ਭਟੂਰੇ ਦੀ ਦੁਕਾਨ ਅੱਗੇ ਐਂਡੇਵਰ ਕਾਰ ਰੁਕੀ ਤਾਂ ਇਸ ਵਿੱਚੋਂ ਕਾਰੋਬਾਰੀ ਨਿਤੀਸ਼ ਘਈ ਦੀ ਪਤਨੀ ਗੁਰਮਿੰਦਰ ਕੌਰ ਭਟੂਰੇ ਲੈਣ ਉਤਰੀ। ਦੋ ਬੇਟੇ ਅੱਠ ਸਾਲ ਦਾ ਕੇਯੂਰ, ਢਾਈ ਸਾਲ ਦਾ ਆਯੂਰ ਤੇ 18 ਸਾਲਾ ਨੌਕਰਾਣੀ ਕਾਰ ਵਿੱਚ ਸਨ, ਇਸ ਲਈ ਉਨ੍ਹਾਂ ਨੇ ਚਾਬੀ ਵਿੱਚੇ ਲੱਗੀ ਰਹਿਣ ਦਿੱਤੀ। ਇਸੇ ਦੌਰਾਨ ਨਸ਼ੇੜੀ ਕਾਰ ਕੋਲ ਪਹੁੰਚ ਗਏ। ਇੱਕ ਕਾਰ ਦੇ ਅੱਗੇ ਖੜ੍ਹਾ ਹੋ ਗਿਆ ਤੇ ਦੂਸਰਾ ਦਰਵਾਜ਼ਾ ਖੋਲ੍ਹ ਕੇ ਡਰਾਈਵਿੰਗ ਸੀਟ ਉੱਤੇ ਬੈਠ ਕੇ ਕਾਰ ਨੂੰ ਸਟਾਰਟ ਕਰ ਕੇ ਭੱਜਣ ਲੱਗਾ। ਗੁਰਮਿੰਦਰ ਕੌਰ ਵੀ ਕਾਰ ਦੇ ਸਟਾਰਟ ਹੋਣ ਦੀ ਆਵਾਜ਼ ਸੁਣ ਕੇ ਮਦਦ ਦੇ ਲਈ ਰੌਲਾ ਪਾਉਣ ਲੱਗੀ। ਕਾਰ ਦੀ ਪਿਛਲੀ ਸੀਟ ਉੱਤੇ ਬੈਠੀ ਨੌਕਰਾਣੀ ਨੇ ਡਰਾਈਵਿੰਗ ਸੀਟ ਉੱਤੇ ਬੈਠੇ ਨੌਜਵਾਨ ਦਾ ਗਲਾ ਪਿੱਛੋਂ ਫੜ ਲਿਆ ਅਤੇ ਸ਼ਹਿਰ ਦੇ ਇੱਕ ਕੱਪੜਾ ਕਾਰੋਬਾਰੀ ਪਰਮਜੀਤ ਸਿੰਘ ਨੇ ਕਾਰ ਦੇ ਅੱਗੇ ਆਪਣੀ ਸਕੂਟੀ ਡੇਗ ਕੇ ਨਸ਼ੇੜੀਆਂ ਨੂੰ ਰੋਕ ਲਿਆ। ਪਰਮਜੀਤ ਸਿੰਘ ਕਹਿੰਦੇ ਹਨ ਕਿ ਜਦ ਉਹ ਉਥੋਂ ਲੰਘੇ ਤਾਂ ਕਾਰ ਸਵਾਰ ਬੱਚੇ ਰੌਲਾ ਪਾ ਰਹੇ ਸਨ। ਕੁਝ ਲੋਕ ਕਾਰ ਦੇ ਪਿੱਛੇ ਭੱਜ ਰਹੇ ਸਨ। ਉਨ੍ਹਾਂ ਨੂੰ ਲੱਗਾ ਕਿ ਇਥੇ ਕੁਝ ਗੜਬੜ ਹੈ ਤਾਂ ਕਾਰ ਨੂੰ ਰੋਕਣ ਲਈ ਉਨ੍ਹਾਂ ਨੇ ਤੇਜ਼ੀ ਨਾਲ ਸਕੂਟੀ ਭਜਾਈ ਤੇ ਕਾਰ ਦੇ ਅੱਗੇ ਉਸ ਨੂੰ ਡੇਗ ਦਿੱਤੀ। ਇਸ ਕਾਰਨ ਬਦਮਾਸ਼ਾਂ ਨੂੰ ਕਾਰ ਨੂੰ ਬ੍ਰੇਕ ਲਗਾਉਣੀ ਪਈ ਅਤੇ ਉਹ ਫੜੇ ਗਏ।