ਜਲੰਧਰ, 1 ਅਗਸਤ (ਪੋਸਟ ਬਿਊਰੋ)- ਜਲੰਧਰ ਵਿੱਚ ਸਾਈਬਰ ਠੱਗਾਂ ਦੀ ਇੱਕ ਹੋਰ ਚਾਲ ਫੜੀ ਗਈ ਹੈ। ਭੋਗਪੁਰ ਦੇ ਪਿੰਡ ਪਤਿਆਲ ਦੇ ਇੱਕ ਨੌਜਵਾਨ ਨੂੰ ਸੈਕਿੰਡ ਹੈਂਡ ਕਾਰ ਵੇਚਣ ਦੇ ਨਾਂਅ ਉੱਤੇ ਫਰਜ਼ੀ ਫੌਜੀ ਬਣ ਕੇ ਕਰੀਬ 18,700 ਰੁਪਏ ਠੱਗੇ ਗਏ। ਪੀੜਤ ਦੀ ਸ਼ਿਕਾਇਤ ਪਿੱਛੋਂ ਪੁਲਸ ਨੇ ਪੰਜਾਬ ਸਮੇਤ ਉਤਰ ਪ੍ਰਦੇਸ਼, ਮੱਧ ਪ੍ਰਦੇਸ਼, ਮਹਾਰਾਸ਼ਟਰ ਅਤੇ ਰਾਜਸਥਾਨ ਦੇ ਸੱਤ ਦੋਸ਼ੀਆਂ ਦੇ ਖਿਲਾਫ ਕੇਸ ਦਰਜ ਕਰ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਬਿਕਰਮਜੀਤ ਸਿੰਘ ਨੇ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਕਿ ਉਸ ਨੇੇ ਸੈਕਿੰਡ ਹੈਂਡ ਗੱਡੀ ਲੈਣੀ ਸੀ। ਘਰ ਵਿੱਚ ਬੱਚੇ ਓ ਐਲ ਐਕਸ ਉੱਤੇ ਪੁਰਾਣੀ ਗੱਡੀ ਲੱਭ ਰਹੇ ਸਨ ਤਾਂ ਉਨ੍ਹਾਂ ਨੂੰ ਇੱਕ ਪੁਰਾਣੀ ਸਵਿਫਟ ਕਾਰ ਦਾ ਇਸ਼ਤਿਹਾਰ ਦਿਸਿਆ। ਗੱਡੀ ਪਸੰਦ ਆਈ ਤਾਂ ਉਨ੍ਹਾਂ ਨੇ ਦਿੱਤੇ ਗਏ ਨੰਬਰ ਉੱਤੇ ਮੈਸੇਜ ਕੀਤਾ। ਮੈਸੇਜ ਦਾ ਜਵਾਬ ਦੇਣ ਵਾਲੇ ਨੇ ਖੁਦ ਨੂੰ ਫੌਜ ਦਾ ਹੌਲਦਾਰ ਮਨਜੀਤ ਸਿੰਘ ਦੱਸ ਕੇ ਕਿਹਾ ਕਿ ਉਸ ਦੀ ਡਿਊਟੀ ਜੈਪੁਰ ਏਅਰਪੋਰਟ ਉੱਤੇ ਹੈ ਅਤੇ ਜੈਪੁਰ ਤੋਂ ਉਤਰ ਪ੍ਰਦੇਸ਼ ਬਦਲੀਹੋ ਰਹੀ ਹੈ, ਇਸ ਲਈ ਕਾਰ ਵੇਚਣਾ ਚਾਹੁੰਦਾ ਹੈ। ਉਸ ਨੇ ਗੱਡੀ ਦੇ ਪੁਰਾਣੇ ਮਾਲਕ ਹੁਸ਼ਿਆਰਪੁਰ ਦੇ ਜਗਜੀਤ ਸਿੰਘ ਨਾਲ ਵੀ ਗੱਲ ਕਰਵਾਈ ਅਤੇ ਇਸ ਪਿੱਛੋਂ ਗੱਡੀ ਦਾ ਸੌਦਾ ਹੋ ਗਿਆ। ਬਿਕਰਮਜੀਤ ਸਿੰਘ ਨੇ ਦੱਸਿਆ ਕਿ ਦੋਸ਼ੀ ਨੇ ਉਸ ਨੂੰ ਫੌਜ ਦਾ ਫਰਜ਼ੀ ਆਈਕਾਰਡ, ਕੰਟੀਨ ਕਾਰਡ, ਆਧਾਰ ਕਾਰਡ ਅਤੇ ਕਾਰ ਦੀ ਆਰਸੀ (ਰਜਿਸਟਰੇਸ਼ਨ) ਵੀ ਭੇਜੀ। ਫਿਰ ਦੋਸ਼ੀ ਨੇ 6100 ਰੁਪਏ ਕਾਰ ਨੂੰ ਆਰਮੀ ਟਰਾਂਸਪੋਰਟ ਸਰਵਿਸ `ਤੇ ਭੇਜਣ ਦੇ ਲਈ ਮੰਗੇ ਤਾਂ ਉਸ ਨੇ ਪੇ ਟੀ ਐਮ ਦੇ ਰਾਹੀਂ ਭੇਜ ਦਿੱਤੇ। ਦੋਸ਼ੀ ਨੇ ਵੱਖ-ਵੱਖ ਖਾਤਿਆਂ ਵਿੱਚ ਕੋਈ ਨਾ ਕੋਈ ਬਹਾਨਾ ਬਣਾ ਕੇ 12,600 ਰੁਪਏ ਹੋਰ ਪਵਾ ਲਏ। ਬਾਅਦ ਵਿੱਚ ਠੱਗੀ ਦਾ ਪਤਾ ਲੱਗਣ ਉੱਤੇ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਤਾਂ ਪੁਲਸ ਦੇ ਸਾਈਬਰ ਸੈਲ ਨੇ ਕੇਸ ਦੀ ਜਾਂਚ ਕਰ ਕੇ ਉਤਰ ਪ੍ਰਦੇਸ਼ ਦੇ ਅਲੀਗੜ੍ਹ ਦੇ ਇਗਲਾਸ ਥਾਣਾ ਖੇਤਰ ਵਾਸੀ ਹੇਮੰਤ ਸਿੰਘ, ਸਤਪਾਲ ਵਾਸੀ ਹਾਥੀਪੁਰ ਚੰਦੂਪੁਰ, ਨਿਰੰਜਨ ਪਟੇਲ ਵਾਸੀ ਕਟਨੀ ਮੱਧ ਪ੍ਰਦੇਸ਼, ਰਾਹੁਲ ਵਾਸੀ ਗੁਰੂ ਨਾਨਕ ਨਗਰ ਪਟਿਆਲਾ, ਕ੍ਰਿਸ਼ਨ ਗੋਵਿੰਦ ਵਾਸੀ ਚਾਮੁੰਡਾ ਹਾਰਮੋਨੀ ਮੁਲੁੰਡ ਮੁੰਬਈ, ਮੌਸਮ ਪੁੱਤਰ ਇਕਬਾਲ ਵਾਸੀ ਗੌਨਾਰੀ ਭਰਤਪੁਰ ਰਾਜਸਥਾਨ ਦੇ ਖਿਲਾਫ ਕੇਸ ਦਰਜ ਕਰ ਕੇ ਦੋਸ਼ੀਆਂ ਦੀ ਤਲਾਸ਼ ਸ਼ੁਰੂੁ ਕਰ ਦਿੱਤੀ ਹੈ।