ਟੋਰਾਂਟੋ, 29 ਜੁਲਾਈ (ਪੋਸਟ ਬਿਊਰੋ) : ਓਨਟਾਰੀਓ ਹੈਲਥ ਅਧਿਕਾਰੀਆਂ ਵੱਲੋਂ ਵੀਰਵਾਰ ਨੂੰ ਕੋਵਿਡ-19 ਦੇ ਮਾਮਲਿਆਂ ਵਿੱਚ ਵਾਧਾ ਹੋਣ ਦੀ ਜਾਣਕਾਰੀ ਦਿੱਤੀ ਗਈ। ਪਿਛਲੇ ਤਿੰਨ ਹਫਤਿਆਂ ਵਿੱਚ ਓਨਟਾਰੀਓ ਵਿੱਚ ਕੋਵਿਡ-19 ਦੇ ਮਾਮਲੇ ਪਹਿਲੀ ਵਾਰੀ 200 ਤੋਂ ਉੱਪਰ ਟੱਪ ਗਏ।
ਵੀਰਵਾਰ ਨੂੰ ਜਾਰੀ ਕੀਤੀ ਰਿਪੋਰਟ ਵਿੱਚ ਓਨਟਾਰੀਓ ਵਿੱਚ ਕੋਵਿਡ-19 ਦੇ ਕੇਸਾਂ ਦੀ ਗਿਣਤੀ 549,952 ਦੱਸੀ ਗਈ, ਇਨ੍ਹਾਂ ਵਿੱਚੋਂ 539,200 ਲੋਕਾਂ ਦੇ ਸਿਹਤਯਾਬ ਹੋਣ ਤੇ ਇਸ ਬਿਮਾਰੀ ਕਾਰਨ ਕੁੱਲ 9,328 ਲੋਕਾਂ ਦੇ ਮਾਰੇ ਜਾਣ ਦੀ ਪੁਸ਼ਟੀ ਕੀਤੀ ਗਈ ਹੈ।ਇਸ ਸਮੇਂ ਸੱਤ ਦਿਨਾਂ ਵਿੱਚ ਕੇਸਾਂ ਦੀ ਗਿਣਤੀ ਔਸਤ 165 ਦਰਜ ਕੀਤੀ ਗਈ ਹੈ, ਜੋ ਕਿ ਇੱਕ ਹਫਤੇ ਪਹਿਲਾਂ ਰਿਕਾਰਡ ਕੀਤੇ ਗਏ 155 ਮਾਮਲਿਆਂ ਨਾਲੋਂ ਵੱਧ ਹੈ।
ਸਿਹਤ ਮੰਤਰਾਲੇ ਵੱਲੋਂ ਪਿਛਲੇ 24 ਘੰਟਿਆਂ ਵਿੱਚ 19,425 ਟੈਸਟ ਕੀਤੇ ਗਏ, ਪ੍ਰੋਵਿੰਸ ਦੀ ਕੋਵਿਡ-19 ਪਾਜ਼ੀਟਿਵਿਟੀ ਦਰ 1·3 ਫੀ ਸਦੀ ਪਾਈ ਗਈ। ਇਸ ਸਮੇਂ ਕੋਵਿਡ-19 ਇੰਟੈਸਿਵ ਕੇਅਰ ਵਿੱਚ 121 ਮਰੀਜ਼ ਹੈ। ਇਨ੍ਹਾਂ ਮਰੀਜ਼ਾਂ ਵਿੱਚੋਂ 79 ਵੈਂਟੀਲੇਟਰ ਉੱਤੇ ਹਨ। ਵੀਰਵਾਰ ਨੂੰ ਪ੍ਰੋਵਿੰਸ ਵੱਲੋਂ ਰਿਪੋਰਟ ਕੀਤੇ ਗਏ ਮਾਮਲਿਆਂ ਵਿੱਚ ਟੋਰਾਂਟੋ ਵਿੱਚ 38, ਪੀਲ ਰੀਜਨ ਵਿੱਚ 38 ਤੇ ਵਾਟਰਲੂ ਵਿੱਚ 19 ਮਾਮਲੇ ਪਾਏ ਗਏ। ਹੋਰਨਾਂ ਹੈਲਥ ਯੂਨਿਟਸ ਵਿੱਚੋਂ ਹੈਮਿਲਟਨ ਵਿੱਚ 25, ਗ੍ਰੇਅ ਬਰੂਸ ਵਿੱਚ 13, ਹਾਲਟਨ ਰੀਜਨ ਵਿੱਚ 12, ਮਿਡਲਸੈਕਸ-ਲੰਡਨ ਵਿੱਚ 10 ਤੇ ਯੌਰਕ ਰੀਜਨ ਵਿੱਚ 10 ਮਾਮਲੇ ਰਿਪੋਰਟ ਕੀਤੇ ਗਏ।