ਟੋਰਾਂਟੋ, 28 ਜੁਲਾਈ (ਪੋਸਟ ਬਿਊਰੋ): ਕੋਵਿਡ ਮਹਾਂਮਾਰੀ ਦੌਰਾਨ ਕੁੱਝ ਰੈਜ਼ੀਡੈਂਟਸ ਦੇ ਕਮਰਿਆਂ ਦੇ ਡੋਰ ਹੈਂਡਲ ਹਟਾ ਦੇਣ ਵਾਲੇ ਓਨਟਾਰੀਓ ਰਿਟਾਇਰਮੈਂਟ ਹੋਮ ਦੇ ਜਨਰਲ ਮੈਨੇਜਰ ਨੂੰ ਚਾਰਜਿਜ਼ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਦਰਹਾਮ ਰੀਜਨਲ ਪੁਲਿਸ ਸਰਵਿਸ (ਡੀ ਆਰ ਪੀ ਐਸ) ਵੱਲੋਂ ਬੁੱਧਵਾਰ ਨੂੰ ਇਨ੍ਹਾਂ ਚਾਰਜਿਜ਼ ਦਾ ਐਲਾਨ ਕੀਤਾ ਗਿਆ। ਡੀ ਆਰ ਪੀ ਐਸ ਦੇ ਜਾਂਚਕਾਰਾਂ ਨੇ ਆਖਿਆ ਕਿ ਉਨ੍ਹਾਂ ਓਸ਼ਾਵਾ ਦੇ ਪੂਰਬ ਵਿੱਚ ਕਰਟਿਸ ਵਿੱਚ ਸਥਿਤ ਵਾੲ੍ਹੀਟ ਕਲਿੱਫ ਟੈਰੇਸ ਰਿਟਾਇਰਮੈਂਟ ਹੋਮ ਦੇ ਸਟਾਫ ਮੈਂਬਰਾਂ ਖਿਲਾਫ ਮਿਲੀ ਸਿ਼ਕਾਇਤ ਦੇ ਸਬੰਧ ਵਿੱਚ 12 ਫਰਵਰੀ ਨੂੰ ਜਾਂਚ ਸ਼ੁਰੂ ਕੀਤੀ। ਰੈਜ਼ੀਡੈਂਟਸ ਵੱਲੋਂ ਇਹ ਦੋਸ਼ ਲਾਇਆ ਗਿਆ ਸੀ ਕਿ ਮਹਾਂਮਾਰੀ ਦੌਰਾਨ ਕਥਿਤ ਤੌਰ ਉੱਤੇ ਸਟਾਫ ਮੈਂਬਰਾਂ ਵੱਲੋਂ ਕੁੱਝ ਕਮਰਿਆਂ ਦੇ ਦਰਵਾਜਿ਼ਆਂ ਦੇ ਡੋਰ ਹੈਂਡਲ ਹਟਾ ਦਿੱਤੇ ਗਏ ਹਨ।
ਦਰਹਾਮ ਪੁਲਿਸ ਵੱਲੋਂ ਵਾੲ੍ਹੀਟ ਕਲਿੱਫ ਟੈਰੇਸ ਦੇ ਸਾਬਕਾ ਜਨਰਲ ਮੈਨੇਜਰ 40 ਸਾਲਾ ਤਵਾਬ ਕਰੀਮੀ ਨੂੰ ਗ੍ਰਿਫਤਾਰ ਤੇ ਚਾਰਜ ਕੀਤਾ ਗਿਆ। ਉਸ ਉੱਤੇ ਗੈਰਕਾਨੂੰਨੀ ਢੰਗ ਨਾਲ ਰੈਜ਼ੀਡੈਂਟਸ ਨੂੰ ਕੈਦ ਕਰਨ ਦੇ ਚਾਰਜਿਜ਼ ਲਾਏ ਗਏ। ਅੰਡਰਟੇਕਿੰਗ ਤੋਂ ਬਾਅਦ ਉਸ ਨੂੰ ਰਿਹਾਅ ਕੀਤਾ ਗਿਆ ਹੈ।