ਓਟਵਾ, 28 ਜੁਲਾਈ (ਪੋਸਟ ਬਿਊਰੋ) : ਪਿਛਲੇ ਮਹੀਨੇ ਕੈਨੇਡਾ ਦੀ ਮਹਿੰਗਾਈ ਦਰ ਮੱਠੀ ਪੈ ਗਈ। ਸਾਲ ਦਰ ਸਾਲ ਦੇ ਆਧਾਰ ਉੱਤੇ ਜੂਨ ਵਿੱਚ ਇਹ 3·1 ਫੀ ਸਦੀ ਦਰਜ ਕੀਤੀ ਗਈ।
ਮਈ ਵਿੱਚ ਇਹ 3·6 ਫੀ ਸਦੀ ਰਿਕਾਰਡ ਕੀਤੀ ਗਈ ਸੀ, ਜੋ ਕਿ ਇੱਕ ਦਹਾਕੇ ਵਿੱਚ ਸੱਭ ਤੋਂ ਜਿ਼ਆਦਾ ਵਾਧਾ ਸੀ। ਇਹ ਖੁਲਾਸਾ ਸਟੈਟੇਸਟਿਕਸ ਕੈਨੇਡਾ ਵੱਲੋਂ ਕੀਤਾ ਗਿਆ।ਏਜੰਸੀ ਦਾ ਕਹਿਣਾ ਹੈ ਕਿ ਜੂਨ ਮਹੀਨੇ ਦਾ ਤੁਲਨਾਤਮਕ ਅਧਿਐਨ ਪਿਛਲੇ ਸਾਲ ਇਸੇ ਮਹੀਨੇ ਦੀਆਂ ਕੀਮਤਾਂ ਨਾਲ ਵੀ ਕੀਤਾ ਗਿਆ। ਇਹ ਨਤੀਜਾ ਕੋਵਿਡ-19 ਮਹਾਂਮਾਰੀ ਕਾਰਨ ਦੇਸ਼ ਭਰ ਵਿੱਚ ਕਾਰੋਬਾਰਾਂ ਤੇ ਕਮਿਊਨਿਟੀਜ਼ ਉੱਤੇ ਪੈਣ ਵਾਲੇ ਪ੍ਰਭਾਵ ਕਾਰਨ ਆਇਆ।
ਮਿਸਾਲ ਵਜੋਂ ਗੈਸੋਲੀਨ ਦੀਆਂ ਕੀਮਤਾਂ ਵਿੱਚ ਸਾਲ ਦਰ ਸਾਲ ਹੋਏ ਵਾਧੇ ਕਾਰਨ ਇਹ ਜੂਨ ਵਿੱਚ 32 ਫੀ ਸਦੀ ਤੱਕ ਵੱਧ ਗਈਆਂ ਜਦਕਿ ਮਈ ਦੇ ਮਹੀਨੇ ਇਨ੍ਹਾਂ ਵਿੱਚ 43·4 ਫੀ ਸਦੀ ਨਾਲ ਉਛਾਲ ਆਇਆ ਹੋਇਆ ਸੀ ਕਿਉਂਕਿ ਗੈਸੋਲੀਨ ਦੀਆਂ ਕੀਮਤਾਂ ਮਹਾਂਮਾਰੀ ਦੇ ਸ਼ੁਰੂ ਵਿੱਚ ਡਿੱਗਣ ਤੋਂ ਬਾਅਦ ਜੂਨ 2020 ਵਿੱਚ ਅੰਸ਼ਕ ਤੌਰ ਉੱਤੇ ਰਿਕਵਰ ਕਰ ਗਈਆਂ।
ਏਜੰਸੀ ਨੇ ਆਖਿਆ ਕਿ ਜੇ ਗੈਸੋਲੀਨ ਦੀਆਂ ਕੀਮਤਾਂ ਦੀ ਗੱਲ ਨਾ ਕੀਤੀ ਜਾਵੇ ਤਾਂ ਮਹਿੰਗਾਈ ਦੀ ਸਾਲਾਨਾ ਦਰ 2·2 ਫੀ ਸਦੀ ਹੋਵੇਗੀ। ਇਸ ਦੌਰਾਨ ਮਈ ਵਿੱਚ 0·5 ਫੀ ਸਦੀ ਵਾਧੇ ਤੋਂ ਬਾਅਦ ਜੂਨ ਵਿੱਚ ਸੀ ਪੀ ਆਈ (ਕੰਜਿ਼ਊਮਰ ਪ੍ਰਾਈਸ ਇੰਡੈਕਸ) ਵਿੱਚ 0·3 ਫੀ ਸਦੀ ਵਾਧਾ ਦਰਜ ਕੀਤਾ ਗਿਆ।