ਇਸਲਾਮਾਬਾਦ, 27 ਜੁਲਾਈ, (ਪੋਸਟ ਬਿਊਰੋ)- ਪਾਕਿਸਤਾਨੀ ਕਬਜ਼ੇ ਵਾਲੇ ਕਸ਼ਮੀਰ (ਪੀ ਓਕੇ) ਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਦੀ ਤਹਿਰੀਕੇ ਇਨਸਾਫ ਪਾਰਟੀ ਦੀ ਜਿੱਤ ਤੇ ਆਪਣੀ ਪਾਕਿਸਤਾਨ ਮੁਸਲਿਮ ਲੀਗ-ਨਵਾਜ (ਪੀ ਐੱਮ ਐੱਲ-ਐੱਨ) ਦੀ ਹਾਰ ਤੋਂ ਮੌਜੂਦਾ ਕਾਬਜ਼ ਧਿਰ ਦਾ ਆਗੂ ਰਾਜਾ ਫਾਰੂਕ ਹੈਦਰ ਭੜਕਿਆ ਪਿਆ ਹੈ ਅਤੇ ਉਸ ਨੇ ਇਸ ਹਾਰ ਪਿੱਛੇ ਕਸ਼ਮੀਰੀ ਲੋਕਾਂ ਦੀ ਗੁਲਾਮ ਮਾਨਸਿਕਤਾ ਵੀ ਦੱਸੀ ਹੈ।
ਵਰਨਣ ਯੋਗ ਹੈ ਕਿ ਪਾਕਿਸਤਾਨੀ ਕਬਜ਼ੇ ਵਾਲੇ ਕਸ਼ਮੀਰੀ ਇਲਾਕੇ ਵਿੱਚ ਚੁਣੇ ਹੋਏ ਆਗੂ ਨੂੰ ਮੁੱਖ ਮੰਤਰੀ ਕਹਿਣ ਦੀ ਥਾਂ ਪ੍ਰਧਾਨ ਮੰਤਰੀ ਕਿਹਾ ਜਾਂਦਾ ਹੈ। ਇਸ ਵੇਲੇ ਓਥੇ ਪਾਕਿਸਤਾਨ ਮੁਸਲਿਮ ਲੀਗ-ਨਵਾਜ (ਪੀ ਐੱਮ ਐੱਲ-ਐੱਨ) ਦੇ ਆਗੂ ਰਾਜਾ ਫਰੂਕ ਹੈਦਰ ਪ੍ਰਧਾਨ ਮੰਤਰੀ ਸਨ। ਉਹ ਇਸ ਵਾਰ ਚੋਣਾਂ ਵਿੱਚਆਪਣੀ ਸੀਟ ਜਿੱਤ ਗਏ, ਪਰ ਵਿਧਾਨ ਸਭਾ ਚੋਣਾਂ ਵਿਚ ਆਪਣੀ ਪਾਰਟੀ ਦੀ ਹਾਰ ਨਹੀਂ ਰੋਕ ਸਕੇ। ਉਨ੍ਹਾਂ ਦੇ ਮੁਕਾਬਲੇ ਇਮਰਾਨ ਖਾਨ ਦੀ ਪਾਰਟੀ ਪਾਕਿਸਤਾਨ-ਏ-ਇਨਸਾਫ (ਪੀ ਟੀ ਆਈ) ਦੀ ਜਿੱਤ ਨਾਲ ਰਾਜਾ ਫਾਰੂਕ ਹੈਦਰ ਭੜਕ ਗਏਤੇ ਨਾਰਾਜ਼ਗੀ ਦੇ ਕਾਰਨ ਇਹ ਟਿਪਣੀ ਕਰ ਦਿੱਤੀ ਕਿ 250 ਸਾਲ ਗੁਲਾਮ ਰਹਿਣ ਪਿੱਛੋਂ ਕਸ਼ਮੀਰੀ ਲੋਕਾਂ ਦੀ ਮਾਨਸਿਕਤਾ ਗੁਲਾਮਾਂ ਵਾਲੀ ਹੋ ਜਾਣ ਕਾਰਨ ਉਨ੍ਹਾਂ ਨੇ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਦੀ ਪਾਰਟੀ ਜਿਤਾਈ ਹੈ। ਇਮਰਾਨ ਖਾਨ ਦੀ ਪਾਰਟੀ ਦੇ ਨੇਤਾ ਸ਼ਾਹਬਾਜ ਗਿੱਲ ਨੇ ਕਿਹਾ ਕਿ ਉਨ੍ਹਾਂ ਨੂੰ ਇਸ ਬਿਆਨ ਉੱਤੇ ਬਹੁਤ ਹੈਰਾਨੀ ਹੈ। ਗਿੱਲ ਨੇ ਕਿਹਾ ਕਿ ਇਹ ਉਹੀ ਕਸ਼ਮੀਰੀ ਲੋਕ ਹਨ, ਜਿਨ੍ਹਾਂ ਨੇ ਪਿਛਲੀ ਵਾਰੀ ਰਾਜਾ ਫਾਰੂਕ ਹੈਦਰ ਨੂੰ ਰਾਜ ਕਰਨ ਦਾ ਮੌਕਾ ਦਿੱਤਾ ਸੀ।
ਇਸ ਹਫਤੇ ਹੋਈਆਂ ਪੀ ਓ ਕੇ ਵਿਧਾਨ ਸਭਾ ਦੀਆਂ ਚੋਣਾਂ ਵਿੱਚ ਇਮਰਾਨ ਖਾਨ ਦੀ ਪਾਕਿਸਤਾਨ ਤਹਿਰੀਕ-ਏ-ਇਨਸਾਫ ਪਾਰਟੀ ਸਭ ਤੋਂ ਵੱਡੀ ਪਾਰਟੀ ਬਣ ਕੇ ਉਭਰੀ ਹੈ ਅਤੇ ਅਗਲੀ ਸਰਕਾਰ ਉਸ ਦੀ ਬਣੇਗੀ।ਇਮਰਾਨ ਖਾਨ ਦੀ ਪਾਰਟੀਪੀ ਟੀ ਆਈ ਨੇ ਵਿਧਾਨ ਸਭਾ ਦੀਆਂ ਕੁੱਲ 45 ਸੀਟਾਂ ਵਿਚੋਂ 25 ਜਿੱਤੀਆਂ ਹਨ। ਪਾਕਿਸਤਾਨ ਪੀਪਲਜ਼ ਪਾਰਟੀ (ਪੀ ਪੀ ਪੀ) 11 ਸੀਟਾਂ ਨਾਲ ਦੂਸਰੇ ਥਾਂ ਆਈ ਤੇ ਇਸ ਵੇਲੇ ਓਥੇ ਰਾਜ ਕਰਦੀ ਪਾਕਿਸਤਾਨ ਮੁਸਲਿਮ ਲੀਗ-ਨਵਾਜ ਨੂੰ ਸਿਰਫ਼ 6 ਸੀਟਾਂ ਮਿਲੀਆਂ ਹਨ। ਮੁਸਲਿਮ ਕਾਨਫਰੰਸ (ਐੱਮ ਸੀ) ਤੇ ਜੰਮੂ ਕਸ਼ਮੀਰ ਪੀਪਲਜ਼ ਪਾਰਟੀ (ਜੇ ਕੇ ਪੀ ਪੀ) ਨੂੰ ਇਕ-ਇਕ ਸੀਟ ਮਿਲੀ ਹੈ।ਇਸ ਰਾਜ ਵਿੱਚ ਜਦੋਂ ਵੀ ਚੋਣ ਹੋਵੇ ਤਾਂ ਪਾਕਿਸਤਾਨ ਦੀ ਕੇਂਦਰੀ ਸਰਕਾਰ ਨੂੰ ਚਲਾ ਰਹੀ ਪਾਰਟੀ ਹੀ ਏਥੇ ਵੀ ਜਿੱਤਿਆ ਕਰਦੀ ਹੈ ਅਤੇ ਏਸੇ ਤਰ੍ਹਾਂ ਇਸ ਵਾਰੀ ਇਮਰਾਨ ਖਾਨ ਦੀ ਪਾਰਟੀ ਜਿੱਤ ਗਈ ਹੈ।