ਨਵੀਂ ਦਿੱਲੀ, 27 ਜੁਲਾਈ (ਪੋਸਟ ਬਿਊਰੋ)- ਕੀ ਤੁਸੀਂ ਕਦੀ 1400 ਕਿਲੋਮੀਟਰ ਤੋਂ ਵੱਧ ਦੀ ਦੂਰੀ ਕੇਵਲ ਤਿੰਨ ਘੰਟੇ ਵਿੱਚ ਕਰਨ ਦੀ ਕਲਪਨਾ ਕੀਤੀ ਸੀ? ਚੀਨ ਨੇ 600 ਕਿਲੋਮੀਟਰ/ਘੰਟਾ ਚਾਲ ਨਾਲ ਦੁਨੀਆ ਦੀ ਸਭ ਤੋਂ ਤੇਜ਼ ਮੈਗਲੇਵ ਟਰੇਨ ਸ਼ੁਰੂ ਕਰਕੇ ਇਸ ਨੂੰ ਸੰਭਵ ਬਣਾ ਦਿੱਤਾ ਹੈ।
ਕੱਲ੍ਹ ਦੁਨੀਆ ਦੀ ਇਸ ਸਭਤੋਂ ਤੇਜ਼ ਟਰੇਨ ਦਾ ਟਰਾਇਲ ਕੀਤਾ ਗਿਆ। ਇਸਦੀ ਰਿਕਾਰਡ ਬ੍ਰੇਕਿੰਗ ਰਫਤਾਰ ਦਾ ਮਤਲਬ ਹੈ ਕਿ ਇਹ ਪੇਈਚਿੰਗ ਅਤੇ ਸ਼ਿੰਘਾਈ ਵਿੱਚ ਕੇਵਲ ਢਾਈ ਘੰਟੇ ਵਿੱਚ 1000 ਕਿਲੋਮੀਟਰ ਦੂਰੀ ਤਹਿ ਕਰ ਸਕਦੀ ਹੈ। ਇਸ ਯਾਤਰਾ ਵਿੱਚ ਆਮਤੌਰ ਉੱਤੇ ਹਵਾਈ ਜਹਾਜ਼ਰਾਹੀਂ ਤਿੰਨ ਘੰਟੇ ਅਤੇ ਹਾਈ ਸਪੀਡ ਰੇਲ ਵਿੱਚ ਸਾਢੇ ਪੰਜ ਘੰਟੇ ਲੱਗਦੇ ਹਨ। ਚੀਨ ਨੇ ਇਸ ਕਲਪਨਾ ਨੂੰ ਸਾਕਾਰ ਕਰਨ ਵਿੱਚ ਕਰੀਬ ਪੰਜ ਸਾਲ ਦਾ ਸਮਾਂ ਲਾਇਆ ਹੈ। ਹਵਾ ਨਾਲ ਗੱਲਾਂ ਕਰਦੀ ਇਸ ਟਰੇਨ ਦੇ ਪ੍ਰੋਜੈਕਟ ਉੱਤੇ ਚੀਨ ਨੇ 2016 ਵਿੱਚ ਕੰਮ ਸ਼ੁਰੂ ਕੀਤਾ ਸੀ।
ਭਾਰਤ ਵਿੱਚ ਮੈਗਲੇਵ ਟਰੇਨ ਚਲਾਉਣ ਬਾਰੇ ਸਭ ਤੋਂ ਪਹਿਲਾਂ ਪ੍ਰਧਾਨਮੰਤਰੀ ਮਨਮੋਹਨ ਸਿੰਘ ਦੀ ਸਰਕਾਰ ਦੇ ਸਮੇਂ ਵਿਚਾਰ ਸ਼ੁਰੂ ਹੋਇਆ। ਉਦੋ ਮਮਤਾ ਬੈਨਰਜੀ ਕੇਂਦਰੀ ਰੇਲ ਮੰਤਰੀ ਸੀ ਅਤੇ ਮੈਗਲੇਵ ਟਰੇਨ ਨੂੰ ਮੁੰਬਈ ਅਤੇ ਪੁਨੇ ਵਿੱਚ ਚਲਾਉਣ ਦੀ ਯੋਜਨਾ ਸੀ। ਇੱਕ ਅਮਰੀਕੀ ਕੰਪਨੀ ਨੇ 3000 ਕਰੋੜ ਡਾਲਰ ਦੇ ਇਸ ਪ੍ਰੋਜੈਕਟ ਦੀ ਪੇਸ਼ਕਸ਼ ਕੀਤੀ ਸੀ। ਉਦੋ ਮਹਾਰਾਸ਼ਟਰ ਸਰਕਾਰ ਨੇ ਇਸ ਪ੍ਰੋਜੈਕਟ ਨੂੰ ਮਨਜੂਰੀ ਦੇਣ ਦੇ ਨਾਲ ਇਸ ਪ੍ਰੋਜੈਕਟ ਨੂੰ ਨਾਗਪੁਰ ਦੇ ਨਾਲ ਜੋੜੇ ਜਾਣ ਦਾ ਪ੍ਰਸਤਾਵ ਵੀ ਰੱਖਿਆ ਸੀ। ਭਾਰਤ ਵਿੱਚ ਮੈਗਲੇਵ ਟਰੇਨ ਕਦੋਂ ਦੌੜੇਗੀ, ਇਸ ਬਾਰੇ ਅਜੇ ਕੁਝ ਕਿਹਾ ਨਹੀਂ ਜਾ ਸਕਦਾ। ਭਾਰਤੀ ਰੇਲਵੇ ਨੇ ਮੈਗਲੇਵ ਟਰੇਨ ਲਈ 2016 ਵਿੱਚ ਗਲੋਬਲ ਟੈਂਡਰ ਲਾਏ ਸਨ ਅਤੇ ਤਿੰਨ ਵਿਦੇਸ਼ੀ ਕੰਪਨੀਆਂ ਨੇ ਦਿਲਚਸਪੀ ਦਿਖਾਈ ਸੀ। ਇਨ੍ਹਾਂ ਵਿੱਚ ਦੋ ਅਮਰੀਕੀ ਤੇ ਇੱਕ ਜਾਪਾਨੀ ਕੰਪਨੀ ਸੀ। ਇਸ ਤਰ੍ਹਾਂ ਬੀਤੇ ਸਾਲ ਸਰਕਾਰੀ ਇੰਜੀਨਿਅਰਿੰਗ ਕੰਪਨੀ ਬੀ ਐਚ ਈ ਐਲ ਨੇ ਇਸ ਟਰੇਨ ਨੂੰ ਭਾਰਤ ਲਿਆਉਣ ਲਈ ਸਵਿਟਜਰਲੈਂਡ ਦੀ ਕੰਪਨੀ ਸਵਿਸ ਰੈਪਿਡ ਏ ਜੀ ਦੇ ਨਾਲ ਸਮਝੌਤਾ ਕੀਤਾ ਹੈ। ਕੰਪਨੀ ਨੂੰ ਮੈਗਲੇਵ ਰੇਲ ਪਰਿਯੋਜਨਾਵਾਂ ਵਿੱਚ ਖਾਸੀ ਮੁਹਾਰਤ ਹਾਸਲ ਹੈ। ਚੇਤੇ ਰਹੇ ਕਿ ਬੀ ਐਚ ਈ ਐਲ ਪਿੱਛਲੇ ਪੰਜ ਦਹਾਕਿਆਂ ਤੋਂ ਰੇਲਵੇ ਦੇ ਵਿਕਾਸ ਵਿੱਚ ਸਾਂਝੀਦਾਰ ਹੈ।