ਨਵੀਂ ਦਿੱਲੀ, 27 ਜੁਲਾਈ (ਪੋਸਟ ਬਿਊਰੋ)- ਭਾਰਤ ਦੀ ਜ਼ਮੀਨੀ ਫੌਜ, ਹਵਾਈ ਫੌਜ, ਸਮੁੰਦਰੀ ਫੌਜ ਤੇ ਫੌਜੀ ਮੈਡੀਕਲ ਸੇਵਾ ਵਿੱਚ ਅਧਿਕਾਰੀਆਂ ਦੇ ਲੱਗਭਗ 10 ਹਜ਼ਾਰ ਅਤੇ ਜਵਾਨਾਂ ਦੇ ਇੱਕ ਲੱਖ ਤੋਂ ਵੱਧ ਅਹੁਦੇ ਖਾਲੀ ਹਨ। ਰੱਖਿਆ ਰਾਜ ਮੰਤਰੀ ਅਜੇ ਭੱਟ ਨੇ ਰਾਜ ਸਭਾ ਵਿੱਚ ਇੱਕ ਲਿਖਤ ਜਵਾਬ ਵਿੱਚ ਇਹ ਜਾਣਕਾਰੀ ਦਿੱਤੀ ਹੈ।
ਅਜੇ ਭੱਟ ਨੇ ਦੱਸਿਆ ਕਿ ਜ਼ਮੀਨੀ ਫੌਜ ਵਿੱਚ ਅਫਸਰਾਂ ਦੇ 7912, ਹਵਾਈ ਫੌਜ ਵਿੱਚ 610, ਸਮੁੰਦਰੀ ਫੌਜ ਵਿੱਚ 1190 ਅਤੇ ਫੌਜੀ ਮੈਡੀਕਲ ਅਤੇ ਡੈਂਟਲ ਸੇਵਾ ਵਿੱਚ 444 ਅਹੁਦੇ ਅਤੇ ਫੌਜੀ ਨਰਸਿੰਗ ਸੇਵਾ ਵਿੱਚ 693 ਅਹੁਦੇ ਖਾਲੀ ਹਨ। ਆਰਮੀ ਵਿੱਚ ਜਵਾਨ ਅਤੇ ਜੇ ਸੀ ਓ ਦੇ 90,640, ਏਅਰਫੋਰਸ ਦੇ 7104, ਨੇਵੀ ਵਿੱਚ 11,927 ਅਤੇ ਮੈਡੀਕਲ ਸੇਵਾ ਵਿੱਚ 126 ਅਹੁਦੇ ਖਾਲੀ ਹਨ। ਸਰਕਾਰ ਹਥਿਆਰਬੰਦ ਫੌਜਾਂ ਵਿੱਚ ਅਧਿਕਾਰੀਆਂ ਅਤੇ ਜਵਾਨਾਂ ਦੀ ਕਮੀ ਨੂੰ ਪੂਰਾ ਕਰਨ ਦੇ ਉਪਾਅ ਕਰ ਰਹੀ ਹੈ। ਮੰਤਰੀ ਅਜੇ ਭੱਟ ਨੇ ਦੱਸਿਆ ਕਿ ਸਾਲ 2020 ਅਨੁਸਾਰ ਹਥਿਆਰਬੰਦ ਫੌਜਾਂ ਵਿੱਚ ਉਤਰੀ ਸੂਬਿਆਂ ਦੇ ਜਵਾਨਾਂ ਅਤੇ ਜੇ ਸੀ ਓ ਭਾਵ ਜੂਨੀਅਰ ਕਮਿਸ਼ਨ ਅਧਿਕਾਰੀਆਂ ਦੀ ਗਿਣਤੀ ਵੱਧ ਹੈ।ਉਤਰ ਪ੍ਰਦੇਸ਼ ਦੇ ਜੇ ਸੀ ਓ ਸਭ ਤੋਂ ਵੱਧ ਹਨ। ਫੌਜ ਵਿੱਚ ਹਿਮਾਚਲ ਪ੍ਰਦੇਸ਼ ਦੇ 3571, ਬਿਹਾਰ ਦੇ 3405, ਆਂਧਰਾ ਪ੍ਰਦੇਸ਼ ਦੇ 2399, ਜੰਮੂ-ਕਸ਼ਮੀਰ ਤੇ ਲੱਦਾਖ ਦੇ 2834 ਅਤੇ ਕਰਨਾਟਕ ਦੇ 2852 ਜੇ ਸੀ ਓ ਹਨ।
ਦੇਸ਼ ਦੇ ਆਮ ਨਾਗਰਿਕਾਂ ਵਾਂਗ ਹਥਿਆਰਬੰਦ ਦਸਤਿਆਂ ਦੇ ਜਵਾਨ ਵੀ ਵੱਡੀ ਗਿਣਤੀ ਵਿੱਚ ਕੋਰੋਨਾ ਵਾਇਰਸ ਤੋਂ ਪੀੜਤ ਹੋਏ ਹਨ। ਕੋਵਿਡ-19 ਬੀਮਾਰੀ ਦੇ ਕਾਰਨ ਤਿੰਨਾਂ ਫੌਜਾਂ ਦੇ 184 ਜਵਾਨਾਂ ਦੀ ਮੌਤ ਹੋ ਚੁੱਕੀ ਹੈ। ਉਨ੍ਹਾਂ ਦੱਸਿਆ ਕਿ ਮੌਜੂਦਾ ਨਿਯਮਾਂ ਹੇਠ ਤਿੰਨਾਂ ਫ਼ੌਜਾਂ ਦੇ ਮੁਲਾਜ਼ਮਾਂ ਨੂੰ ਸੇਵਾ ਵੇਲੇ ਕੋਵਿਡ ਨਾਲ ਮੌਤ ਹੋਣ ਉੱਤੇ ਵਿਸ਼ੇਸ਼ ਮੁਆਵਜ਼ਾ ਨਹੀਂ ਦਿੱਤਾ ਜਾਂਦਾ, ਪਰ ਸੇਵਾ ਦੌਰਾਨ ਮੌਤ ਦੇ ਸਾਰੇ ਕੇਸਾਂ ਵਿੱਚ ਰਿਟਾਇਰਮੈਂਟਵਾਲੇ ਵੱਖ-ਵੱਖ ਲਾਭ ਦਿੱਤੇ ਜਾਂਦੇ ਹਨ।