ਟੋਰਾਂਟੋ, 26 ਜੁਲਾਈ (ਪੋਸਟ ਬਿਊਰੋ) : ਕੋਵਿਡ-19 ਦੇ ਮਾਮਲਿਆਂ ਵਿੱਚ ਆ ਰਹੀ ਕਮੀ ਕਾਰਨ ਸੋਸ਼ਲ ਡਿਸਟੈਂਸਿੰਗ ਤੇ ਟਰੈਵਲ ਸਬੰਧੀ ਪਾਬੰਦੀਆਂ ਦੇ ਘਟ ਜਾਣ ਨਾਲ ਡਾਕਟਰਾਂ ਵੱਲੋਂ ਰੈਸਪੀਰੇਟਰੀ ਸਿੰਨਸਿਸ਼ੀਅਲ ਵਾਇਰਸ (ਆਰ ਐਸ ਵੀ) ਦੇ ਫੈਲਣ ਦਾ ਡਰ ਪ੍ਰਗਟਾਇਆ ਜਾ ਰਿਹਾ ਹੈ। ਇਹ ਵਾਇਰਸ ਸੱਭ ਤੋਂ ਵੱਧ ਨਵਜੰਮੇਂ ਬੱਚਿਆਂ ਤੇ ਵੱਧ ਉਮਰ ਵਾਲੇ ਬਾਲਗਾਂ ਉੱਤੇ ਅਸਰ ਕਰ ਸਕਦਾ ਹੈ।
ਆਰ ਐਸ ਵੀ ਲੋਅਰ ਰੈਸਪੀਰੇਟਰੀ ਟਰੈਕਟ ਇਨਫੈਕਸ਼ਨਜ਼ ਜਿਵੇਂ ਕਿ ਨਿਮੋਨੀਆਂ ਤੇ ਬਰੌਂਕਾਇਟਸ ਦਾ ਕਾਰਨ ਹੁੰਦਾ ਹੈ। ਇਸ ਕਾਰਨ ਹਰ ਸਾਲ ਦੁਨੀਆ ਭਰ ਵਿੱਚ 2·7 ਮਿਲੀਅਨ ਮੌਤਾਂ ਹੁੰਦੀਆਂ ਹਨ। ਇਹ ਖੁਲਾਸਾ ਕੈਨੇਡੀਅਨ ਮੈਡੀਕਲ ਐਸੋਸਿਏਸ਼ਨ ਜਰਨਲ ਵਿੱਚ ਸੋਮਵਾਰ ਨੂੰ ਛਪੀ ਕਮੈਂਟਰੀ ਵਿੱਚ ਕੀਤਾ ਗਿਆ। ਇਹ ਬਹੁਤ ਹੀ ਆਮ ਤੇ ਇੱਕ ਵਿਅਕਤੀ ਤੋਂ ਦੂਜੇ ਤੱਕ ਫੈਲਣ ਵਾਲਾ ਵਾਇਰਸ ਹੁੰਦਾ ਹੈ। ਆਮ ਤੌਰ ਉੱਤੇ ਇਹ ਦੋ ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਵਿੱਚ ਬੌਂ੍ਰਕਾਇਓਲਾਈਟਿਸ ਵਜੋਂ ਮੌਜੂਦ ਹੁੰਦਾ ਹੈ।
ਇੱਕ ਇੰਟਰਵਿਊ ਵਿੱਚ ਇਸ ਕਮੈਂਟਰੀ ਦੇ ਚਾਰ ਆਥਰਜ਼ ਵਿੱਚੋਂ ਇੱਕ ਬੀਸੀ ਚਿਲਡਰਨਜ਼ ਹਾਸਪਿਟਲ ਰਿਸਰਚ ਇੰਸਟੀਚਿਊਟ ਐਂਡ ਦ ਯੂਨੀਵਰਸਿਟੀ ਆਫ ਬ੍ਰਿਟਿਸ਼ ਕੋਲੰਬੀਆ ਦੇ ਡਾ·ਪਾਸਕਲ ਲੈਵੋਈ ਨੇ ਆਖਿਆ ਕਿ ਅਸੀਂ ਮੁੱਖ ਤੌਰ ਉੱਤੇ ਮੈਡੀਕਲ ਕਮਿਊਨਿਟੀ ਨੂੰ ਐਲਰਟ ਕਰਨਾ ਚਾਹੁੰਦੇ ਹਾਂ ਤਾਂ ਕਿ ਉਹ ਇਸ ਲਈ ਤਿਆਰ ਰਹਿਣ। ਇਸ ਦੇ ਨਾਲ ਹੀ ਅਸੀਂ ਪਰਿਵਾਰਾਂ, ਖਾਸ ਤੌਰ ਉੱਤੇ ਹਾਈ ਰਿਸਕ ਬੱਚਿਆਂ ਦੇ ਮਾਪਿਆਂ ਨੂੰ ਵੀ ਚੌਕਸ ਕਰਨਾ ਚਾਹੁੰਦੇ ਹਾਂ।
ਲੈਵੋਈ ਤੇ ਉਨ੍ਹਾਂ ਦੇ ਸਹਿਯੋਗੀਆਂ ਅਨੁਸਾਰ ਮਹਾਂਮਾਰੀ ਦੌਰਾਨ ਆਰ ਐਸ ਵੀ ਦੇ ਮਾਮਲਿਆਂ ਵਿੱਚ ਕਾਫੀ ਕਮੀ ਆਈ। ਸੋਸ਼ਲ ਡਿਸਟੈਂਸਿੰਗ ਮਾਪਦੰਡ ਅਪਣਾਏ ਜਾਣ ਕਾਰਨ ਇਸ ਦੇ ਪਸਾਰ ਵਿੱਚ ਕਮੀ ਦਰਜ ਕੀਤੀ ਗਈ। ਮਿਸਾਲ ਵਜੋਂ ਕੈਨੇਡਾ ਵਿੱਚ 29 ਅਗਸਤ, 2020 ਤੇ 8 ਮਈ, 2021 ਦਰਮਿਆਨ ਆਰ ਐਸ ਵੀ ਦੇ 239 ਟੈਸਟ ਹੀ ਪਾਜ਼ੀਟਿਵ ਆਏ ਜਦਕਿ ਇਸ ਅਰਸੇ ਦੌਰਾਨ ਇੱਕ ਸਾਲ ਪਹਿਲਾਂ ਆਰ ਐਸ ਵੀ ਦੇ 18,660 ਪਾਜ਼ੀਟਿਵ ਟੈਸਟ ਕੀਤੇ ਗਏ ਸਨ।
ਡਾਕਟਰਾਂ ਨੇ ਆਖਿਆ ਕਿ ਕੋਵਿਡ-19 ਪਾਬੰਦੀਆਂ ਵਿੱਚ ਢਿੱਲ ਦੇਣ ਤੋਂ ਬਾਅਦ ਆਸਟਰੇਲੀਆ ਤੇ ਅਮਰੀਕਾ ਵਿੱਚ ਇਨ੍ਹਾਂ ਕੇਸਾਂ ਵਿੱਚ ਵਾਧਾ ਵੇਖਣ ਨੂੰ ਮਿਲ ਰਿਹਾ ਹੈ ਤੇ ਕੈਨੇਡਾ ਵਿੱਚ ਵੀ ਇਹੋ ਰੁਝਾਨ ਸਾਹਮਣੇ ਆ ਸਕਦਾ ਹੈ।