ਓਟਵਾ, 22 ਜੁਲਾਈ (ਪੋਸਟ ਬਿਊਰੋ) : ਗ੍ਰੀਨ ਪਾਰਟੀ ਦੀ ਆਗੂ ਅਨੇਮੀ ਪਾਲ ਦਾ ਕਹਿਣਾ ਹੈ ਕਿ ਪਾਰਟੀ ਦਾ ਅੰਦਰੂਨੀ ਵਿਵਾਦ ਥੋੜ੍ਹ ਚਿਰਾ ਹੈ ਤੇ ਉਨ੍ਹਾਂ ਆਖਿਆ ਕਿ ਸੱਭ ਕੁੱਝ ਜਲਦ ਹੀ ਠੀਕ ਹੋ ਜਾਵੇਗਾ। ਉਨ੍ਹਾਂ ਮੈਂਬਰਾਂ ਤੇ ਸਮਰਥਕਾਂ ਨੂੰ ਭਵਿੱਖ ਉੱਤੇ ਨਜ਼ਰਾਂ ਟਿਕਾਉਣ ਲਈ ਆਖਿਆ।
ਵੀਰਵਾਰ ਨੂੰ ਟੋਰਾਂਟੋ ਵਿੱਚ ਆਪਣੇ ਕੈਂਪੇਨ ਆਫਿਸ ਦਾ ਰਸਮੀ ਉਦਘਾਟਨ ਕਰਨ ਦੌਰਾਨ ਪਾਲ ਨੇ ਆਖਿਆ ਕਿ ਉਨ੍ਹਾਂ ਖਿਲਾਫ ਬੇਭਰੋਸਗੀ ਮਤਾ ਲਿਆਉਣ ਦਾ ਫੈਸਲਾ ਇੱਕ ਨਿੱਕੇ ਜਿਹੇ ਗਰੁੱਪ ਦਾ ਕੰਮ ਸੀ ਤੇ ਇਸ ਨੂੰ ਸਾਡੀ ਫੈਡਰਲ ਕਾਉਂਸਲ ਵੱਲੋਂ ਵੀ ਮਨਜ਼ੂਰੀ ਨਹੀਂ ਦਿੱਤੀ ਗਈ। ਉਨ੍ਹਾਂ ਆਖਿਆ ਕਿ ਇਸੇ ਲਈ ਲੋਕਾਂ ਨੂੰ ਭਵਿੱਖ ਉੱਤੇ ਨਜ਼ਰਾਂ ਰੱਖਣੀਆਂ ਚਾਹੀਦੀਆਂ ਹਨ। ਅਜਿਹੀ ਸਥਿਤੀ ਕੁੱਝ ਸਮੇਂ ਲਈ ਹੁੰਦੀ ਹੈ ਤੇ ਅਗਲੇ ਮਹੀਨੇ ਸਾਡਾ ਭਵਿੱਖ ਕਾਫੀ ਉੱਜਲਾ ਹੈ। ਸਾਡੇ ਕੋਲ ਕਾਊਂਸਲਰਜ਼ ਦਾ ਨਵਾਂ ਸੈੱਟ ਹੋਵੇਗਾ ਤੇ ਹਰ ਰੋਜ਼ ਅਸੀਂ ਅਗਲੀਆਂ ਚੋਣਾਂ ਲਈ ਹੋਰ ਉਮੀਦਵਾਰਾਂ ਨੂੰ ਮਨਜ਼ੂਰੀ ਦੇ ਰਹੇ ਹਾਂ।
ਬੁੱਧਵਾਰ ਨੂੰ ਓਨਟਾਰੀਓ ਦੀ ਸਰਬਉੱਚ ਅਦਾਲਤ ਵਿੱਚ ਜਮ੍ਹਾਂ ਕਰਵਾਏ ਗਏ ਦਸਤਾਵੇਜ਼ਾਂ ਵਿੱਚ ਪਾਰਟੀ ਨੇ ਇਹ ਦਾਅਵਾ ਕੀਤਾ ਕਿ ਪਾਲ ਨੇ ਸਾਲਸ ਕੋਲ 7 ਜੁਲਾਈ ਨੂੰ ਨੋਟਿਸ ਆਫ ਰਿਕੁਐਸਟ ਜਮ੍ਹਾਂ ਕਰਵਾਇਆ ਸੀ, ਜਿਸ ਵਿੱਚ ਉਸ ਦੀ ਲੀਡਰਸਿ਼ਪ ਦੇ ਸਬੰਧ ਵਿੱਚ ਲਿਆਂਦੇ ਗਏ ਬੇਭਰੋਸਗੀ ਮਤੇ, ਜਿਸ ਬਾਰੇ 20 ਜੁਲਾਈ ਨੂੰ ਵੋਟਿੰਗ ਹੋਣੀ ਸੀ, ਨੂੰ ਦਬਾਉਣ ਦੇ ਹੁਕਮ ਵੀ ਸ਼ਾਮਲ ਸਨ।ਸਾਲਸ ਅਰਲ ਚੈਰਨੀਆਕ ਨੇ 15 ਜੁਲਾਈ ਨੂੰ ਹੁਕਮ ਦਿੱਤਾ ਕਿ ਬੇਭਰੋਸਗੀ ਮਤਾ ਅਗਸਤ ਵਿੱਚ ਹੋਣ ਵਾਲੀ ਪਾਰਟੀ ਦੀ ਆਮ ਜਨਰਲ ਮੀਟਿੰਗ ਤੋਂ ਪਹਿਲਾਂ ਅਮਲ ਵਿੱਚ ਨਹੀਂ ਲਿਆਂਦਾ ਜਾ ਸਕਦਾ। ਇਹ ਵੀ ਆਖਿਆ ਗਿਆ ਕਿ ਪਾਰਟੀ ਨੂੰ ਇਸ ਫੈਸਲੇ ਨੂੰ ਆਪਣੇ ਵੈੱਬਸਾਈਟ ਉੱਤੇ ਅਪਡੇਟ ਕਰਨਾ ਚਾਹੀਦਾ ਹੈ।