ਓਟਵਾ, 20 ਜੁਲਾਈ (ਪੋਸਟ ਬਿਊਰੋ) : ਇਸ ਸਾਲ ਦੇ ਅੰਤ ਵਿੱਚ ਜੇ ਚੋਣਾਂ ਹੁੰਦੀਆਂ ਹਨ ਤਾਂ ਮਾਰਕ ਕਾਰਨੇ ਲਿਬਰਲਾਂ ਵੱਲੋਂ ਚੋਣਾਂ ਵਿੱਚ ਖੜ੍ਹੇ ਨਹੀਂ ਹੋਣਗੇ।
ਬੈਂਕ ਆਫ ਕੈਨੇਡਾ ਤੇ ਬੈਂਕ ਆਫ ਇੰਗਲੈਂਡ ਦੇ ਸਾਬਕਾ ਗਵਰਨਰ ਨੇ ਸਪਸ਼ਟ ਕੀਤਾ ਕਿ ਉਨ੍ਹਾਂ ਵੱਲੋਂ ਵਾਤਾਵਰਣ ਵਿੱਚ ਹੋ ਰਹੀਆਂ ਤਬਦੀਲੀਆਂ ਬਾਰੇ ਗਲੋਬਲ ਸੰਘਰਸ਼ ਵਿੱਚ ਮਦਦ ਕਰਨ ਦੀ ਵਚਨਬੱਧਤਾ ਪ੍ਰਗਟਾਈ ਗਈ ਹੈ ਤੇ ਉਹ ਇਸ ਮਾਮਲੇ ਵਿੱਚ ਸੰਯੁਕਤ ਰਾਸ਼ਟਰ ਦੀ ਅਹਿਮ ਕਾਨਫਰੰਸ ਤੋਂ ਕੁੱਝ ਮਹੀਨੇ ਪਹਿਲਾਂ ਆਪਣਾ ਪੱਲਾ ਨਹੀਂ ਝਟਕ ਸਕਦੇ। ਮੰਗਲਵਾਰ ਨੂੰ ਇੱਕ ਇੰਟਰਵਿਊ ਵਿੱਚ ਕਾਰਨੇ ਨੇ ਆਖਿਆ ਕਿ ਉਨ੍ਹਾਂ ਇਸ ਮਾਮਲੇ ਵਿੱਚ ਕਾਫੀ ਸੋਚ ਵਿਚਾਰ ਕੀਤਾ ਹੈ ਤੇ ਉਹ ਜਨਤਾ ਦੀ ਸੇਵਾ ਵਿੱਚ ਪੂਰਾ ਯਕੀਨ ਰੱਖਦੇ ਹਨ। ਦੂਜੇ ਪਾਸੇ ਉਨ੍ਹਾਂ ਆਖਿਆ ਕਿ ਸਰਕਾਰ ਦੇ ਏਜੰਡੇ ਦਾ ਵੀ ਉਹ ਪੂਰੀ ਤਰ੍ਹਾਂ ਸਮਰਥਨ ਕਰਦੇ ਹਨ।
ਉਨ੍ਹਾਂ ਆਖਿਆ ਕਿ ਪੂਰੇ ਸੋਚ ਵਿਚਾਰ ਤੇ ਕਸ਼ਮਕਸ਼ ਵਿੱਚੋਂ ਨਿਕਲਣ ਤੋਂ ਬਾਅਦ ਉਹ ਇਸੇ ਸਿੱਟੇ ਉੱਤੇ ਪਹੁੰਚੇ ਹਨ ਕਿ ਵਚਨਬੱਧਤਾ, ਵਚਨਬੱਧਤਾ ਹੀ ਹੁੰਦੀ ਹੈ। ਜਿ਼ਕਰਯੋਗ ਹੈ ਕਿ ਕਾਰਨੇ ਕਲਾਈਮੇਟ ਚੇਂਜ ਅਤੇ ਫਾਇਨਾਂਸ ਸਬੰਧੀ ਸੰਯੁਕਤ ਰਾਸ਼ਟਰ ਦੇ ਵਿਸ਼ੇਸ਼ ਸਫੀਰ ਹਨ। ਇਸ ਦੇ ਨਾਲ ਹੀ ਉਹ ਨੈੱਟ ਜ਼ੀਰੋ ਲਈ ਗਲਾਸਗੋਅ ਫਾਇਨਾਂਸ਼ੀਅਲ ਅਲਾਇੰਸ ਦੇ ਚੇਅਰ ਵੀ ਹਨ। ਗਲਾਸਗੋਅ ਫਾਇਨਾਂਸ਼ੀਅਲ ਅਲਾਇੰਸ ਦੁਨੀਆ ਭਰ ਦੇ ਬੈਂਕਾਂ ਤੇ ਅਸੈੱਟ ਮੈਨੇਜਮੈਂਟ ਫਰਮਜ਼ ਨੂੰ ਇੱਕਜੁੱਟ ਕਰਕੇ ਨੈੱਟ ਜ਼ੀਰੋ ਕਾਰਬਨ ਰਿਸਾਅ ਉੱਤੇ ਅਧਾਰਤ ਅਰਥਚਾਰਾ ਤਿਆਰ ਕਰਨ ਦਾ ਟੀਚਾ ਰੱਖਦਾ ਹੈ।
ਕਾਰਨੇ ਦਾ ਕੰਮ ਯੂਐਨ ਕਲਾਈਮੇਟ ਕਾਨਫਰੰਸ, ਜਿਸ ਨੂੰ ਸੀਓਪੀ26 ਵਜੋਂ ਵੀ ਜਾਣਿਆ ਜਾਂਦਾ ਹੈ, ਨੂੰ ਸਫਲ ਬਣਾਉਣ ਲਈ ਕਾਫੀ ਅਹਿਮ ਹੈ। ਇਹ ਕਾਨਫਰੰਸ 31 ਅਕਤੂਬਰ ਤੋਂ 12 ਨਵੰਬਰ ਤੱਕ ਗਲਾਸਗੋਅ ਵਿੱਚ ਹੋਣੀ ਤੈਅ ਹੈ। ਕਾਰਨੇ ਨੇ ਕਿਸੇ ਹੋਰ ਸਮੇਂ ਲਿਬਰਲਾਂ ਲਈ ਚੋਣ ਲੜਨ ਤੋਂ ਇਨਕਾਰ ਨਹੀਂ ਕੀਤਾ।