ਕੈਲਗਰੀ, 19 ਜੁਲਾਈ (ਪੋਸਟ ਬਿਊਰੋ) : ਇੱਕ ਨਵੀਂ ਰਿਪੋਰਟ ਅਨੁਸਾਰ ਟੋਰਾਂਟੋ ਦੇ ਕਾਰੋਬਾਰ ਆਪਣੇ ਕਰਮਚਾਰੀਆਂ ਨੂੰ ਵਰਕ ਫਰੌਮ ਹੋਮ ਦੀ ਥਾਂ ਆਫਿਸ ਤੋਂ ਕੰਮ ਕਰਨ ਲਈ ਰਾਜ਼ੀ ਕਰਨ ਦੀਆਂ ਯੋਜਨਾਵਾਂ ਬਣਾ ਰਹੇ ਹਨ। ਕਮਰਸ਼ੀਅਲ ਰੀਅਲ ਅਸਟੇਟ ਫਰਮ ਅਵਿਜ਼ਨ ਯੰਗ ਦਾ ਕਹਿਣਾ ਹੈ ਜਿਹੜੀਆਂ ਕੰਪਨੀਆਂ ਆਪਣੀ ਆਫਿਸ ਸਪੇਸ ਨੂੰ ਅੱਗੇ ਕਿਸੇ ਹੋਰ ਨੂੰ ਕਿਰਾਏ ਉੱਤੇ ਦੇਣਾ ਚਾਹੁੰਦੀਆਂ ਸਨ ਹੁਣ ਉਨ੍ਹਾਂ ਨੇ ਅਜਿਹਾ ਕਰਨਾ ਬੰਦ ਕਰ ਦਿੱਤਾ ਹੈ। ਫਰਮ ਦਾ ਕਹਿਣਾ ਹੈ ਕਿ ਛੇ ਤਿਮਾਹੀਆਂ ਵਿੱਚ ਉਪਲਬਧ ਸਬਲੈਟ ਸਪੇਸ ਵਿੱਚ ਜਿੰਨੀ ਕਮੀ ਆਈ ਹੈ ਓਨੀ ਪਹਿਲਾਂ ਕਦੇ ਦਰਜ ਨਹੀਂ ਕੀਤੀ ਗਈ। ਇਸ ਤਿਮਾਹੀ ਦੇ ਅੰਤ ਵਿੱਚ ਡਾਊਨਟਾਊਨ ਵਿੱਚ 3·2 ਮਿਲੀਅਨ ਸਕੁਏਅਰ ਫੁੱਟ ਜਾਂ 32 ਫੀ ਸਦੀ ਸਪੇਸ ਉਪਲਬਧ ਹੈ। ਅਵਿਜ਼ਨ ਯੰਗ ਦਾ ਕਹਿਣਾ ਹੈ ਕਿ ਇਹ ਇਸ ਗੱਲ ਦਾ ਸੰਕੇਤ ਹੈ ਕਿ ਟੋਰਾਂਟੋ ਦੇ ਕਾਰੋਬਾਰਾਂ ਨੂੰ ਉਮੀਦ ਹੈ ਕਿ ਜਲਦ ਹੀ ਵੱਧ ਤੋਂ ਵੱਧ ਕਰਮਚਾਰੀ ਆਫਿਸ ਪਰਤ ਆਉਣਗੇ। ਕੁੱਝ ਕੰਪਨੀਆਂ, ਜਿਨ੍ਹਾਂ ਵਿੱਚ ਟੀਐਮਐਕਸ ਗਰੁੱਪ ਤੇ ਇੰਟਲੈਕਸ ਟੈਕਨਾਲੋਜੀਜ਼ ਵੀ ਸ਼ਾਮਲ ਹਨ, ਨੇ ਮਾਰਕਿਟ ਵਿੱਚੋਂ ਸਬਲੈਟ ਸਪੇਸ ਨੂੰ ਜਾਂ ਤਾਂ ਹੌਲੀ ਹੌਲੀ ਕਰਕੇ ਤੇ ਜਾਂ ਫਿਰ ਇੱਕਠਿਆ ਖ਼ਤਮ ਕਰ ਦਿੱਤਾ ਹੈ। ਕੋਵਿਡ-19 ਪਾਬੰਦੀਆਂ ਦੇ ਚੱਲਦਿਆਂ ਟੋਰਾਂਟੋ ਦੇ ਡਾਊਨਟਾਊਨ ਆਫਿਸ ਟਾਵਰਜ਼ ਬਹੁਤਾ ਕਰਕੇ ਖਾਲੀ ਹੀ ਹਨ। ਅਵਿਜ਼ਨ ਯੰਗ ਦੀ ਰਿਪੋਰਟ ਅਨੁਸਾਰ ਦੂਜੀ ਤਿਮਾਹੀ ਵਿੱਚ ਡਾਊਨਟਾਊਨ ਆਫਿਸ ਵੈਕੈਂਸੀ ਰੇਟ 7·3 ਫੀ ਸਦੀ ਦੇ ਹਿਸਾਬ ਨਾਲ ਸੱਭ ਤੋਂ ਵੱਧ ਰਿਹਾ। ਪਰ ਕੁੱਝ ਕੰਪਨੀਆਂ ਵੱਲੋਂ ਅਜਿਹੀ ਝਲਕ ਪੇਸ਼ ਕੀਤੀ ਗਈ ਹੈ ਕਿ ਰਿਟਰਨ ਟੂ ਵਰਕ ਸਟਰੈਟੇਜੀ ਕਿਹੋ ਜਿਹੀ ਲੱਗ ਸਕਦੀ ਹੈ। ਸਨ ਲਾਈਫ ਵੱਲੋਂ ਕੰਮ ਸਬੰਧੀ ਪ੍ਰਬੰਧਾਂ ਲਈ ਆਪਣੇ ਸਟਾਫ ਨੂੰ ਫੈਸਲਾ ਕਰਨ ਦੀ ਖੁੱਲ੍ਹ ਦਿੱਤੀ ਗਈ ਹੈ ਜਦਕਿ ਐਪਲ ਨੇ ਇਸ ਸਾਲ ਦੇ ਅੰਤ ਵਿੱਚ ਆਪਣੇ ਕਰਮਚਾਰੀਆਂ ਨੂੰ ਹਫਤੇ ਵਿੱਚ ਤਿੰਨ ਦਿਨ ਕੰਮ ਉੱਤੇ ਆਫਿਸ ਪਰਤਣ ਲਈ ਆਖਿਆ ਹੈ।