ਪਿਛਲੇ ਮਹੀਨੇ ਵਿਆਹ ਕਰਨ ਦੇ ਬਾਅਦ ਅਭਿਨੇਤਰੀ ਯਾਮੀ ਗੌਤਮ ਕੰਮ ਉੱਤੇ ਮੁੜ ਚੁੱਕੀ ਹੈ। ਬੀਤੇ ਦਿਨੀਂ ਉਸ ਨੇ ਆਪਣੀ ਫਿਲਮ ‘ਏ ਥਰਸਡੇ’ ਦੀ ਸ਼ੂਟਿੰਗ ਪੂਰੀ ਕੀਤੀ ਹੈ। ਉਸ ਨੇ ਅਗਲੀ ਫਿਲਮ ‘ਲਾਸਟ’ ਦਾ ਐਲਾਨ ਕਰ ਦਿੱਤਾ ਹੈ। ‘ਲਾਸਟ’ ਇਨਵੈਸਟੀਗੇਵਿਟ ਡਰਾਮਾ ਫਿਲਮ ਹੋਵੇਗੀ, ਜੋ ਮੀਡੀਆ ਦੀ ਅਖੰਡਤਾ ਉੱਤੇ ਵੀ ਚਾਨਣਾ ਪਾਏਗੀ। ਯਾਮੀ ਫਿਲਮ ਵਿੱਚ ਕਰਾਈਮ ਰਿਪੋਰਟਰ ਦੀ ਭੂਮਿਕਾ ਵਿੱਚ ਹੋਵੇਗੀ।
ਮੇਕਰਸ ਫਿਲਮ ਦੀ ਸ਼ੂਟਿੰਗ ਕੋਲਕਾਤਾ ਅਤੇ ਪੁਰੂਲੀਆ ਦੀਆਂ ਉਨ੍ਹਾਂ ਅਸਲ ਲੋਕੇਸ਼ਨਾਂ ਉੱਤੇ ਕਰਨ ਦੀ ਤਿਆਰੀ ਵਿੱਚ ਹਨ, ਜਿੱਥੇ ਪਹਿਲਾਂ ਦੂਸਰੇ ਮੇਕਰਸ ਦੀ ਨਜ਼ਰ ਨਹੀਂ ਪਈ। ਸੰਗੀਤਕਾਰ ਸ਼ਾਂਤਨੂ ਮੋਇਤਰਾ ਤੇ ਗੀਤਕਾਰ ਸਵਾਨੰਦ ਕਿਰਕਿਰੇ ਉਸ ਸ਼ਹਿਰ ਦੀਆਂ ਭਾਵਨਾਵਾਂ ਨੂੰ ਆਪਣੇ ਗੀਤ ਵਿੱਚ ਲਿਆਉਣ ਦੀ ਕੋਸ਼ਿਸ਼ ਕਰਨਗੇ। ਪਹਿਲਾਂ ਫਿਲਮ ‘ਪਿੰਕ’ ਦਾ ਨਿਰਦੇਸ਼ਨ ਕਰ ਚੁੱਕੇ ਡਾਇਰੈਕਟਰ ਅਨੀਰੁੱਧ ਰਾਏ ਚੌਧਰੀ ‘ਲਾਸਟ' ਦਾ ਨਿਰਦੇਸ਼ਨ ਕਰਨਗੇ। ਫਿਲਮ ਬਾਰੇ ਗੱਲਬਾਤ ਵਿੱਚ ਅਨੀਰੁੱਧ ਨੇ ਕਿਹਾ ਕਿ ਭਾਵੇਂ ਇਹ ਫਿਲਮ ਇਨਵੈਸਟੀਗੇਟਿਵ ਡਰਾਮਾ ਹੈ, ਪਰ ਇਸ ਵਿੱਚ ਦੁਨੀਆ ਨੂੰ ਖੂਬਸੂਰਤ ਬਣਾਉਣ ਦੀਆਂ ਗੱਲਾਂ ਹੋਣਗੀਆਂ। ਮੇਰੇ ਲਈ ਬਹੁਤ ਜ਼ਰੂਰੀ ਹੈ ਕਿ ਮੈਂ ਜੋ ਫਿਲਮਾਂ ਬਣਾਵਾਂ ਉਹ ਸਮਾਜਕ ਸੰਦਰਭ ਵਿੱਚ ਹੋਣ ਅਤੇ ਇਹ ਕਹਾਣੀਆਂ ਆਸਪਾਸ ਦੀ ਦੁਨੀਆ ਤੋਂ ਲਈਆਂ ਗਈਆਂ ਹੋਣ।