ਕੈਰਬਿਸ ਬੇਅ, ਯੂਨਾਈਟਿਡ ਕਿੰਗਡਮ, 13 ਜੂਨ (ਪੋਸਟ ਬਿਊਰੋ) : ਬ੍ਰਿਟੇਨ ਵਿੱਚ ਇਸ ਵੀਕੈਂਡ ਖ਼ਤਮ ਹੋਈ ਤਿੰਨ ਰੋਜ਼ਾ ਜੀ-7 ਸਿਖਰ ਵਾਰਤਾ ਦੌਰਾਨ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ 13 ਮਿਲੀਅਨ ਕੋਵਿਡ-19 ਵੈਕਸੀਨ ਦੀਆਂ ਡੋਜ਼ਾਂ ਵਿਕਾਸਸ਼ੀਲ ਦੇਸ਼ਾਂ ਨੂੰ ਦੇਣ ਦਾ ਤਹੱਈਆ ਪ੍ਰਗਟਾਇਆ। ਇਸ ਸਿਖਰ ਵਾਰਤਾ ਦੌਰਾਨ ਮਹਾਂਮਾਰੀ, ਕਲਾਈਮੇਟ ਚੇਂਜ ਤੇ ਚੀਨ ਨਾਲ ਸਬੰਧਤ ਮੁੱਦੇ ਵਿਚਾਰੇ ਗਏ।
ਇਸ ਤੋਂ ਪਹਿਲਾਂ ਕੈਨੇਡਾ ਨੇ ਮਹਾਂਮਾਰੀ ਨਾਲ ਲੜਨ ਲਈ ਗਰੀਬ ਦੇਸ਼ਾਂ ਨੂੰ ਵੈਕਸੀਨ ਦੀਆਂ 100 ਮਿਲੀਅਨ ਡੋਜ਼ਾਂ ਦੇਣ ਦੀ ਪੇਸ਼ਕਸ਼ ਕੀਤੀ ਸੀ ਪਰ ਜੀ-7 ਮੁਲਕਾਂ ਵਿੱਚੋਂ ਸਿਰਫ ਕੈਨੇਡਾ ਹੀ ਅਜਿਹਾ ਦੇਸ਼ ਸੀ ਜਿਸਨੇ ਇਹ ਸਪਸ਼ਟ ਨਹੀਂ ਕੀਤਾ ਕਿ ਇਸ ਵਿੱਚੋਂ ਡੋਜ਼ਾਂ ਕਿੰਨੀਆਂ ਹੋਣਗੀਆਂ ਤੇ ਕਿੰਨੀ ਆਰਥਿਕ ਮਦਦ ਹੋਵੇਗੀ।ਐਤਵਾਰ ਨੂੰ ਟਰੂਡੋ ਨੇ ਆਖਿਆ ਕਿ 13 ਮਿਲੀਅਨ ਸ਼ੌਟਸ, ਜੋ ਕਿ ਸਾਡੇ ਕੋਲ ਵਾਧੂ ਪਏ ਹਨ, ਤੋਂ ਇਲਾਵਾ ਕੈਨੇਡਾ ਨੇ 87 ਮਿਲੀਅਨ ਡੋਜ਼ਾਂ ਖਰੀਦਕੇ ਵੰਡਣ ਲਈ ਪਹਿਲਾਂ ਹੀ ਅਦਾਇਗੀ ਕਰ ਦਿੱਤੀ ਹੈ ਤੇ ਇਹ ਡੋਜ਼ਾਂ ਐਕਟ ਐਕਸੈਲਰੇਟਰ ਨੂੰ ਭੇਜੀਆਂ ਜਾ ਚੁੱਕੀਆਂ ਹਨ। ਐਕਟ ਐਕਸੈਲਰੇਟਰ ਅਜਿਹਾ ਪ੍ਰੌਗਰਾਮ ਹੈ ਜਿਹੜਾ ਯਕੀਨੀ ਬਣਾਉਂਦਾ ਹੈ ਕਿ ਪੂਰੀ ਦੁਨੀਆਂ ਦੀ ਪਹੁੰਚ ਕੋਵਿਡ-19 ਟੈਸਟਿੰਗ, ਟਰੀਟਮੈਂਟਸ ਤੇ ਵੈਕਸੀਨਜ਼ ਤੱਕ ਹੋਵੇ।
ਸਿਖਰ ਵਾਰਤਾ ਦੀ ਸਮਾਪਤੀ ਉੱਤੇ ਰੱਖੀ ਗਈ ਨਿਊਜ਼ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਟਰੂਡੋ ਨੇ ਆਖਿਆ ਕਿ ਇੱਥੇ ਕੀਤੇ ਗਏ ਵਾਅਦੇ ਮੁਤਾਬਕ ਪਹਿਲਾਂ ਹੀ ਵੈਕਸੀਨ ਦੀਆਂ ਡੋਜ਼ਾਂ ਲੋੜਵੰਦ ਦੇਸ਼ਾਂ ਨੂੰ ਭੇਜੀਆਂ ਜਾ ਚੁੱਕੀਆਂ ਹਨ ਤੇ ਹੁਣ ਤੱਕ ਉੱਥੇ ਪਹੁੰਚਣ ਵੀ ਵਾਲੀਆਂ ਹੋਣਗੀਆਂ। ਪਰ ਉਨ੍ਹਾਂ ਇਹ ਨਹੀਂ ਦੱਸਿਆ ਕਿ ਬਾਕੀ ਡੋਜ਼ਾਂ ਕਦੋਂ ਤੱਕ ਪਹੁੰਚਣਗੀਆਂ।
ਬਾਅਦ ਵਿੱਚ ਪ੍ਰਧਾਨ ਮੰਤਰੀ ਦੇ ਆਫਿਸ ਵੱਲੋਂ ਮੁਹੱਈਆ ਕਰਵਾਈ ਗਈ ਜਾਣਕਾਰੀ ਅਨੁਸਾਰ ਡੋਨੇਟ ਕੀਤੀਆਂ ਗਈਆਂ ਸੱਤ ਮਿਲੀਅਨ ਡੋਜ਼ਾਂ ਫਾਰਮਾਸਿਊਟੀਕਲ ਕੰਪਨੀ ਨੋਵਾਵੈਕਸ ਦੀਆਂ ਹਨ।ਨੋਵਾਵੈਕਸ ਉਹ ਫਰਮ ਹੈ ਜਿਸਦੀ ਵੈਕਸੀਨ ਅਜੇ ਕਲੀਨਿਕਲ ਟ੍ਰਾਇਲ ਵਿੱਚ ਹੀ ਹੈ ਤੇ ਅਜੇ ਇਸ ਵੈਕਸੀਨ ਦੀ ਕੈਨੇਡਾ ਵਿੱਚ ਵਰਤੋਂ ਦੀ ਮਨਜ਼ੂਰੀ ਨਹੀਂ ਮਿਲੀ ਹੈ। ਬਾਕੀ ਡੋਨੇਟ ਕੀਤੀਆਂ ਗਈਆਂ ਵੈਕਸੀਨਜ਼ ਵਿੱਚ ਆਕਸਫੋਰਡ-ਐਸਟ੍ਰਾਜ਼ੈਨੇਕਾ ਤੇ ਜੌਹਨਸਨ ਐਂਡ ਜੌਹਨਸਨ ਦੀਆਂ ਡੋਜ਼ਾਂ ਸ਼ਾਮਲ ਹਨ।