ਵੈਨਕੂਵਰ, 14 ਮਈ (ਪੋਸਟ ਬਿਊਰੋ) : ਬਰਨਾਬੀ, ਬੀਸੀ ਵਿੱਚ ਇੱਕ ਬਿਜ਼ੀ ਸ਼ਾਪਿੰਗ ਸੈਂਟਰ ਵਿੱਚ ਚੱਲੀ ਗੋਲੀ ਵਿੱਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈ ਤੇ ਦੋ ਹੋਰ ਜ਼ਖ਼ਮੀ ਹੋ ਗਏ। ਗੈਂਗ ਵਾਰ ਦੇ ਚੱਲਦਿਆਂ ਇਹ ਰੀਜਨ ਦਾ ਨਵਾਂ ਕ੍ਰਾਈਮ ਸੀਨ ਬਣ ਗਿਆ ਹੈ।
ਬਰਨਾਬੀ ਦੀ ਆਰਸੀਐਮਪੀ ਗੋਲੀ ਚੱਲਣ ਦੀਆਂ ਖਬਰਾਂ ਮਿਲਣ ਤੋਂ ਬਾਅਦ ਰਾਤੀਂ 8:30 ਵਜੇ ਮਾਰਕਿਟ ਕਰੌਸਿੰਗ ਸ਼ਾਪਿੰਗ ਕਾਂਪਲੈਕਸ ਪਹੁੰਚੀ। ਮੌਕੇ ਉੱਤੇ ਪਹੁੰਚੀ ਪੁਲਿਸ ਨੇ ਇੱਕ ਵਿਅਕਤੀ ਨੂੰ ਜ਼ਖ਼ਮੀ ਹਾਲਤ ਵਿੱਚ ਪਾਇਆ। ਉਸ ਨੂੰ ਗੋਲੀਆਂ ਲੱਗੀਆਂ ਹੋਈਆਂ ਸਨ। ਕਿਸੇ ਚਸ਼ਮਦੀਦ ਵੱਲੋਂ ਬਣਾਈ ਗਈ ਵੀਡੀਓ ਵਿੱਚ ਚਿੱਟੇ ਰੰਗ ਦੇ ਫੋਰੈਂਸਿਕ ਸੂਟ ਪਾਈ ਅਧਿਕਾਰੀਆਂ ਨੂੰ ਇੱਕ ਬੇਸੁੱਧ ਵਿਅਕਤੀ ਨੂੰ ਗੋਲੀਆਂ ਲੱਗਣ ਕਾਰਨ ਛਲਣੀ ਹੋਈ ਬੀਐਮਡਬਲਿਊ ਗੱਡੀ ਵਿੱਚੋਂ ਬਾਹਰ ਕੱਢਦਿਆਂ ਵਿਖਾਇਆ ਗਿਆ। ਉਨ੍ਹਾਂ ਵੱਲੋਂ ਉਸ ਵਿਅਕਤੀ ਨੂੰ ਪਾਰਕਿੰਗ ਲੌਟ ਵਿੱਚ ਹੀ ਜ਼ਮੀਨ ਉੱਤੇ ਲਿਟਾ ਦਿੱਤਾ ਗਿਆ ਤੇ ਉਸ ਨੂੰ ਸੀ ਪੀ ਆਰ ਦੇਣੀ ਸ਼ੁਰੂ ਕੀਤੀ ਗਈ।
ਬਰਨਾਬੀ ਆਰਸੀਐਮਪੀ ਦੇ ਕਾਰਪੋਰਲ ਬ੍ਰੈਟ ਕਨਿੰਘਮ ਨੇ ਇੱਕ ਨਿਊਜ਼ ਰਲੀਜ਼ ਵਿੱਚ ਦੱਸਿਆ ਕਿ ਉਸ ਵਿਅਕਤੀ ਨੂੰ ਬਚਾਉਣ ਦੀਆਂ ਕੀਤੀਆਂ ਗਈਆਂ ਸਾਰੀਆਂ ਕੋਸਿ਼ਸ਼ਾਂ ਦੇ ਬਾਵਜੂਦ ਉਸ ਨੂੰ ਬਚਾਇਆ ਨਹੀਂ ਜਾ ਸਕਿਆ ਤੇ ਜ਼ਖ਼ਮਾਂ ਦੀ ਤਾਬ ਨਾ ਸਹਾਰਦਿਆਂ ਹੋਇਆਂ ਉਹ ਦਮ ਤੋੜ ਗਿਆ। ਦੋ ਹੋਰ ਵਿਅਕਤੀ ਵੀ ਗੋਲੀ ਲੱਗਣ ਕਾਰਨ ਜ਼ਖ਼ਮੀ ਹੋ ਗਏ ਤੇ ਉਨ੍ਹਾਂ ਨੂੰ ਇਲਾਜ ਲਈ ਹਸਪਤਾਲ ਭਰਤੀ ਕਰਵਾਇਆ ਗਿਆ। ਇਹ ਵੀ ਦੱਸਿਆ ਜਾ ਰਿਹਾ ਹੈ ਕਿ ਜ਼ਖ਼ਮੀਆਂ ਵਿੱਚ ਇੱਕ ਪੁਰਸ਼ ਤੇ ਇੱਕ ਮਹਿਲਾ ਸੀ।
ਇਸ ਗੋਲੀਕਾਂਡ ਤੋਂ ਅੱਧਾ ਘੰਟਾ ਬਾਅਦ ਪੁਲਿਸ ਨੂੰ ਸਰ੍ਹੀ ਦੇ ਦੱਖਣ ਵੱਲ ਇੱਕ ਬਲਦੀ ਹੋਈ ਗੱਡੀ ਦੀਆਂ ਰਿਪੋਰਟਾਂ ਮਿਲੀਆਂ।ਇਹ ਗੱਡੀ 184 ਸਟਰੀਟ ਤੇ 18ਥ ਐਵਨਿਊ ਨੇੜੇ ਇੱਕ ਡੈੱਡ ਐਂਡ ਰੋਡ ਨੇੜੇ ਪਾਈ ਗਈ। ਇੰਟੇਗ੍ਰੇਟਿਡ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ ਵੱਲੋਂ ਮਾਮਲੇ ਦੀ ਜਾਂਚ ਆਪਣੇ ਹੱਥ ਵਿੱਚ ਲੈ ਲਈ ਗਈ ਹੈ।