ਬਰੈਂਪਟਨ, (ਡਾ. ਝੰਡ) -ਪੰਜਾਬ ਵਿਚ ਲੁਧਿਆਣਾ ਜਿ਼ਲੇ ਦੇ ਇਤਿਹਾਸਕ ਪਿੰਡ ਸਰਾਭਾ ਦੇ ਵਸਨੀਕ ਮਾਸਟਰ ਅਜਮੇਰ ਸਿੰਘ ਪਾਸੀ ਮਾਮੂਲੀ ਜਿਹੀ ਬੀਮਾਰੀ ਤੋਂ ਬਾਅਦ ਲੰਘੇ ਐਤਵਾਰ 9 ਮਈ ਨੂੰ ਇਸ ਫ਼ਾਨੀ ਸੰਸਾਰ ਨੂੰ ਅਲਵਿਦਾ ਕਹਿ ਗਏ। ਉਹ ਲੱਗਭੱਗ 85 ਵਰ੍ਹਿਆਂ ਦੇ ਸਨ। ਸਕੂਲ ਮਾਸਟਰ ਵਜੋਂ 36 ਸਾਲ ਸੇਵਾ ਕਰਨ ਉਪਰੰਤ ਸੇਵਾ-ਮੁਕਤ ਹੋਣ ਤੋਂ ਬਾਅਦ ਉਹ ਆਪਣੀ ਪਤਨੀ ਨਿਰਮਲ ਕੌਰ ਪਾਸੀ ਦੇ ਨਾਲ ਦਸੰਬਰ 1996 ਵਿਚ ਬਰੈਂਪਟਨ ਵਿਚ ਆਪਣੇ ਸਪੁੱਤਰ ਜਸਵੀਰ ਸਿੰਘ ਪਾਸੀ ਅਤੇ ਨੂੰਹ ਪ੍ਰਦੀਪ ਪਾਸੀ ਕੋਲ ਆ ਗਏ ਅਤੇ ਉਦੋਂ ਇੱਥੇ ਹੀ ਰਹਿ ਰਹੇ ਸਨ। ਉਹ ਆਪਣੇ ਪਿੱਛੇ ਪਤਨੀ ਨਿਰਮਲ ਕੌਰ ਪਾਸੀ, ਤਿੰਨ ਪੁੱਤਰਾਂ ਅਤੇ ਪੰਜ ਪੋਤਰੇ/ਪੋਤਰੀਆਂ ਦਾ ਭਰਿਆ ਪਰਿਵਾਰ ਛੱਡ ਗਏ ਹਨ।
ਉਨ੍ਹਾਂ ਦਾ ਜਨਮ 15 ਅਕਤੂਬਰ 1936 ਨੂੰ ਪਿੰਡ ਸਰਾਭਾ ਵਿਖੇ ਹੋਇਆ। ਉਹ ਬੜੇ ਮਿਲਣਸਾਰ, ਮਿੱਠਬੋਲੜੇ ਤੇ ਲੋੜਵੰਦਾ ਦੀ ਸਹਾਇਤਾ ਕਰਨ ਵਾਲੇ ਇਨਸਾਨ ਸਨ ਅਤੇ ਸਮਾਜ-ਸੇਵੀ ਕੰਮਾਂ ਵਿਚ ਵੱਧ-ਚੜ੍ਹ ਕੇ ਹਿੱਸਾ ਲੈਂਦੇ ਸਨ। ਇਕਹਿਰੇ ਜਿਹੇ ਸਰੀਰ ਦੇ ਮਾਲਕ ਅਜਮੇਰ ਸਿੰਘ ਪਾਸੀ ਨੂੰ ਦੌੜਾਂ ਵਿਚ ਭਾਗ ਲੈਣ ਦਾ ਬੜਾ ਸ਼ੌਕ ਸੀ ਅਤੇ ਉਨ੍ਹਾਂ ਨੇ ਪੰਜਾਬ ਵਿਚ ਕਈ ਟੂਰਨਾਮੈਂਟਾਂ ਵਿਚ ਵੀ ਬੜੇ ਉਤਸ਼ਾਹ ਨਾਲ ਭਾਗ ਲਿਆ। ਉਨ੍ਹਾਂ ਦੇ ਇਸ ਸ਼ੌਕ ਦਾ ਅਸਰ ਪ੍ਰਤੱਖ ਰੂਪ ਵਿਚ ਜਸਵੀਰ ਸਿੰਘ ਪਾਸੀ ਉੱਪਰ ਵੇਖਣ ਨੂੰ ਮਿਲਿਆ ਜਦੋਂ ਉਸ ਨੇ ਵੀ ਸਕੂਲ ਤੇ ਕਾਲਜ ਸਮੇਂ ਵੱਖ-ਵੱਖ ਦੌੜਾਂ ਵਿਚ ਹਿੱਸਾ ਲੈਣਾ ਆਰੰਭ ਕੀਤਾ। ਅੱਜਕੱਲ੍ਹ ਜਸਵੀਰ ਪਾਸੀ ਅਤੇ ਉਸ ਦੀ ਪਤਨੀ ਪ੍ਰਦੀਪ ਪਾਸੀ ਬਰੈਂਪਟਨ ਦੀ ਚਰਚਿਤ ਟੀਪੀਏਆਰ ਕਲੱਬ ਦੇ ਸਰਗ਼ਰਮ ਮੈਂਬਰਾਂ ਵਜੋਂ ਜੀ.ਟੀ.ਏ. ਵਿਚ ਹੋਣ ਵਾਲੇ ਦੌੜਾਂ ਦੇ ਬਹੁਤ ਸਾਰੇ ਈਵੈਂਟਸ ਵਿਚ ਹਾਫ਼-ਮੈਰਾਥਨ ਦੌੜਾਂ ਵਿਚ ਬੜੇ ਸ਼ੌਕ ਨਾਲ ਭਾਗ ਲੈਂਦੇ ਹਨ।
ਮਾਸਟਰ ਅਜਮੇਰ ਸਿੰਘ ਦੇ ਪੰਜ-ਭੂਤਕ ਸਰੀਰ ਦਾ ਅੰਤਮ-ਸਸਕਾਰ ਐਤਵਾਰ 16 ਮਈ ਨੂੰ ਕੀਤਾ ਜਾਏਗਾ ਅਤੇ ਉਨ੍ਹਾਂ ਦੀ ਆਤਮਿਕ ਸ਼ਾਂਤੀ ਲਈ ਗੁਰਦੁਆਰਾ ਸਾਹਿਬ ਵਿਚ ਅੰਤਮ ਅਰਦਾਸ ਕੀਤੀ ਜਾਏਗੀ। ਇਸ ਸਮੇਂ ਚੱਲ ਰਹੀ ਕਰੋਨਾ ਮਹਾਂਮਾਰੀ ਦੇ ਪ੍ਰਕੋਪ ਕਰਕੇ ਲੱਗੀਆਂ ਪਾਬੰਦੀਆਂ ਦੇ ਕਾਰਨ ਕੇਵਲ ਪਰਿਵਾਰ ਦੇ ਸੀਮਤ ਨਜ਼ਦੀਕੀ ਮੈਂਬਰ ਹੀ ਇਸ ਸਮੇਂ ਹਾਜ਼ਰ ਹੋ ਸਕਣਗੇ। ਜਸਵੀਰ ਸਿੰਘ ਪਾਸੀ ਅਤੇ ਤੇਜਿੰਦਰ ਸਿੰਘ ਪਾਸੀ ਨਾਲ ਅਫ਼ਸੋਸ ਪ੍ਰਗਟ ਕਰਨ ਲਈ ਉਨ੍ਹਾਂ ਦੇ ਫ਼ੋਨ ਨੰਬਰਾਂ ਕ੍ਰਮਵਾਰ 416-843-5330 ਅਤੇ 647-283-5826 'ਤੇ ਸੰਪਰਕ ਕੀਤਾ ਜਾ ਸਕਦਾ ਹੈ।