ਵਾਸਿੰ਼ਗਟਨ, 12 ਮਈ (ਪੋਸਟ ਬਿਊਰੋ) ; ਮਿਸ਼ੀਗਨ ਵੱਲੋਂ ਕੱਚੇ ਤੇਲ ਵਾਲੀ ਇੱਕ ਅਹਿਮ ਪਾਈਪਲਾਈਨ ਨੂੰ ਬੰਦ ਕਰਨ ਲਈ ਮਿਥੀ ਗਈ ਡੈੱਡਲਾਈਨ ਤੋਂ ਇੱਕ ਦਿਨ ਪਹਿਲਾਂ ਮੰਗਲਵਾਰ ਨੂੰ ਕੈਨੇਡਾ ਵੱਲੋਂ ਇੱਕ ਸਖ਼ਤ ਟਿੱਪਣੀ ਜਾਰੀ ਕੀਤੀ ਗਈ ਜਿਸ ਵਿੱਚ ਲਿਖਿਆ ਗਿਆ ਕਿ ਇਸ ਨਾਲ ਦੋਵਾਂ ਮੁਲਕਾਂ ਦੇ ਸਬੰਧ ਕਮਜ਼ੋਰ ਪੈ ਸਕਦੇ ਹਨ।
ਇਸ ਟਿੱਪਣੀ ਨੂੰ ਜੇ ਚੇਤਾਵਨੀ ਆਖਿਆ ਜਾਵੇ ਤਾਂ ਅਤਿਕਥਨੀ ਨਹੀਂ ਹੋਵੇਗੀ।ਕੈਨੇਡੀਅਨ ਕੰਪਨੀ ਐਨਬ੍ਰਿੱਜ ਇੰਕ·, ਮਿਸ਼ੀਗਨ ਤੇ ਅਮਰੀਕਾ ਦੇ ਇਸ ਫੈਸਲੇ ਦੀ ਹਮਾਇਤ ਕਰ ਰਹੇ ਐਨਵਾਇਰਮੈਂਟਲ ਗਰੁੱਪਜ਼, ਖਿਲਾਫ ਕਾਨੂੰਨੀ ਜੰਗ ਵਿੱਢਣ ਦੀ ਤਿਆਰੀ ਕਰ ਰਹੀ ਹੈ।ਇਹ ਪਾਈਪਲਾਈਨ ਮੈਕੀਨੈਕ ਦੇ ਪਾਣੀਆਂ ਥੱਲਿਓਂ ਲੰਘਦੀ ਹੈ ਤੇ ਇਸ ਨੂੰ ਲਾਈਨ 5 ਆਖਿਆ ਜਾਂਦਾ ਹੈ।
ਕੈਨੇਡੀਅਨ ਸਰਕਾਰ ਇਸ ਮਾਮਲੇ ਵਿੱਚ ਐਨਬ੍ਰਿੱਜ ਦੀ ਪਿੱਠ ਥਾਪੜਨ ਵਾਸਤੇ ਦਖਲ ਦੇ ਰਹੀ ਹੈ। ਕੈਨੇਡੀਅਨ ਸਰਕਾਰ ਵੱਲੋਂ ਅਮਰੀਕਾ ਦੀ ਫੈਡਰਲ ਅਦਾਲਤ ਵਿੱਚ ਫਾਈਲ ਕੀਤੇ ਗਏ ਆਪਣੇ ਪੱਖ ਵਿੱਚ ਆਖਿਆ ਗਿਆ ਹੈ ਕਿ 1977 ਦੀ ਕੈਨੇਡਾ-ਯੂਐਸ ਪਾਈਪਲਾਈਨ ਸੰਧੀ ਤਹਿਤ ਦੋਵਾਂ ਦੇਸ਼ਾਂ ਦਰਮਿਆਨ ਤੇਲ ਦੇ ਮੁਕਤ ਵਹਾਅ ਦੀ ਗਾਰੰਟੀ ਦਿੱਤੀ ਗਈ ਸੀ ਤੇ ਇਸ ਦੇ ਮੱਦੇਨਜ਼ਰ ਮਿਸ਼ੀਗਨ ਨੂੰ ਇੱਕਤਰਫਾ ਕਾਰਵਾਈ ਕਰਨ ਦਾ ਕੋਈ ਅਧਿਕਾਰ ਨਹੀਂ ਹੈ।
ਓਟਵਾ ਨੇ ਇਹ ਵੀ ਆਖਿਆ ਕਿ ਇਸ ਮਾਮਲੇ ਨਾਲ ਇਤਿਹਾਸਕ ਢਾਂਚੇ, ਜਿਸ ਉੱਤੇ ਕਈ ਪੀੜ੍ਹੀਆਂ ਤੋਂ ਅਮਰੀਕਾ ਤੇ ਕੈਨੇਡਾ ਦੇ ਸਬੰਧ ਸਫਲਤਾਪੂਰਬਕ ਚੱਲ ਰਹੇ ਹਨ, ਦੀ ਸਾਰਥਕਤਾ ਦੇ ਸਬੰਧ ਵਿੱਚ ਚਿੰਤਾ ਵੀ ਖੜ੍ਹੀ ਹੁੰਦੀ ਹੈ।ਪ੍ਰਾਪਤ ਜਾਣਕਾਰੀ ਅਨੁਸਾਰ ਲਾਈਨ 5 ਰਾਹੀਂ ਰੋਜ਼ਾਨਾ 540,000 ਬੈਰਲ ਤੇਲ ਪੱਛਮੀ ਕੈਨੇਡਾ ਤੋਂ ਓਨਟਾਰੀਓ, ਕਿਊਬਿਕ, ਮਿਸ਼ੀਗਨ, ਓਹਾਇਓ ਤੇ ਇੰਡੀਆਨਾ ਪਹੁੰਚਦਾ ਹੈ। ਇਹ ਵੀ ਕਨਸੋਆਂ ਹਨ ਕਿ ਕੈਨੇਡਾ ਵਿੱਚ ਇਹ ਚੋਣਾਂ ਦਾ ਵਰ੍ਹਾ ਹੋਣ ਕਾਰਨ ਇਸ ਪਾਈਪਲਾਈਨ ਨੂੰ ਚੱਲਦਾ ਰੱਖਣ ਲਈ ਕੈਨੇਡਾ ਵਾਸਿ਼ੰਗਟਨ ਵਿੱਚ ਲੌਬਿੰਗ ਕਰ ਰਿਹਾ ਹੈ। ਪਰ ਵਾੲ੍ਹੀਟ ਹਾਊਸ ਇਸ ਮਾਮਲੇ ਵਿੱਚ ਚੁੱਪ ਧਾਰੀ ਬੈਠਾ ਹੈ।