ਟੋਰਾਟੋ, 12 ਮਈ (ਪੋਸਟ ਬਿਊਰੋ) : ਓਨਟਾਰੀਓ ਦੇ ਸਾਇੰਸ ਸਲਾਹਕਾਰਾਂ ਦਾ ਕਹਿਣਾ ਹੈ ਕਿ ਪ੍ਰੋਵਿੰਸ ਵੱਲੋਂ ਜੇ ਅਗਲੇ ਹਫਤੇ ਸਟੇਅ ਐਟ ਹੋਮ ਆਰਡਰਜ਼ ਵਿੱਚ ਵਾਧਾ ਵੀ ਕੀਤਾ ਜਾਂਦਾ ਹੈ ਤਾਂ ਵੀ ਓਨਟਾਰੀਓ ਸੁਰੱਖਿਅਤ ਢੰਗ ਨਾਲ ਕਈ ਮਨੋਰੰਜਨ ਵਾਲੀਆਂ ਫੈਸਿਲਿਟੀਜ਼ ਨੂੰ ਖੋਲ੍ਹ ਸਕਦਾ ਹੈ।
ਓਨਟਾਰੀਓ ਦੇ ਕੋਵਿਡ-19 ਸਾਇੰਸ ਐਡਵਾਈਜ਼ਰੀ ਟੇਬਲ ਦੇ ਸਾਇੰਟਿਫਿਕ ਡਾਇਰੈਕਟਰ ਨੇ ਆਖਿਆ ਕਿ ਆਊਟਡੋਰ ਗਤੀਵਿਧੀਆਂ ਜਿਵੇਂ ਕਿ ਗੌਲਫ, ਟੈਨਿਸ ਤੇ ਬੀਚ ਵਾਲੀਬਾਲ ਘੱਟ ਰਿਸਕ ਵਾਲੀਆਂ ਖੇਡਾਂ ਹਨ ਤੇ ਵਾਧੂ ਹਦਾਇਤਾਂ ਨਾਲ ਪ੍ਰੋਵਿੰਸ ਲੋਕਾਂ ਨੂੰ ਇੱਕ ਵਾਰੀ ਮੁੜ ਖੇਡਣ ਦੀ ਇਜਾਜ਼ਤ ਦੇ ਸਕਦਾ ਹੈ।ਡਾ· ਪੀਟਰ ਜੂਨੀ ਨੇ ਆਖਿਆ ਕਿ ਜੇ ਫਿਜ਼ੀਕਲ ਡਿਸਟੈਂਸਿੰਗ ਦਾ ਪਾਲਨ ਨਹੀਂ ਹੋ ਸਕਦਾ ਤਾਂ ਲੋਕਾਂ ਨੂੰ ਮਾਸਕ ਪਾਉਣੇ ਚਾਹੀਦੇ ਹਨ। ਉਨ੍ਹਾਂ ਆਖਿਆ ਕਿ ਵੱਧ ਰਿਸਕ ਵਾਲੀਆਂ ਗਤੀਵਿਧੀਆਂ ਜਿਵੇਂ ਕਿ ਕਾਰ ਪੂਲਿੰਗ ਜਾਂ ਲਾਕਰ ਰੂਮ ਸਾਂਝਾ ਕੀਤੇ ਜਾਣ ਨੂੰ ਸ਼ਹਿ ਨਹੀਂ ਦੇਣੀ ਚਾਹੀਦੀ।
ਜਿ਼ਕਰਯੋਗ ਹੈ ਕਿ ਪਿਛਲੇ ਮਹੀਨੇ ਪ੍ਰੋਵਿੰਸ ਵੱਲੋਂ ਸਟੇਅ ਐਟ ਹੋਮ ਦੇ ਹੁਕਮ ਦਿੱਤੇ ਗਏ ਸਨ ਜਿਸ ਨਾਲ ਪਲੇਅਗ੍ਰਾਊਂਡਸ ਨੂੰ ਛੱਡ ਕੇ ਹਜ਼ਾਰਾਂ ਕਾਰੋਬਾਰ ਤੇ ਆਊਟਡੋਰ ਮਨੋਰੰਜਨ ਵਾਲੀਆਂ ਥਾਂਵਾਂ ਬੰਦ ਕਰ ਦਿੱਤੀਆਂ ਗਈਆਂ ਸਨ। ਸਰਕਾਰ ਨੇ ਸੋਮਵਾਰ ਨੂੰ ਇਹ ਵੀ ਆਖਿਆ ਕਿ ਉਹ ਇਨ੍ਹਾਂ ਹੁਕਮਾਂ ਨੂੰ ਵਧਾਉਣ ਬਾਰੇ ਵੀ ਵਿਚਾਰ ਕਰ ਰਹੀ ਹੈ।ਸਾਇੰਸ ਟੇਬਲ ਵੱਲੋਂ ਆਊਟਡੋਰ ਗਤੀਵਿਧੀਆਂ ਉੱਤੇ ਲਾਈਆਂ ਗਈਆਂ ਪਾਬੰਦੀਆਂ ਦੀ ਆਲੋਚਨਾ ਕੀਤੀ ਗਈ ਤੇ ਆਖਿਆ ਗਿਆ ਕਿ ਇਸ ਨਾਲ ਕੋਵਿਡ-19 ਨਿਯੰਤਰਿਤ ਨਹੀਂ ਹੋਵੇਗਾ ਤੇ ਸਗੋਂ ਇਸਦਾ ਬੱਚਿਆਂ ਦੇ ਨਾਲ ਨਾਲ ਉਨ੍ਹਾਂ ਲੋਕਾਂ ਉੱਤੇ ਵੀ ਮਾੜਾ ਅਸਰ ਪਵੇਗਾ ਜਿਨ੍ਹਾਂ ਕੋਲ ਹਰਿਆਵਲ ਦੇ ਨਾਂ ਉੱਤੇ ਕੁੱਝ ਨਹੀਂ ਹੈ।
ਜੂਨੀ ਨੇ ਆਖਿਆ ਕਿ ਲੋਕਾਂ ਨੂੰ ਬਾਹਰ ਜਾਣ ਤੇ ਸੁਰੱਖਿਅਤ ਢੰਗ ਨਾਲ ਐਕਸਰਸਾਈਜ਼ ਕਰਨ ਦੀ ਇਜਾਜ਼ਤ ਦੇਣੀ ਚਾਹੀਦੀ ਹੈ। ਉਨ੍ਹਾਂ ਆਖਿਆ ਕਿ ਜੇ ਫਿਜ਼ੀਕਲ ਡਿਸਟੈਂਸਿੰਗ ਰੱਖੀ ਜਾਵੇ ਤੇ ਢੰਗ ਨਾਲ ਮਾਸਕ ਲਾਏ ਜਾਣ ਤਾਂ ਦੋ ਵੱਖ ਵੱਖ ਘਰਾਂ ਦੇ 10 ਮੈਂਬਰਾਂ ਨੂੰ ਵੀ ਆਊਟਡੋਰ ਇੱਕਠੇ ਹੋਣ ਦਿੱਤਾ ਜਾ ਸਕਦਾ ਹੈ। ਪਰ ਸਰਕਾਰ ਵੱਲੋਂ ਨਿਯਮਾਂ ਵਿੱਚ ਤਬਦੀਲੀ ਕਰਨ ਵਿੱਚ ਕੋਈ ਰੂਚੀ ਨਹੀਂ ਵਿਖਾਈ ਗਈ।