ਸਿੰਗਾਪੁਰ, 11 ਮਈ (ਪੋਸਟ ਬਿਊਰੋ)- ਸਿੰਗਾਪੁਰ ਵਿੱਚ ਨਫ਼ਰਤੀ ਅਪਰਾਧ ਦੇ ਇੱਕ ਪ੍ਰਗਟਾਵੇ ਵਿੱਚ ਇੱਕ ਵਿਅਕਤੀ ਨੇ ਤੇਜ਼ ਚਾਲ ਨਾਲ ਟਹਿਲ ਰਹੀ ਭਾਰਤੀ ਮੂਲ ਦੀ 55 ਸਾਲਾ ਔਰਤ ਵੱਲੋਂ ਮਾਸਕ ਨਾ ਪਹਿਨਣ ਬਾਰੇ ਨਸਲੀ ਟਿੱਪਣੀ ਕੀਤੀ ਅਤੇ ਉਸ ਨੂੰ ਲੱਤ ਮਾਰੀ, ਜਿਸ ਬਾਰੇ ਪੁਲਸ ਜਾਂਚ ਕਰ ਰਹੀ ਹੈ।
ਪੀੜਤਾ ਦੀ ਬੇਟੀ ਪ੍ਰਵੀਨ ਕੌਰ ਦੇ ਹਵਾਲੇ ਨਾਲ ਨਿਊਜ਼ ਚੈਨਲ ਨੇ ਕਿਹਾ ਕਿ ਪ੍ਰਾਈਵੇਟ ਟੀਚਰ ਹਿੰਡੋਚਾ ਨੀਤਾ ਵਿਸ਼ਨੂੰਭਾਈ ਕੱਲ੍ਹ ਸਵੇਰੇ ਤੇਜ਼ੀ ਨਾਲ ਚੱਲਦੇ ਹੋਏ ਟਹਿਲ ਰਹੀ ਸੀ ਕਿ ਇੱਕ ਵਿਅਕਤੀ ਉਨ੍ਹਾਂ ਕੋਲ ਆਇਆ ਤੇ ਉਨ੍ਹਾਂ ਨੂੰ ਮਾਸਕ ਨੂੰ ਠੋਡੀ ਤੋਂ ਉਪਰ ਕਰਨ ਨੂੰ ਕਿਹਾ। ਪ੍ਰਵੀਨ ਨੇ ਇੰਸਟਾਗ੍ਰਾਮ ਪੋਸਟ ਵਿੱਚ ਕਿਹਾ ਕਿ ਉਨ੍ਹਾਂ (ਨੀਤਾ) ਨੇ ਦੱਸਿਆ ਕਿ ਉਹ ਤੇਜ਼ ਚਾਲ ਨਾਲ ਟਹਿਲ ਰਹੀ ਹੈ, ਪਰ ਉਸ ਇਸ ਉੱਤੇ ਧਿਆਨ ਨਹੀਂ ਦਿੱਤਾ। ਦੋਸ਼ੀ ਨੇ ਮੰਦੀ ਭਾਸ਼ਾ ਵਰਤਦਿਆਂ ਨਸਲੀ ਟਿੱਪਣੀਆਂ ਵੀ ਕੀਤੀਆਂ। ਮੇਰੀ ਮਾਂ ਨੇ ਜਵਾਬ ਵਿੱਚ ਕਿਹਾ ਕਿ ‘ਗਾਡ ਬਲੈਸ ਯੂ' (ਰੱਬ ਤੁਹਾਡਾ ਭਲਾ ਕਰੇ) ਪਰ ਉਸ ਵਿਅਕਤੀ ਨੇ ਮੇਰੀ ਮਾਂ ਦੇ ਸੀਨੇ ਉੱਤੇ ਲੱਤ ਮਾਰੀ। ਮੇਰੀ ਮਾਂ ਦੇ ਕਾਫ਼ੀ ਸੱਟਾਂ ਲੱਗੀਅ। ਪੁਲਸ ਨੇ ਕਿਹਾ ਕਿ ਇਸ ਦਾ ਕੇਸ ਦਰਜ ਕਰ ਕੇ ਜਾਂਚ ਕੀਤੀ ਜਾ ਰਹੀ ਹੈ। ਦੋਸ਼ੀ ਵਿਅਕਤੀ ਦੀ ਪਛਾਣ ਅਜੇ ਨਹੀਂ ਹੋ ਸਕੀ ਤੇ ਉਹ ਫ਼ਰਾਰ ਹੈ।